रोमी 7
7
ङ्येन्जे नमूना त्या
1अत-अची च्योन्यू, ङ मोशाजे नियम स्येब मीयूने येन ख्यङ्। मी सोम्बो ख्यङ्दा सेमेत्या मोशाजे नियम मन्दीय यब नमयूने था त्वा? 2नमूनाजे लागि, ङ्येन् क्यूरेब मदी सूने ख्यङ्लीने रङ्से प्ल्यङ सोम्बो ख्यङ्दासेमे मोशाजे नियम अनुसार ङूप्रेने ख्यायेब क्यूक्क्य, तर प्ल्यङ सीबदेयलो ङूदे हम्ब नियमदे ख्यादेबे येन्स्ये त्वो। 3येर्बेने प्ल्यङ सोम्बो ख्यङ्बने ङू सूजो पतीप्रे प्रदेयलो ङूने वेश्य यीय। तर प्लोङ् सीबदेयलो ङू हम्ब मोशाजे नियमदे छुटकारा क्यूक्क्य मेस्ये सूजो पतीप्रे ङ्येन् चील्लीने ङूने वेश्य यदेबे अन्-य।
4येर्बे ङैजे अत च्योन्यू, नमयूये ख्रीष्टजे ङ्वप्रे क्यूत्देबे मोशाजे नियमजे अनुसार सीये ख्यङ्, होरेक्यूत्देबे नमयू सूजो मी, या सीइदेबे सोम्बो क्यूरब ख्रीष्टप्रे त्या क्यूर्, मेस्ये परमेश्वरजे लागि ज्य क्यूरब काम ची। 5कन्छ्वाब ङीन पापी-स्वभावने जीया चेन ख्य, हन्छ्वाब ङीनने सीबसे पीनब फल लोस्य यदेबे मोशाजे नियमदे तो प्लेदेबे ङीनने पाप चीतीङ्रब सेम्दे ङीन्जे अङ्गयूने काम चे ख्य। 6ङीन बन्धन्ने येब मोशाजे नियमजे लागि सीइदेबे ङीन जेम्से हम्बदे स्वतन्त्र क्यूर ख्यङ्, मेस्ये लिख्दीयेब ङीङ् नियम-कानून नङ्ने दी, तर पवित्र आत्माजे सर् जीयाने ङीन सेवा चेख्यङ्।
मोशाजे नियम मेस्ये पाप
7 #
प्रस्थान 20:17; व्यवस्था 5:21 होरेयलो ङीनदे च य? मोशाजे नियमब पाप औ? देने दी! कादेये मोशाजे नियम त्वयलो पाप यब ङैदे अन्स्ये ख्यङ्दे, चेनेयलो “नदे लोभ अन्चील्लाची” यदेबे मोशाजे नियमदे अन्स्य्वेयलो लोभ चे यब च ख्यङ्दे थाने अम्प्रे ख्यङ्दे। 8तर मोशाजे नियमजे आज्ञाने पापदे मौका प्रेत्देबे ङैने साप्ता थरजे लोभ चेब सेम् पीन्दे। मोशाजे नियम त्वयलो पाप सीयेप्रेने ख्यङ्। 9मोशाजे नियम अम्मन्दीलाबे टूङ्ब त्याफे ङ सोम्बो ख्य, तर आज्ञा प्रेमेस्ये पाप जाग्तीरदे, 10मेस्ये ङ ब सीइदे। येरेक्यूत्देबे जीया पीन पर्देब मोशाजे नियमदेब ङैजे लागि सीब पर्देब चीत्दे यब पो ङैदे था प्रेत्दे। 11#उत्पत्ति 3:13चेनेयलो आज्ञाने मौका प्रेत्देबे पापदे ङैने छाक्दीदे, मेस्ये हम्बदेने ङैने सेक्कदे। 12मोशाजे नियम पवित्र ख्यङ्, आज्ञाये पवित्र, न्याय अनुसार मेस्ये ज्य ख्यङ्।
13कम्ब ज्य ख्यङ्, हम्बदे ङैने सीब पर्दे चीत्दा स्व? केर्बेये दी! तर पापब पापप्रने तङ्स्य यदेबे ज्य सेयू तेन्देबे पापदे ङैने सीब पर्दे चीत्दे, येरेक्यूत्देबे आज्ञा चील्दीदेबे पाप सोरोफत्या दुष्ट क्यूत्दे।
14चेनेयलो ङीनदे स्ये ख्यङ्, मोशाजे नियम आत्माजे पो ख्यङ्, तर ङ्वजे स्वभाव अनुसार प्रबजे लागि मेस्ये पापजे त्वो क्यूरने ङ सोङ्क ख्यङ्। 15#गलाती 5:17ङैदे च चीन्न ख्यङ्, ङ रङ्सेदेने था त्वो। चेनेयलो ङ च चीस्ये मन, हम्ब अन्ची। तर ङैदे च घिन चेक्क्य, हम्बने चीक्क्य। 16येर्बे ङैदे चेस्ये अम्मनब काम चीत्देयलो, मोशाजे नियम ज्य ख्यङ् यदेबे ङ मन्दीय। 17येरेक्यूत्देबे हम्ब काम चेब ङैदे दी, तर ङैजे नङ्ने ख्यब पापदे चे ख्यङ्। 18चेनेयलो ङैने था ख्यङ्, ङैजे पापी स्वभावने तीत्यात्याये ज्य पो अन्टूङ्। कम्ब ज्य काम ख्यङ्, तर हम्ब चीस्ये मन्लीने ङैदे चे अङ्खू। 19चेनेयलो ङैदे चेमेब ज्य काम, हम्ब ङ अन्ची, तर कम्ब दुष्ट काम चीत्तीङ् अन्ड, हम्बने ङैदे चीक्क्य। 20ङैदे चेस्ये अम्मनब हम्ब काम चीक्क्य यलो, हम्ब चेब ङ दी, तर ङैजे नङ्ने ख्यब पाप ख्यङ्।
21येरेक्यूत्देबे नियम त्यादे येरे काम चीन्नब प्रेक्क्य। कन्छ्वाब ङ ज्य काम चीत्तीङ्रीय, हन्छ्वाब दुष्ट ङैजे ट्यानेने ख्यब था प्रेक्क्य। 22ङैजे सेम् नङ्ने परमेश्वरजे नियम ख्यङ्देबे सूगप्रे ख्यङ्, 23तर ङैजे अङ्गयूने ख्यब सूजो नियमब ङैजे सेम्ने ख्यब नियमप्रे जीङ्क्य। मेस्ये ङैजे अङ्गयूने बास चेब पापजे नियमदे ङैने बन्धन्ने येक्क्य। 24होमाइ, ङ कर दूखी मी! ङैजे अम्ब सीबमेल्नब ङ्वने सूदे उद्धार चीम्मीय? 25परमेश्वरने धन्यवाद क्यूस्स्य-
ङूदेने येशू ख्रीष्टने क्यूत्देबे उद्धार चीम्मीय। होरक्यूत्देबे ङ रङ्से सेम्देब परमेश्वरजे नियमजे सेवा चीक्क्य, तर ङैजे पाप स्वभावदेब ङ पाप नियमजे सेवा चीक्क्य।
Ghale New Testament © Nepal Bible Society, 2011.