एफिसी 1
1
1 #
मूल स्यूस्स्यायूजे कामजे किताब 18:19-21; 19:1 परमेश्वरजे इच्छादे ख्रीष्ट येशूजे मूल स्यूस्स्या ङ पावलदे, एफिससने ख्यब ख्रीष्ट येशूने विश्वास चेब परमेश्वरजे पवित्र मीयूने अम्ब चिट्ठी लिख्दीन ख्यङ्:
2ङीनजे प परमेश्वर मेस्ये प्रभु येशू ख्रीष्टदे नमयूने अनुग्रह मेस्ये शान्ति पीन्स्य।
ख्रीष्टने आत्माजे असी
3ङीन प्रभु येशू ख्रीष्टजे प परमेश्वरजे जै-जै क्यूस्स्य, ङूदे ङीनने स्वर्गजे नेयूने साप्ता आत्माजे असीदे ख्रीष्ट ङीनप्रे क्यूत्देबे असी पीन ख्यङ्। 4संसार सृष्टि क्यूरयली खूम्देमेस्येने परमेश्वरदे ख्रीष्टने क्यूत्देबे ङीनने प्रेम चीत्दे मेस्ये ङूजे खूम्ने पवित्र मेस्ये चैत्याये दोष त्वब क्यूरने सेल्दे। 5परमेश्वरजे इच्छा अनुसार ख्रीष्ट येशूने क्यूत्देबे ङूदे ङीनने ङूजे छगूम्-पूर्गूम् क्यूरने खूम्देमेस्येने सेल ख्य, 6येर्बी केन् अनुग्रहजे लागि परमेश्वरने ङीन धन्यवाद पीने। रङ्सेजे छेब चप्रे क्यूत्देबे ङूदे ङीनने अम्ब दान होरेने पीन्दे। 7#कलस्सी 1:14ङूजे सोरो केन् अनुग्रह अनुसार ख्रीष्टजे कादे ङीन ख्रीष्टने क्यूत्देबे उद्धार, ङीनजे पापजे क्षमा प्रेक्क्य, 8परमेश्वरदे ङीनने हम्ब अनुग्रह बेस्से कूम पीन ख्यङ्। 9ङूजे पूरा ज्ञान मेस्ये बुद्धिने परमेश्वरदे रङ्से इच्छा पूरा चीत्दे मेस्ये ख्रीष्टने क्यूत्देबे पूरा चीक्क्य यदेबे यब नङ्सू योजना ङीनने तम्मीदे। 10होर्दे बील पूरा क्यूर जेन ङ्येदे स्वर्ग मेस्ये पृथ्वीने ख्यब साप्ता थोकयूदे ख्रीष्टजे हुकुम मन्दीस्य।
11चेनेयलो साप्ता पोने परमेश्वरजे योजना मेस्ये फैसला क्यूर ख्यङ्। परमेश्वरदे ङीनने ङूजे खुशीदे ख्रीष्टने क्यूत्देबे रङ्से मी चेने सेल्दे। अम्ब योजनाब मीयूङ्ने फैसला चीक्क ख्य। 12ङीन जतीदे ख्रीष्ट फ्याने मीयूङ्ने भर् ये ख्यङ्, परमेश्वरदे रङ्से महिमाजे लागि जै-जै चेने सेल्दे। 13होरप्रने नमयूदेये तम्दम्जे खबर, मुक्तिजे सूगब खबर तदेबे ख्रीष्टने विश्वास चीत्दे। परमेश्वरदे नमयूने कबुल चेब पवित्र आत्माजे छाप पूत्देबे ङूदे नमयूने रङ्से मी बन्देब गवाही पीन्दे। 14परमेश्वरजे रङ्से सम्पत्ति, या ङीनयूदे ङीनजे पूरा उद्धार अम्प्रेत्दासेमे ख्रीष्टजे महिमाजे जै-जै चेजे लागि पवित्र आत्मा ङीनजे हक प्रेबजे बैना ख्यङ्।
धन्यवाद मेस्ये प्रार्थना
15प्रभु येशूप्रे ख्यब नमयूजे विश्वास मेस्ये परमेश्वरजे पवित्र मीयू क्वाप्रेने नमयूजे प्रेमजे बारेने ङैदे तब कारणदेने, 16ङैजे प्रार्थनाने नमयूने ह्वे चीत्देबे नमयूजे लागि येतार्ने धन्यवाद पीन्न ख्यङ्। 17ङ प्रार्थना चीन्नीय, ङीनजे प्रभु येशू ख्रीष्टजे परमेश्वर, महिमाजे पदे नमयूने परमेश्वरजे बारेने था प्रेब बुद्धि मेस्ये तङख्वब आत्मा पीन्स्य। 18ङ अम्बये प्रार्थना चीक्क्य, नमयूजे सेम्दे ङूजे ओथ्याङ् तङ खूस्य, मेस्ये चैजे आशा चीत्देबे ख्रीष्टदे नमयूने क्व ख्य, मेस्ये परमेश्वरजे पवित्र मीयूने ख्रीष्टजे महिमाजे हकजे सम्पत्ति च ख्यङ्, हम्ब नमयूदे स्ये खूस्य। 19होर्दे ङीन विश्वास चेबयूजे लागि ङूजे बेस्से केन् शक्ति च ख्यङ्, यब नमयूदे स्ये खूस्य। हम्ब शक्ति ङूजे केन् शक्तिजे काम ख्यङ्, 20#भजनसंग्रह 110:1हम्ब शक्तिदेने सीयेबदे ख्रीष्टने सोम्बो चीत्दे, होर्दे ङूने स्वर्गजे नेयूने परमेश्वरजे स्येत्तेयोर् टूङ्सेपीन्दे। 21ख्रीष्ट मूने राज चेबयू फ्याने हुकुम चील्लीय। हुकुम चील्लेबयू फ्याने हक चील्लीय, टक्क शक्तियू फ्याजे कूम बोङ् ख्यब ङू क्यूक्क्य होर्दे प्रभुयूजेये प्रभु क्यूक्क्य। ङू अम्ब जूग्ने त्यामे दी, ङ्येदे रब जूग्नेये ख्यब केन् दर्जायू क्वा फ्याजे केन् क्यूक्क्य। 22#भजनसंग्रह 8:6#कलस्सी 1:18परमेश्वरदे साप्ता पोने ख्रीष्टजे तोप् नङ्ने हीम्मीदे, मेस्ये मण्डलीजे लागि ङूनेने साप्ता पोजे ट चीम्मीदे, 23हम्ब मण्डली ख्रीष्टजे ङ्व ख्यङ्। मेस्ये ख्रीष्टब परमेश्वरजे साप्ता पोदेने भरीपूर्न ख्यङ्।
Ghale New Testament © Nepal Bible Society, 2011.