मूल स्यूस्स्यायूजे कामजे किताब 13
13
पावलदे पात्ता खूम प्रचार सुरुचेब
1एन्टिओखियाजे मण्डलीने अगमवक्तायू मेस्ये छ्योम्मेब मीयू, या बारनाबास, काला मीन् ख्यब शिमियोन, कुरेनीजे लुकियस, प्रान्तजे हक चील्लेब हेरोदप्रे छरकब मनेन मेस्ये शाऊल ख्य। 2थमयूदे प्रभुने पूस्तीन मेस्ये बर्त टूनब बीलने पवित्र आत्मादे यदे, “ङैजे लागि बारनाबास मेस्ये शाऊलने हम्ब कामजे लागि अलाक् ची, हम्ब कामजे लागि ङैदे थमयूने क्व ख्यङ्।” 3होर्दे बर्त मेस्ये प्रार्थना चीत्देबे थमयूदे थमयू फ्याने रङ्से ला येत्देबे थमयूने प्रभुजे कामजे लागि कूल्बीदे।
4पवित्र आत्मादे कूल्बेब क्यूत्देबे थमयू सिलुकियाने गीलीदे मेस्ये हैयादे क्यू-जहाजने टदेबे साइप्रसतेले गीलीदे। 5सलामिस सहरने फ्योयीदेबे थमयूदे यहूदीयूजे सभा-कीम्यू नङ्ने गीलीदेबे परमेश्वरजे वचन स्योत्दे। थमयूने तोङ्मेजे लागि यहून्ना थमयूप्रे कूदे ख्य।
6कन्छ्वाब थमयू पुरा टापू ट्वाये-ट्याये पाफोससेमे फ्योरदे, हन्छ्वाब हैयाने थमयूदे लूच्च यहूदी अगमवक्ता, बार-येशू मीन् ख्यब जादू चेब मीत्याने तूदे। 7हम्ब जादू चेब मी नेत्याजे मूख्य सर्गीयस पौलूसप्रे टूङ ख्य। सर्गियस पौलस कूम बुद्धिमान मी ख्य। ङूदे शाऊल मेस्ये बारनाबासने कोदेबे परमेश्वरजे वचन ङ्यीनब सेम् चीत्दे। 8तर जादू चेब मी एलुमासदे (चेनेयलो ग्रीक केने ङूजे मीन्जे अर्थ हम्ब ख्यङ्) सर्गियस पौलसदे चेब विश्वासदे ल्वामेदेबे थमयूप्रे सवाल-जवाफ चीत्दे। 9तर शाऊलने पावलये यख्य, पवित्र आत्मादे फ्यादेबे पावलदे हम्बने लेजे-ले चीत्दे,
10“न शैतानजे च, पूरा धार्मिकताजे शत्रु, छल् मेस्ये दुष्टदे पूरा फ्यानब! न प्रभुजे सोझो लम् नोङब काम चेने अन्क्या? 11जेम्से ले, प्रभुजे दण्ड नेफ्याने पर्दे ख्यङ्, मेस्ये न जेम्से तेदिनसेमे मीयाजे सेर् अन्तङ क्यूत्देबे कन क्यूक्क्य।”
होर्दे हन्छ्वाबने मूक्पदे मेस्ये मून्दूङ्दे ङूने उप्कदे। मेस्ये कोइ मीदे ङूजे ला चूङ्देबे स्योल्मीइ च यदेबे ङू तीछो प्रमेदे। 12प्रभुजे शिक्षाने ख्यब बोङ् तङ्देबे हुकुम चील्लेब केन् मी छाक्के पर्तीदेबे ङूदेये प्रभुने विश्वास चीत्दे।
पिसिदियाजे एन्टिओखियाने
13पावल मेस्ये ङूजे ख्योन्यू पाफोसदे क्यू जहाजने टदेबे पामफिलियाजे पर्गाने फ्योयीदे, मेस्ये यूहन्नाब थमयूप्रे छूर्दीदेबे यरूशलेमने ल्वाइदे। 14तर थमयू पर्गादे योङ्देबे पिसिदियाजे एन्टिओखियाने रदेबे आराम टूङब दिनने सभा-कीम् नङ्ने गीलीदेबे टूङ्दे। 15अम्ब मोशाने पीनेब नियम मेस्ये अगमवक्तायूदे लिख्देब किताब छ्य्वेमेस्ये सभा-कीम्जे मूख्ययूदे पावल मेस्ये बारनाबासने कोदेबे यदे, “या च्योन्यू, नमयूप्रे मीयूजे लागि अर्ती पीनब पो चत्या ख्यङ्लो य।”
16होर्दे पावल मेर्देबे लादे लतप् चीत्देबे यदे, “ओ इस्राएलजे मी मेस्ये परमेश्वरने मन्देब मीयू ङैजे पो ङ्यीनो, 17#प्रस्थान 1:7; प्रस्थान 12:51इस्राएल जातिजे परमेश्वरदे ङीनजे मेमेयूने सेल्देबे मीश्र देशने टूङ्ब थमयूने बेस्से केन् चीम्मीदे, मेस्ये रङ्से शक्तिशाली बोङ्दे थमयूने हम्ब देशदे योन्देबे रेत्दे। 18#गन्ती 14:34; व्यवस्था 1:31मी अन्टोङब चनमन नेने धन्ने: ङ्यील्लङ् वर्ष सेमे ङूदे थमयूजे सूसार चीत्दे। 19#व्यवस्था 7:1; यहोशू 14:1ङूदे कनान देशने जात ङ्यीने नाश चीत्देबे थमयूजे देशजे हक धन्ने: सै स्यी पचास वर्षसेमे थमयूने पीन्दे।
20 #
न्यायकर्ता 2:16; १ शमूएल 3:20 “होर्देङ्येदे अगमवक्ता शमूएलजे पोलोसेमे ङूदे न्याय चेब मीयू पीन्दे। 21#१ शमूएल 8:5; १ शमूएल 10:21होर्देङ्येदे थमयूदे मूरूम् स्यदे, मेस्ये परमेश्वरदे बेन्यामीन खलाकजे कीशजे च शाऊलने ङ्यील्लङ् वर्षसेमे थमयू फ्याने राज्य चील्लीसे पीन्दे। 22#१ शमूएल 13:14; १ शमूएल 16:12; भजनसंग्रह 89:20ङूदे शाऊलने योम्बेङ्येदे दाऊदने थमयूजे मूरूम् बन्दीमीदे। ङूजे बारेने परमेश्वरदे गवाही पीन्देबे यदे, “ङैदे यिशैजे च दाऊद ङैजे सेम्ने मेनब मी प्रेत्दे, ङूदे ङैजे सेम्जे इच्छा क्वाने पूरा चीक्क्य।’
23“रङ्सेजे कबुल पूरा चीत्देबे परमेश्वरदे इस्राएलजे मीयूजे लागि मुक्ति पीनब, येशूने रेत्दे। 24#मर्कूस 1:4; लूका 3:3ङू रयली खूम् बप्तिस्मा पीनब यूहन्ना रदे। ङूदे पश्चात्तापजे बप्तिस्माजे बारेने इस्राएलजे मीयू क्वानेने प्रचार चीत्दे। 25#यूहन्ना 1:20; मत्ती 3:11; मर्कूस 1:7; लूका 3:16; यूहन्ना 1:27यूहन्नादे रङ्से काम चे-बीलने य ख्य, ‘नमयूदे ङ सू मन? ङ हम्ब दी। तर ङै ङ्येदे मीत्या रीय, ङूजे तोप्जे पैङ्गी प्यङब लायकजेये ङ त्वो।’
26“ओ, अब्राहामजे छगूम्-पूर्गूम्, मेस्ये नमयू नङ्ने परमेश्वरने मन्देब च्योन्यू, अम्ब मुक्तिजे खबर परमेश्वरदे ङीन क्वाजे लागि चङ्बे ख्यङ्। 27चेनेयलो यरूशलेमने टूङब मीयू मेस्ये थमयू फ्याने हुकुम चील्लेबयूदे ङूने अन्स्येदेबे मेस्ये आराम टूङब दीनने छ्य्वेब अगमवक्ताजे वचनयू अङ्कोदेबे ङूने सेब दण्डजे आज्ञा पीन्देबे हम्ब वचन पूरा चीत्दे। 28#मत्ती 27:22,23; मर्कूस 15:13,14; लूका 23:21-23; यूहन्ना 19:15सेपर्देब कारण चत्याये अम्प्रेल्लीने थमयूदे ङूने से पर्दीय यदेबे पिलातसप्रे बिन्ती चीत्दे, 29#मत्ती 27:57-61; मर्कूस 15:42-47; लूका 23:50-56; यूहन्ना 19:38-42मेस्ये ङूजे बारेने लिख्दीयेब साप्ता पो पूरा चे-जेनमेस्ये थमयूदे ङूने क्रूसदे मो तल्देबे खङ्सने येत्दे। 30तर परमेश्वरदे ङूने सीयेबदे सोम्बो चीत्दे। 31#मूल स्यूस्स्यायूजे कामजे किताब 1:3गालीलदे ङूप्रे यरूशलेमने रबयूदे कूम दिनसेमे ङू तङ प्रेत्दे, मेस्ये थमयू चूजो इस्राएलजे मीयूजे लागि ङूने तङब गवाही ख्यने ख्यङ्।
32 #
भजनसंग्रह 2:7
“परमेश्वरदे प-मेमेने चेब हम्ब कबुलजे सूगब खबर ङीदे नमयूट्याने रेक्क्य। 33या, केर्बे परमेश्वरदे येशूने सोम्बो चीत्देबे लङ्दे हम्ब पो ङी, थमयूजे छगूम्-पूर्गूम्जे लागि पूरा चीम्मीदे, दोस्रो भजनजे किताबनेये लिख्दीये ख्यङ्,
‘न ङैजे च ख्यङ्, दीनीजे दिनने ङैदे नने जन्मेदे ख्यङ्।’
34 #
यशैया 55:3
ङूदे ख्रीष्टने कलङ्बेये अन्रम्बलाबे चीत्देबे सीयेबदे सोम्बो चेब बारेने येरे यख्यङ्,
‘ङ नमयूने दाऊदने पीनब
पवित्र मेस्ये येतार्ने टूनब असी पीन्क्य।’
35 #
भजनसंग्रह 16:10
चेनेयलो सूजो नेनेये येरे येये ख्यङ्,
‘नदे रङ्से पवित्र मीयूजे ङ्व रम्बसे पीन्स्ये त्वो।’
36चेनेयलो ङूजे रङ्सेजे पुस्ताने परमेश्वरजे योजना अनुसार सेवा चीत्देबे सीयेमेस्ये ङूजे मेमेयूप्रे दाऊद पोप्दे, मेस्ये ङूजे ङ्व रम्की। 37तर सूने परमेश्वरदे सीयेबदे सोम्बो चीत्दे ङूजे ङ्व अन्रम्।
38“अम्ब कारण च्योन्यू, नमयूदे था प्रेस्स्य, अम्ब येशूने क्यूत्देबे पाप-क्षमा क्यूक्क्य यब पो नमयूने बोङ्बे स्योदे ख्यङ्। 39नम विश्वास चेबयू क्वादेने येशूने क्यूत्देबे साप्ता पोयूदे छुटकारा प्रेक्क ख्यङ्, हम्ब छुटकारा मोशाजे नियमने क्यूत्देबे नमयूजे लागि क्यूरने अन्ख्वब पो ते ख्य। 40होरेक्यूत्दे होस्स्यार क्यूरो, नत्र अगमवक्तायूजे किताबने येयेब अम्ब पो नमयूफ्याने रीय:
41 #
हबकूक 1:5
‘मीजे न प्वेयू, ले, मेस्ये हार्मन्दी, होर्दे नाश क्यूप्पस्य, चेनेयलो नमयूजे सेमेने ङ कामत्या चीक्क्य, येर कामजे बारेने कोइदे स्योल्लीने नमयूदे कलङ्बेये विश्वास चीस्स्ये त्वो’।”
42पावल मेस्ये बारनाबास सभा-कीम्दे योङ्देबे प्र मेल्नूब त्याब आराम टूङब दिननेये अम्ब पो स्योम्मी यदेबे मीयूदे थमयूने बिन्ती चीत्दे। 43सभा जेङ्कङ्येदे कूम यहूदीयू मेस्ये यहूदी धर्म मन्देब मीयू पावल मेस्ये बारनाबासजे ङ्ये-ङ्ये रदे, मेस्ये थमयूदे थमयूप्रे बात् सेत्देबे येतार्ने परमेश्वरजे अनुग्रहने टूनू यदेबे बिन्ती चीत्दे।
44त्याब आराम टूङब दिनने परमेश्वरजे वचन ङ्यीनने सहरदे मीयू क्वाने हूर्रदे। 45यहूदीयूदे मीयूजे हुल तङ्देबे पावल मेस्ये बारनाबास फ्याने म्यातब चेमेदे, मेस्ये पावलदे यब पोजे विरुद्ध चीत्देबे पावलजे न पूत्दे।
46तर पावल मेस्ये बारनाबासदे सेम् केन् चीत्देबे यदे, “परमेश्वरजे वचन पात्ता खूम् नमयूने स्य्वे पर्दे ख्य। तर नमयू अम्ब पो ङ्यीन्तीङ् अन्र। नमयूदे अम्बने अम्मेन्दीदेबे रङ्सेदेने कलङ्बेये अन्सीबब जीयाजे लागि लायकजे त्वब ठर्दीपीदे। होरेक्यूत्देबे जेम्से ङी यहूदी तेब मीयूट्याने प्रीय।
47 #
यशैया 42:6; 49:6 चेनेयलो प्रभुदे ङीने येरे ची यदेबे आज्ञा पीन ख्यङ्,
‘पृथ्वीजे का-मुलुकने मुक्तिजे खबर स्य्वेने ङैदे नने यहूदी तेबयूजे लागि ओथ्याङ् चेने सेल ख्यङ्’।”
48कन्छ्वाब यहूदी ते मीयूदे अम्ब पो तदे, थमयू सूग्देबे परमेश्वरजे वचनजे सार्या चीत्दे, मेस्ये कलङ्बेये अन्सीबब जीयाजे लागि खूम्ने परमेश्वरदे सेलेब मीयू क्वादेने विश्वास चीत्दे।
49प्रभुजे वचन का-मुलुकने फ्याइ। 50तर यहूदीयूदे परमेश्वरने मन्देब, गेसेन् प्रेब मदीयू मेस्ये सहरजे मी केन्-केन्युने पावल मेस्ये बारनाबासजे विरुद्धने उक्सीतीदे, होर्दे पावल प्रे बारनाबासने रङ्से नेजे सेन् चदेबे फीने ताल्पीदे। 51#मत्ती 10:14; मर्कूस 6:11; लूका 9:5; 10:11तर थमयूदे रङ्से तोप्जे धूलो थमयूजे विरुद्धने फ्रूप्पीदेबे आइकोनियनने रदे। 52स्यूस्स्यायू आनन्द मेस्ये पवित्र आत्मादे भरीपूर्ण क्यूत्दे।
Ghale New Testament © Nepal Bible Society, 2011.