Mogopolo wa Mafoko a a Molemo a ga Esera预览

Tiragatso

Ka gongwe o ntse o ipotsa gore a Modimo o tlaa diragatsa ditsholofetso tsa One mo botshelong jwa gago, le gore o tlaa di diragatsa leng, kgotsa jang. Kgotsa o itemogela bothata jwa go bona gore o ka ungwa jang tse di molemo mo setlheng sa gago sa ga jaana kgotsa mo maemong a gago a ga jaana. Buka ya ga Esera e re neela kitso ya gore Modimo o diragatsa jang ditsholofetso tsa One ka boikanyego, sengwe se se re maatlafatsang jaaka badumedi go ungwa tse di molemo mo go sengwe le sengwe se Modimo o re bileditseng go nna sone le se o re bileditseng go se dira. Mo leanong leno la puiso la malatsi a le mararo, re tlaa leba ditlhogo tsa tiragatso, boikanyego, le go ungwa tse di molemo. Re tlaa sekaseka le gore seabe sa botlhokwa sa ga Esera sa mo nakong e e fetileng se re kaela jang go Jesu.

Sa ntlha, mo setoring sa ga Esera, re bona ka tsela e Modimo o diragatsang tsholofetso ya Oneya go pholosa batho ba One mo botshwarong, o ba busetsa kwa lefatsheng la bone. Botshwaro ga bo a tshwanela go ba makatsa, gonne Modimo o ba kgalemile gangwe le gape, ka baporofeti, gore fa ba tswelela go sa O reetse, poelo ya seo e tlaa nna botshwaro. Se se makatsang, le mororo go ne go na le maleo a batho le dikgalemo tsa Modimo, O ne a ba solofeditse gape gore kwa bofelong O tlaa ba busetsa kwa Jerusalema go aga motsemogolo, tempele, le morafe wa bone. Kwa tshimologong ya buka ya gagwe, Esera o re bolelela gore Morena o diragaditse seporofeto se O se neetseng ka Jeremia. Jeremia o ne a kaile gore Modimo o tlaa diragatsa tsholofetso ya One e e siameng mo bathong ba One morago ga dingwaga tse masomeasupa tsa botshwaro kwa Babilone. Modimo o tlhotlheletsa pelo ya ga Kurose go diragatsa kgakgamatso eno ya pholoso le tiragatso ya tsholofetso ya One.

Ditiragalo tse di diregang ka nako ya botshelo jwa ga Esera di bonetse pele se Modimo o se re diretseng ka Jesu. Fa re boela mo go Genesise 3, tlhopho ya ga Atame le Efa e e swabisang e dirile gore go nne le botshwaro jwa batho botlhe. Re tsetswe re le mo botshwarong jwa boleo, re kgaogantswe le Modimo. Jaaka Moiseraele, Esera le ene o ne a le mo botshwarong, mme Morena a mo dirisa go busetsa batho ba One kwa lefatsheng la bone. Fela jalo, Jesu o tlile jaaka mongwe wa rona, a tshela mo gare ga rona, mme ka jalo a re isa kwa kgololesegong. Mo lekwalong la gagwe go Bafilipi, Paulo o tlhagisa gore nako ya ga Jesu mo lefatsheng e ka bo e dirile jang gore A ikutlwe jaaka mofuta wa botshwaro.

Fa re tsena mo leetong mo bukeng ya ga Esera mo malatsing a le mmalwa a a latelang, e kete o ka bona Jesu mo setoring seno sa bogologolo. E kete o ka rotloetsega gore mafoko a Gagwe a a molemo ke maatla a Modimo, a a dirang gore o kgone le gore o nne le maatla a go ungwa tse di molemo gonne o batla go itse Modimo le go dira gore O itsege. Re direla Modimo yo o diragatsang kgolagano le yo o diragatsang ditsholofetso tsa One ka gale. Ga go kgathalesege gore ke dikgoreletsi dife tse o lebaneng le tsone e bile ga go kgathalesege gore a ke mofuta wa botshwaro jwa dikamano, ditšhelete, kgotsa jwa gago ka namana jo o iphitlhelang mo go jone, mafoko a a molemo a ga Jesu Keresete – a a bontshiwang sentle mo setoring sa ga Esera – ke gore Modimo o tlaa diragatsa sengwe le sengwe se O se go solofeditseng.