Solid Joys Shqip预览

Nëse Ai thërret, Ai mban

“I cili edhe do t’ju vërtetojë deri në fund, që të jeni të paqortueshëm në ditën e Zotit tonë Jezu Krisht. Besnik është Perëndia nga i cili u thirrët në bashkësinë e Birit të tij Jezu Krishtit, Zotit tonë.” (1 e Korintasve 1:8-9)

Ku po mbështetesh për t’u siguruar se besimi yt do të zgjasë deri në ardhjen e Jezusit?

Pyetja nuk është: A beson në sigurinë e përjetshme? Pyetja është: Si mbahemi të sigurt?

A qëndron përfundimisht këmbëngulja e besimit tonë në besueshmërinë e vendosmërisë tonë? Apo qëndron përfundimisht në punën e Perëndisë për të na “mbajtur në besim”?

Shkrimi mbart një të vërtetë të madhe e të mrekullueshme që Perëndia është besnik dhe do t’i mbajë përgjithmonë ata që Ai ka thirrur. Kemi bindjen se jemi përjetësisht të sigurt, sepse Perëndia do të bëjë gjithçka që është e nevojshme për të “na mbajtur në besim”!

Siguria e përjetësisë është po aq e madhe sa siguria që Perëndia do të na mbajë tani në besim. Kjo siguri është vërtet e madhe për të gjithë ata që Perëndia i ka thirrur.

Ka të paktën tre pasazhe, që sjellin bashkë thirrjen e Perëndisë dhe ruajtjen nga Perëndia.

1. “I cili edhe do t’ju vërtetojë (ruajë) deri në fund, që të jeni të paqortueshëm në ditën e Zotit tonë Jezu Krisht. Besnik është Perëndia nga i cili u thirrët në bashkësinë e Birit të tij Jezu Krishtit, Zotit tonë” (1 e Korintasve 1:8-9).
2. “Por ai vetë, Perëndia i paqes, ju shenjtëroftë tërësisht; dhe gjithë fryma juaj, shpirt e trup, të ruhet pa të metë për ardhjen e Zotit tonë Jezu Krisht. Besnik është ai që ju thërret, i cili edhe do ta bëjë” (1 e Thesalonikasve 5:23-24).
3. “Juda, shërbëtor i Jezu Krishtit dhe vëlla i Jakobit, të thirrurve, që u shenjtëruan në Perëndinë Atë dhe të mbajtur në Jezu Krishtin: u shtoftë mëshirë juve, paqe dhe dashuri” (Juda 1:1, 2) (Shih të njëjtin realitet te Romakëve 8:30; Filipianëve 1:6; 1 e Pjetrit 1:5 dhe Juda 24).

“Besnikëria” e Perëndisë premton se Ai do t’i mbajë përgjithmonë të sigurt të gjithë ata që Ai i ka thirrur.