Kom, Here Jesus, Kom预览

Lees: 1 Tessalonisense 4:13–18

SOAP: 1 Tessalonisense 4:16–18

Wanneer die bevel gegee word en die stem van die aartsengel en die trompet van God weerklink, sal die Here self uit die hemel neerdaal. Allereers sal dié wat in Christus gesterf het, uit die dood opstaan; daarna sal ons wat nog lewe, saam met hulle op die wolke weggevoer word, die lug in, die Here tegemoet. En so sal ons altyd by die Here wees. Troos mekaar dan met hierdie woorde.

Oordenking

Watter wonderlike hoop het ons nie in die toekomstige wederkoms van ons Here nie. Alhoewel ons nie die presiese dag of uur weet nie, het ons die onwrikbare belofte dat Hy sal terugkeer soos ons ons oë op die toekoms rig. Ons sien in ons teksverse vandag dat wanneer Christus terugkeer, die Christene wat reeds gesterf het, eerste opgewek sal word. Dan sal dié wat leef met Hom in die wolke verenig word wanneer Hy terugkeer.

Een van my gunsteling waarhede uit hierdie Skrifgedeelte is die verklaarde feit dat ons, van daardie oomblik af, vir ewig by Jesus sal wees. Wat ‘n bemoedigende belofte!

Hierdie ongelooflike belofte van Christus se wederkoms help ons om te volhard in die beproewings wat ons verduur terwyl ons geduldig wag op sy wederkoms. Dit vertroos ook ons harte, wanneer sommige van ons treur oor die heengaan van ‘n geliefde wat ‘n gelowige in Christus was. Ons klou aan die belofte dat ons eendag weer met hulle herenig sal word. Ons droefheid is nie vir ewig nie; dit is net tydelik.

Soos Paulus op sy dag die lede van die kerk in Tessalonika bemoedig het, moet ons ook net so maak en diegene om ons bemoedig met hierdie waarheid. Jesus gaan terugkeer, en wanneer Hy terugkeer, sal hierdie tydelike worstelinge tot ‘n einde kom. Dié van ons wat in Christus is, het soveel om na uit te sien. Ons beste dae lê nog voor. Gebruik intussen hierdie waarheid om Christene wat jy ken en wat moontlik baie worstelinge ervaar, te bemoedig.

Gebed

Liewe Here, help my om ‘n bemoediging vir die mense om my te wees. Help my om ander op te bou en hul harte te bemoedig soos ons na u wederkoms smag. Help my om my fokus hemelwaarts te rig en aktief te werk om u evangelie te bevorder in die lewens van diegene wat U nog nie ken nie. Help my om in U te bly terwyl ek gretig wag vir die dag wanneer ek vir ewig by U sal wees. Tot daardie dag bid ek, kom, Here Jesus, kom. Amen.