Romans 5
5
1Arhan anai nga ga'a a ndohi nzura'a te ncè-a-ndav, nga ngots gumi Zhiklè, te Bi nga Yèsu Kristi. 2Te Yèsu, a ncè-a-ndav, nga ngots civèƌ pombi haha. Ngawuffokoya, a nga zhèr n'njèl Zhiklè te ndav, man a di a shkè, man Zhiklè a da va nga.
3A va za'a: Ngawuffokoya a gèƌ skwi mwuƌitpa, te man nga suna, skwi mwuƌitpa a gi aman nga zhèr skwia dai. 4A gèƌ man nga zhèr skwia dai, nga nzi tara'a; a géƌ man nga nzi tara'a, nga zhèrè te ndav. 5Nzhèrè te ndav a pa nga hori a di azɓai, te man mwoy-ndo Zhiklè a zhè te ndav nga te Mèzhèɓ nenga'a nkezla'a man a mva nga.
6Aman Kristi a m'mets na a géƋ nga, te va man wuƋi nga az di ɓai; tiƋè sama ma, Kristi a m'mets na a géƋ ndohi man wuƋi ta azɓai. 7A géƋ ndo nzura'a, ndo a woya a nvi nshèffè azɓai. A géƋ ndo man amba, ar a slaha a mvi nshèffè genè. 8Aman Zhiklè a ngreda mwoy-ndo nenga'a a sam nga, te man Kristi a m'mets na a géƋ nga, aman nga ndohi malihi dai.
9Holhola'a a da ɓir nga a sam ndzoan Zhiklè, te man antanta nga ga'a a ndohi nzura'a te pombaz nenga'a. 10Aman Zhiklè a m'menda gumi a hai te m'metsi kra nenga'a, te va man nga mayamhi Zhiklè dai, holhola'a antanta, man gèƋ nga mpela ma, nga da mbel nga te nshèffè nenga'a. 11Aman klèng di ka ɓai. Aman nga wuffè a géƋ Zhiklè te Bi nga Yèsu Kristi, te nenga'a nga ngots skwi m'mindè gumi a hai.
12Gar haha ara man a géƋ ndo staƋ malai a mshkè a herkeda, a m'metsai a mshkè a géƌ malai, m'metsai a zlézlèmè a géƌ ndohi tèlèba, a géƋ man ta tèlèba ta gu malai. 13Aman malai a zhè t'herkeda, ga ma kita Zhiklè a shkè. Aman a sam man ma kita Zhiklè azɓai, ta fa na gèƋ a mali azɓai. 14M'metsai a ngu bai, a hün te Adam, ha nda na ma a Moise, a géƋ ndohi tèlèba, a géƋ tenga'a ba, man ta ga mali lèmèlèmè ara Adam ɓai. Adam nara ndo man a di a shkè dai.
15Aman pombi man Zhiklè a mvau, a lèmdè a mali azɓai. A géƋ mali ndo staƋ, ndohi kumba ta bazl ta; aman pombi Zhiklé a zlézlème holhola'a a géƌ pombi ndo staƌ, Yèsu Kristi, man ndohi kumba ta ngotso.
16Mba skwi man Zhiklè a vau, a géƋ skwi ngedassa'a a géƋ mali ndo staƋ. Aman kita mali ndo staƋ a Ƌè a sam mphomda'a. Aman pombai a takaha ta ndohi malihi kumba, a ta ndi a ndohi nzura'a. 17Aman a géƋ mali ndo staƋ, m'metsi a gi bai, mba bi tenga'a man ta ngècè pombi mbia'a te nshèffè ta, a ngizura Zhiklè, a géƋ ndo staƋ, Yèsu Kristi.
18Ara man mali ndo staƋ a de ta ndohi tèlèba a sam mphomda'a, ngi skwi nzura'a ndo staƌ ba, ngizura'a man a vi nshèffè a ndohi tèlèba. 19Ara man a gèƌ ndo staƋ, man a gu mèdègèƋ, ndohi kumba taga'a a ndohi malihai, a gèƋ ndo staƋ, man a fa na gèƋ, ndohi kumba ta ngècè ngizura'a.
20Aman ma kita Zhiklè a gu aman malai a ngredè auda holhola'a. A sam man malai n'ngreda auda holhola'a, pombi ba n'ngreda a fena'a. 21Aman lèmèlèmè ara malai a gu bai a m'metsai, lèmèlèmè pombi ba a da gi bai a ngizura'a a nshèffè a mèdèp, te Yèsu Kristi, Bi nga.
Mofa New Testament © The Bible Society of Cameroun, 1989