Jude 1
1
1Jude, ɓèl Yèsu Kristi, kramam Jacques, a sam ndohi man Zhiklè a baba ta, man Zhiklè, Bab nga, a woy ta, a Yèsu Kristi a ɓer ta. 2Kin da su Zhiklè te va kumba! A gumi a mwoy-ndo a ndav da zhè kumba a sam kinè! 3Kinè dalahimam ga! Nshèlèkura'a i huro ara man i windè kinè ma a géƌ skwi m'mbel nga man nga a nda kinè, nga ngotso. Aman te deɓa'a i gaƌa, sèi i bid kinè te ƌèlèwèr ga, aman kin gi var a kin nza na a deɓa a ncèand'av man Zhiklè a mva ta ndohi na, sak staƌ a mèdèp.
4Ndohi faƌkata ta wuca kinè va, kita tenga'a mwindèa n'nzi a zhè aranta ma: tenga'a ndohi man ta woy Zhiklè ɓai, ta ngwode pombi Zhiklè nga a ntétékè tenga'a, a ta cèkèlma a géƌ Bi nga Yésu Kristi, ndo ncè nga ma staƌgenè. 5Kin sun tèlèba ma: a i woy a i hodko kinè ma a gèƌ: Bi Zhiklè man nshèlèkura'a a takaha ta ndohi Israel a ta shkè auda te kokwar Egypte, a mbazl ta pats ngiƌè te deɓa'a, a gèƌ man ta ca a ndav ɓai.
6Vahur golahi Zhiklè ba; aman ta ɓera maya man ta ngots te ri Zhiklè ɓai, a ta jèkeda sam nzi ta, Zhiklè a ndzaw ta te ruva a cèlèlèu a mèdèp, ba pats kita mbia'a. 7Vahur SoƋome a Gomorrhe a kokwarhi man a tsagia'a, man ta gu mphömè lèmèlèmè ara golahi Zhiklè, a ta dzodzor ntètèkè tsaƌ tsaƌ t'hai. Ta fa ta kita a gèƌ te vogwa a mèdèp, a ndohi tèlèba ta slaha a ta hèrè'a.
8Lèmèlèmè tenga'a man ta nza herzlawa'a, man ta lizha va ta, ta woy Zhiklè a bi ta ɓai, a ta dérƋè skwi Zhiklè n'nzala'a. 9Michel, bigol Zhiklè, man ta bozl va a madzagai a géƋ nckondo Moise, a woya a mphomde madzagi ɓai, a ngaƋa: Bi Zhiklè da ga ka kita a gèƋ!
10Aman ndohi haha ta ngwèshè a skwi man ta sun ɓai. Arskwi man ta slaha a ta suna a zhè; aman ta ara skwi dakhai, man ta sun skwi ɓai, ta gedassa va ta a ri ta. 11Wobau a géƋ tenga'a! Ta beza a civèƋ Cain, a ta gu mali ara Balaam a géƋ sulai, a ta bazl ta lèmèlèmè ara ndohi nrubi Coré.
12Tenga'a skwi horai, man ta gi hori ngi golahwaƌ azɓai, man ta ɓicè va a sam skwi n'ndai, a ta war va ta genè. Tenga'a ta ara vanai man iyam a te pa ɓai, man kozlar a patsedaussa; wofhi man ta yi azɓai, ko tiƌè sama ma, ta bazl ta, a zluzlor t'uda; 13ngid va iyam mbia'a, man a hubatka skwi hori tenga'a man ta gau, auda; bantihai nian ta wush ta hai, man sam n'nzi ta te ruva ntéƌèƌika'a a mèdèp. 14Enoch ba, ndo matsaraƌa'a te verzi Adam, a nhodko ma a géƌ tenga'a, a ngaƋa:
I rka Bi Zhiklè a shkè a nda ndohi nkezla'a gozhèm gozhèm kumba, 15aman a gi kita a géƋ ndohi tèlèba, a ngra ta mali a ndohi tèlèba jnan ta woy civèƋ Zhiklè ɓai, a ngra ta ndérƋè ma tèlèba man ndohi malihai, man ta woy civèƋ Zhiklè ɓai, ta durƋo Zhiklè a vna.
16Tengahi ndohi man ko skwi mèmè ambaba ta ɓai, ta kuƋi a va, a ta jèjèr ntétékè tenga'a. Ta gèƋ ma nfi va, a ta shibèndè ndo, aman ta ngècè skwai.
17Aman kinè, dalahimam ga, vahur ma man ndohi sak Bi nga Yèsu Kristi ta gaƋa kinè hala'a. 18Aman ta gaƌa kinè, man ndul ndul ndikèma skwi tèlèba, ndohi ndérƋè ndo ta zhè, man ta jèjèr ntétékè te ndav tenga'a, man ambaba Zhiklè ɓai.
19Tenga'a ta poko ta gèƋ auda a ta kezla ndohai. Ta hér skwi herkeda. Ta ngatsa Mèzhèɓ Zhiklè ɓai. 20Aman kinè, dalahimam ga, vagra a ma ma te ncè-a-ndav nkezla'a a vava, vatsu ri te Mèzhèɓ Zhiklè nkezla'a, 21vaɓür va kinè te mwoy-ndo Zhiklè, vozhoro aman Bi nga Yèsu Kristi a va kinè nshèffè a mèdèp, a géƋ man nga sia te va.
22Ndohi man ta pi gèƋ cèw da se kinè te va; 23vangazlka ta auda te vogwa, vambel ta! Tengahi ngiƋè da se kinè te va, aman vagu zlau; vagu shèwa a ntétékè tenga'a man a lizhè ndav ta. 24A nenga'a, man a slaha a mɓer kinè, aman kin kèlèhi a mali azɓai, aman a zlatsede kinè a sam di na a n'njèl na, jèlèlè'a, a mwuffè, 25a Zhiklè staƋgenè man a mbel nga te Yèsu Kristi, Bi nga, n'njèlè nslébèrdè, wuƋai a wuƋibai, te nhinkaƋ na, antanta, a ndè a ma ma a mèdèp. Amen.
Mofa New Testament © The Bible Society of Cameroun, 1989