Hebrews 12
12
1Gar haha nga ba, aman ndohi malwuƋihi kumba aranta ta tèuda nga a pa, ara dzarai, ngojokokoy skwi tèlèba man a nzala nga, a mali man a gse nga hi pèc pècèk. Ngomonokoy ndav, ngohokoy a ma! 2Ngopokoy di a Yèsu, ndo nhinè a ndo nrufa ncè-a-ndav; nenga'a man a géƋ mwuffè man a zhè a ma nenga'a, a nco wof ngézlèl na, n'nga hori ɓai, te deɓa'a a n'nzahai a civèƋ ri mandi sam n'nzi bi Zhiklè.
3Vahur nenga'a man a nco ndèvèƋ ma a sam ndohi malihai a gèƋ na, ntulè da keƋ kinè ɓai, kin ngez ɓai! 4Kin ga var a géƌ mali kinè, a pombaz a nshkè auda te va kinè di ɓai. 5A ma man a bid kinè ara wudahi na a vna, mpca kinè a gèƋ, man a gaƋa:
Kra ga, aman Bi Zhiklè a ngez ka dai, ka kwola ɓai; aman nenga'a a ndah ka, ntulè da keƋ ka ɓai. 6Aman ndo man ambaba Bi Zhiklè, Zhiklè a ngézhè dai. A ngatsa na maya a ndzoan, a ndo staƋ staƋ tèlèba man a fu a kra na.
7Zhiklè a gre kinè ara wudahi nenga'a; aman sèi kin si matakwan. Kra man bab na a ndèha'a azɓai, ngiƋè a zhi Ƌè? 8Aman agassa a ngez kinè azɓai, ara ndohi ngiƌè tèlè, ar kinè ndohi mbrokihai, wudahi ngwi ka ɓai. 9Ara man nga ngots bab nyeka nga, man a ndah nga, a nga gu zlau nenga'a, nga mèndè gèƌ a hai holhola'a a sam Bab Zhiklè azɓi ƌè, a nga nzi a nshèffè?
10Tengahi ta ngez nga m'mèn kètè, ara man ta hur amba. Aman nenga'a haha a géƋ skwi man ambaba nga zura'a, aman nga ngècè nshèffè nkezla'a ara nenga'a ba. 11A pats man ta ngez nga, a wuffède nga azɓai, nga kuƌai. Aman te deɓa'a, ndohi man ta slebau, a ta shkè auda te pa ma, ta nzi a nshèffè a gumai te ngizura'a. 12Gar haha vazlatseda rihi kinè man ta ngeza, vasala gurmbèzhi kinè man ntulè a keƋ ta. 13Vodo a civèƋ sara'a, aman ko ndo vedal a kèlèhi azɓai, aman a mbel na.
14Vawoy gumi a nda ndohi tèlèba, vawoy nshèffè nkezla'a. Ndo man nshèffè na nkezle ɓai, a slaha a nrka Bi Zhiklè ɓai. 15Vagu maya a géƌ kinè, ko ndo staƌ da jèkeda pombi Zhiklè ɓai, da gu ara zluzlor wof nƌuzlekzleka'a, man a fcè, man a gedèshè gumai, a dzakaɓ kinè, a nlizhè mpi ndohi Zhiklè ɓai. 16Ndo da gu ara Esau ɓai, ndo m'men na a deɓa, ndo mphömè, man a géƌ skwi n'ndi sak staƌgenè a mpreda n'ndi gi tsuvom nenga'a a ma, a nkwola skwi nkezla'a.
17Kin suna, te deɓa'a a woya a ngècè mpshè ma bab na, aman a n'ngatsa asaɓai, a slaha a m'mindè a deɓa ɓai, ko a woya'a a kuƌa a dai. 18Aman kin da ɓai a sam za man ndo a slaha a nlama na a rai, man vogwa te pa, a sam vani a ruva a ndombozlor, 19a sam ntsi tolom, a sam nhèzlèwè, man ndohi ncinè'a a fen ta a wuƌai. 20Ta slaha a ta cinè ɓai, a ndèma ta zlembaƌ.
Ko skwi dak man a lama na za, sèi ta keƋa'a a kwa.
21A skwi man a gudko va a dai, mwuƋitpa holhola'a, ba Moise ba a ngaƋa:
I gi zlau, a i gudzai.
22Aman kin shkè a sam za Sion, a sam kokwar Bi-Zhiklè man a zhè a nshèffè, a sam Jérusalem te zhiklè te géƌé'a, a sam golahi Zhiklè gozhèm gozhèm kumba, 23a sam mɓicèva tsuvomhia'a, man ta winde ta te zhiklè te géƌè'a,
a sam Bi Zhiklè, man a gi kita a géƌ ndohi tèlèba, a sam mèzhèɓhi ndohi nzura'a, n'nga'a jèlèlè'a, 24a sam Yèsu, man ta bezda na nderzlèma mɓua'a a rai, a sam pombaz man nguca a pa, man a gèƋè amba holhola'a, a fena pombaz Abel. 25Vagu maya, kin kwola ma nenga'a man a gèƋè ɓai! Aman tenga'a man ta kwola nenga'a, man a goƋ t'herkeda, ta mbel ta ɓai, holhola'a aman nga kwola nenga'a man a gèƋè te zhiklè. 26A matsa da'ai nenga'a a ngudzeda herkeda. Aman antanta a mpasla nga rai, a ngaƋa:
I woy a i gidè za'a, herkeda genè ka ɓai, aman giƋfèk ba.
27Ma 'za'a' haha a ngreda nga, ara man skwi man a gidè'a a di a ngwode na, te man a n'nga'a man a nzi kètè genè. Sèi skwi man a gidè va azɓai, a nzi dai. 28Gar haha, aman nga ngècè kokwar-Bi man a gidè va azɓai, ngoshüdokoy gèƋ, ngogokoy mizlinè Zhiklè, ara man ambaba, a nslébèrdè'a a zlau. 29Aman Zhiklè nga, vogwa man a ndi skwi tèlèba.
Mofa New Testament © The Bible Society of Cameroun, 1989