Colossians 3
3
1Aman kin slambaƌkaƌauda a nda Yèsu Kristi, vawoy skwi nte géƌè'a, man Yèsu Kristi a zhè, a nza a pa te civèƌ ri mandi Zhiklè! 2Vahur skwi nte géƌè'a, skwi herkeda ka ɓai. 3Aman kin mets kinè ma, nshèffè kinè n'ngheda te Kristi, te Bi Zhiklè. 4Aman Kristi, nshèffè nga; aman a da gudko va a dai, kinè ba kin da gudko va a dai a nda nenga'a, a n'njèlè.
5Gar haha vakeƋa na gèƋ a hai a skwi herkeda haha: mphömè, skwi nlizhè'a, mi skwi ambaɓia'a, ntétékè, ndo man a wèr va na genè (nara m'mbèh skwai); 6a géƌ skwi sa, ndzoan Zhiklè a shkè a géƌ ndohi mèdègèƌ. 7Kine ba kin gu arsa, aman kin nza te mali hala'a dai. 8Aman antanta vajèkeda skwi haha: ngi ndav, ndzoan, shèwa, ndérƌe ndo, ngèƌè ma horai.
9Kin tsokol ma a va kinè ɓai! Aman kin suƌko skwi hala'a a mizlinè nenga'a auda a va ma. 10A kin feda ndo mɓua'a a va, man a n'nge kinè a ndo mɓua'a, man a sun skwi Zhiklè tèlèba. 11Gar haha ndo Grec, ndo Juif, ndo man ngwon n'ngela, ndo man ngwon n'ngel ɓai, ndo barbare, ndo Scythe, ɓèlè, kra ngwi ka ɓai, aman Kristi, tèlèba, te ndohi tèlèba.
12Gar haha kin ndohi man Zhiklè a mpar ta, ndohi nkezla'a, ndohi man a woy ta, vafeda skwi haha a va: nsi ndo te va, ndav nlüɓekwa'a, m'mènde gèƋ a hai, ndav amba, nzhèr skwia dai. 13Valèɓèslè a va kinè, ngiƋè a sam ngiƋè, vapra malai, ngiƋè a ngiƋè, man ma a zhè te ndev kinè. Lèmèlèmè ara Bi Zhiklè a mpra kinè malai, vagu lèmèlèmè. 14A géƋ skwi tèlèba, vafeda mwoy-ndo a va, nenga'a a humdè kinè a njèlèlè'a.
15Gumi Kristi da gu bi te ndav kinè; Zhiklè a mbaba kinè a pa, te va staƋ. Vashüd gèƋ! 16Vagu aman ma Kristi da zhè te ndav kinè a vata. Vaslebau a va kinè, vabüdo va kinè, a maya tsaƋ tsaƋ, a Psaumes a dimèsh, a dimèsh Mèzhèɓ, a nshid gèƋ a Zhiklè.
17Skwi tèlèba man kin gia'a, ko a ma, ko a mizlinè, vagu tèlèba a nzlembaƌ Bai Yèsu Kristi. Vashüd gèƌ a Bab Zhiklè te nenga'a! 18Kinè ngwozai, vafu gèƋ a ma bakihi kinè, ara man ambaba Bi Zhiklè! 19Kinè ngurhai, vawoy ngwozi kinè a ndav kinè, kin gu ndav tengtenga'a a géƋ ta ɓai! 20Kinè wudahai, vatsena ma bab a mam kinè te skwi tèlèba; aman kin gi arsa, ambaba Bi Zhiklè. 21Kinè babhai, kin poko ta gèƋ auda a wudahi ɓai, kin mbeƋama ta ndav ɓai!
22Kinè ɓèlèlihai, vatsena ma babgihi kinè te skwi tèlèba. Vagu mizlinè a ndav amba, a sam di ndo genè ka ɓai, vagu te zlau Bi Zhiklè, ara man ambaba ta ndohi genè ka ɓai. 23Skwi tèlèba man kin gia'a, vagau a ndav tèlèba, ara man a Bi Zhiklè, a ndohi genè ka ɓai. 24Vasuna, kin ngècè skwi ntulè a sam Bi Zhiklè, ara skwi n'ndi gai. Vagu mizlinè Bi Yèsu Kristi! 25Ndo man a gi zura'a azɓai, a ngècè skwi lèmèlèmè ara man a gau. Zhiklè a pèr ndo mpèrè azɓai.
Mofa New Testament © The Bible Society of Cameroun, 1989