Mateo 20
20
Minkaykunaman tinkusiypa Jesús yachasishqan
1<<Tayta Dios mandaykashqan imano kashqantapis kanan tantiyasiyäshayki. Juk runashi üva chakrancho arusinanpaq tuta tutala minkay ashiq aywanaq. 2Minkayta tarirshi juk jornalta pägananpaq parlaskir üva chakranman aruq kachanaq.
3<<Saypita tuta malway hörano pläzapa yapay aywarshi runakuna aruyniynaq puriykäyaqta tarinaq. 4Sayshi ninaq: <Qamkunapis üva chakräman aruq aywayay. Pägayäshaykimi>. Sayno niptinshi paykunapis aywayänaq.
5<<Pulan junaqpis y tardi malwayna intipis yapayshi minkay ashiq aywanaq. Tariykurshi wakin kaqtanöla chakranman kachanaq.
6<<Saypita minkaykuna yarquyänanpaq juk hörano pishiykaptinshi yapay aywar runakuna aruyniynaq kaykäyaqta tarinaq. Sayshi ninaq: <¿Imanirtaq qoyati imatapis mana ruraypa kaykäyanki?>
7<<Sayno niptinshi niyänaq: <Manami pipis minkakayämashsu, taytay>.
<<Sayshi ninaq: <Qamkunapis chakräman aruq aywayay>.
8<<Pasa sakaykaptinnashi capatazninta ninaq: <Aruqkunata qayaykur lapanta juk jornalta pägay.#Lev. 19.13; Deut. 24.15. Tardiraq yaykuqkunata puntata päganki y tutapita aruqkunata qepata päganki>. 9Say nishqannölashi tardiraq aruq yaykuqkunata juk jornal complëtuta päganaq. 10Sayta rikarshi tutapita aruqkunaqa shayämunaq mas askata chaskiyänanpaq kayashqanta yarpar. Sayno yarparpis juk jornaltashi paykunapis chaskiyänaq. 11Sayshi chakrayuqta reclamar 12niyänaq: <Tardiraq yaykamuqkuna juk hörala aruykäyaptinqa ¿imanirtaq noqakunataqa sayjina shanaycho aruykäyaptï paykunatanöla pägaykäyämanki?>
13<<Sayno niyaptinshi chakrayuq runa ninaq: <Amïgu, parlashqansinömi pägaykä. Manami engañaykäsu. 14Päguykikunata chaskiykarnaqa aywakuyayna. Kikï munarmi tardi yaykamuqkunatapis qamkunatano pägaykä. 15Qamkuna ¿ima cuentayuqtaq kayanki aykata pägaptïpis? ¿Ali runa kashqäpitaku ajanäyanki?> >>
16Sayno wilaparkurmi Jesús nirqan: <<Saynölami qepa kaqkuna puntacho kayanqa. Punta kaqkunanami qepacho kayanqa.#20.16 Say nishqanqa kaynömi nikan: Say arupakuyman punta yaykuqwan qepa yaykuqpis iwal päguta chaskishqannömi Diospa wilakuyninta puntata chaskikuqkuna y qepataraq chaskikuqkunapis gloriaman chäyanqa. [Askaqta qayarpis walkälatami Tayta Dios akranqa]>>.#Mat. 19.30; Mar. 10.31; Luc. 13.30.
Wanusiyänanpaq kashqanta Jesús yapay wilakushqan
Marcos 10.32-34; Lucas 18.31-34
17Jerusalénman aywaykäyashqanchömi chunka ishkay discïpulunkunata jukläman qayaykur Jesús nirqan: 18<<Musyayankimi Jerusalénman aywaykashqansita. Saychömi Runapa Surinta prësu sarirkur mandaq cürakunaman y ley yachasiqkunaman apayanqa. Paykunami wanusish kananpaq niyanqa. 19Mana Israel autoridäkunapa makinman churayaptinmi asipäyanqa, astayanqa y crucificayanqapis. Sayno kaptinpis kimsa junaqtaqa kawarimunqami>>.
Santiagupa y Juanpa maman ruwakushqan
Marcos 10.35-45
20Saypitanami Zebedeupa warmin wawankunata pushakurkur Jesús kaqman charqan. Jesúspa puntanman qonqurpakuykurmi nirqan: <<Ruwakuläshayki, taytay>>.
21Sayno niptinmi Jesús nirqan: <<¿Imata ruranätataq munaykanki?>>
Saymi say warmi nirqan: <<Mandaq kanaykipaq Tayta Dios churashuptiki kay ishkay wawäkunata churaykulanki mandäsishunaykipaq, taytay. Jukta jamaykasinki aluqnikiman y jukaqtana isuqnikiman>>.
22Saymi Jesús nirqan: <<Imata manakayämashqaykitapis manami musyayankisu. ¿Noqa upunäpaq kaq cöpata#20.22a Cöpapaq parlarqa Tayta Dios rabyar jusalikuqkunata castigananpaq kashqanpitami parlarqan. Saypita masta musyanaykipaq liyinki Sal. 75.8; Isa. 51.17; Jer. 25.15-29; Hab. 2.16. upuyankimansuraq? [¿Awantayankimansuraq bautizayämänanpaq kashqanno bautizayäshuptiki?]>>#20.22b Bautizayämänanpaq kashqanno bautizayäshuptiki nirqa wanusiyämänanpaq kashqanno wanusiyäshuptiki nirqanmi.
Saymi niyarqan: <<Awmi, taytay>>.
23Sayno niyaptinmi Jesús nirqan: <<Rasunpaypami noqa upunäpaq kaq cöpata upuyanki [y bautizayämänanpaq kashqanno bautizayäshunki]. Sayno kaptinpis aluq kaq nawpäman ni isuq kaq nawpäman jamasinäpaq manami noqapitasu kaykan. Saymanqa jamayanqa Taytä nishqan kaqkunalami>>.
24Say ruwakuyashqanta wiyarmi wakin kaq discïpulunkuna Juantawan Santiaguta rabyapäyarqan. 25Saymi discïpulunkunata qayaykur Jesús nirqan: <<Musyayashqaykinöpis nación mandaq runakunaqa munayashqantami rurasiyan. 26Qamkunachöqa manami sayno kanmansu.#Luc. 22.25-26. Mayqaykipis mandaq kayta munarqa ashmaynöla runa mayikita yanapäyay. 27Ali rikash kayta munarqa esclävunöla runa mayikita yanapäyay.#Mat. 23.11; Mar. 9.35; Luc. 22.26. 28Runapa Surinpis manami sirvish kananpaqsu shamush, sinöqa sirvinanpaq y runakuna rayku wanur askaqta salvananpaqmi>>.#Luc. 22.27; Juan 13.12-15.
Ishkay qaprakunata Jesús aliyäsishqan
Marcos 10.46-52; Lucas 18.35-43
29Jericó markapita discïpulunkunawan Jesús aywakuptinmi aska runakuna qepanta aywayarqan. 30Say nänichömi ishkay qapra runakuna jamaraykäyarqan. Paykunami Jesús päsaykashqanta mayar qayakuyashpan niyarqan: <<¡Davidpa Surin Tayta Jesús, kuyapaykayälämay!>>
31Saymi upälakuyänanpaq olqutupäyarqan. Olqutupäyaptinpis masraqmi qayakur niyarqan: <<¡Davidpa Surin Jesús, kuyapaykayälämay ari!>>
32Saymi say qaprakunata qayaykur Jesús tapurqan: <<¿Imacho yanapänätataq munayanki?>> nir.
33Niptinmi qaprakuna niyarqan: <<Nawïkuna rikanantami munayä, taytay>>.
34Saymi kuyapar nawinkunata yataykuptin jinan höra rikayarqanna. Aliyarkurnami Jesúspa qepanta aywayarqan.
© 2003, Wycliffe Bible Translators, Inc. All rights reserved.