Mateo 13
13
Murupakuq runaman Jesús tinkusishqan
Marcos 4.1-9; Lucas 8.4-8
1Say junaqlami wayipita yarqurir Jesús aywarqan Galilea qocha kuchunman. Chaykurmi yachasinanpaq jamakurqan. 2Saymanmi aska runakuna shuntakäyarqan yachasishqanta wiyayta munar. Aläpa kichkipäyaptinnami qocha kuchuncho kaykaq büquiman wisarkur Jesús jamakurqan.#Luc. 5.1-3.
3Saypitanami imamanpis tinkusiypa aska yachasikuykunata yachasir nirqan: <<Juk runashi trïgu muruq aywanaq. 4Muruta shikaptinshi näniman wakin shikwanaq. Saytashi pishqukuna shamur upshakurkuyänaq. 5Wakin kaq murushi shalaman shikwanaq. Saycho alpa mana kaptinshi ras jeqamurpis 6jaqwäkuyta mana kamäpakur shanaywan sakikäkunaq. 7Wakin kaq murushi kashakuna chawpinman shikwanaq. Jeqamurpis kashakuna nitiptinshi qarwashtaykälar wanunaq. 8Wakin kaq murunashi isanqa ali alpaman shikwanaq. Saycho ali winamurshi ali espïgayuq kayänaq. Wakin espïgashi pachak (100) trïguta wayunaq, wakin espïgashi soqta chunka (60) trïguta wayunaq y wakinnashi kimsa chunka (30) trïguta wayunaq. 9Rinriyuq kaqkunaqa nishqäkunata wiyakuyäsun>>.
Tinkusiypa imanir Jesús yachasishqanpis
Marcos 4.10-12; Lucas 8.9-10
10Saypitanami discïpulunkuna Jesústa tapuyarqan: <<Taytay, tantiyaykasilämay tinkusiypa imanir yachasishqaykitapis>>.
11Saymi Jesús nirqan: <<Qamkunataqa Tayta Dios mandaykashqan imano kashqantapis shumaqmi tantiyasiyäshayki. Wakinkunataqa manami tantiyasishaqsu. 12Yachasishqäta cäsukuqkunaqa masmi tantiyakuyanqa. Mana cäsukuqkunami isanqa ichiklata tantiyayashlantapis qonqaykuyanqa.#Mat. 25.29; Mar. 4.25; Luc. 8.18; 19.26. 13Saymi imamanpis tinkusiypa wilapaykä. Paykunaqa rikaykarpis manami cuentata qokuyansu y wiyaykarpis manami tantiyayansu. 14Sayno kananpaq kashqanta musyarmi profëta Isaías kayno qelqarqan:
<<Mayjina wiyayashpaykipis manami tantiyayankisu.
Mayjina rikayashpaykipis manami cuentata qokuyankisu.
15Say runakunapa shonqunkuna chukruyashqami.
Rinrinkunapis upayashqami.
Nawinkunapis qaprayashqami.
Sayno karmi rikayansu, wiyayansu, tantiyakuyansu ni wanakuyansu#13.15a Wakin runakunaqa wiyakuyansu niyan..#Isa. 6.9-10.
Sayno kayaptinmi noqapis aliyäsishaqsu.#13.15b Manami qeshyalapita aliyäsinanpaqsu nikan, sinöqa nakaykunapita, lakikuykunapita y jusalikuykunapita salvananpaqmi nikan.
16<<Qamkunatami isanqa Tayta Dios yanapaykäyäshunki rikayashqaykita y wiyayashqaykita tantiyakuyänaykipaq. 17Rasunpami nï: Unay profëtakunapis y Tayta Dios munashqanno kawaq runakunapis rikayashqaykita rikayta munarpis manami rikayarqansu. Wiyayashqaykita wiyayta munarpis manami wiyayarqansu.#Luc. 10.23-24.
Murupakuqman tinkusishqanta Jesús tantiyasishqan
Marcos 4.13-20; Lucas 8.11-15
18<<Kanan tantiyasiyäshayki murupakuq runaman tinkusiypa yachasishqäta. 19Trïgu muruqa Tayta Dios mandaykashqanpa wilakuyninmi kaykan. Wakin runakunaqa chukru näninömi kaykan. Saymi Tayta Diospa wilakuyninta wiyarpis mana chaskikuyaptin Satanás shamur wiyayashlantapis qonqaykasin.
20<<Wakin runakunaqa shalanömi kaykäyan. Paykunaqa Diospa wilakuyninta wiyar kushishqami chaskikuyan. 21Kushish chaskikurpis jaqwäkuyta mana kamäpakuq trïgunömi kaykäyan. Saymi Diospa palabranta chaskikuyashqanpita runakuna chikiyaptin qepaman kutikuyan.
22<<Wakin runakunaqa kasha kasha chakranömi kaykäyan. Paykunaqa Diospa wilakuyninta wiyarpis kay vïdacho imaykankunapaqpis lakikur y rïcu kanalanpaq yarpachakurmi Diospa wilakuyninta qonqaykur mana wayuq trïguno kaykäyan.
23<<Wakin runakunami isanqa ali alpano kaykäyan. Paykunaqa Tayta Diospa wilakuyninta chaskikurmi Tayta Dios munashqanno kawayan. Saymi ali alpacho juk murulapita juk pachak (100) trïgu o soqta chunka (60) trïgu o kimsa chunka (30) trïgu wayushqanno kaykäyan>>.
Trïguwan ballicu winamushqanpita Jesús yachasishqan
24Saypitanami tinkusiypa yapay yachasir Jesús nirqan: <<Tayta Dios mandaykashqan imano kashqantapis tinkusiypa yachasiyäshayki. Juk runashi chakrancho trïguta murunaq. 25Murupakuyta ushaskiptinnashi chikiqnin runa sakaypa aywaykur trïgu murushqan jananman ballicuta shikanaq. 26Trïgu winamur shikshiyta qalaykuptinshi ballicupis reqilapa kaykänaq.
27<<Sayshi ashmayninkuna aywaykur patronninta niyänaq: <Taytay, akraylata muruykaptikiqa ¿maypitaraq ballicu winamush?>
28<<Sayno wilayaptinshi ninaq: <Mayqanpis chikipämaqnïmi sayta shikapämash>.
<<Sayno niptinshi ashmaykuna tapur niyänaq: <¿Munankiku say ballicuta lukiyänäta?>
29<<Niyaptinshi ninaq: <Ama lukiyaysu. Ballicuta lukirqa trïgutapis lukiyankimi. 30Jina cosëchayaq saycho winakusun. Cosëchachönami achuqkunata nishaq: <<Puntata ballicuta shuntar wankuyay rupasinansipaq. Trïguta isanqa shuntarkur mikuy churakunäman pirwayay>> > >>.
Ñäbus muruman Jesús tinkusishqan
Marcos 4.30-32; Lucas 13.18-19
31Mastapis tinkusiypa yachasirmi Jesús nirqan: <<Tayta Dios mandaykashqanqa ñäbus muruta juk runa chakranman murushqannömi kaykan. 32Lapan murupita mas ichiknayla kaykarpis winamurqa wakin qewakunapitapis mas jatunmi winan. Saymi rämankunacho pishqukunapis qeshunkunata rurayan>>.#13.32 Sayno nirmi Jesús nirqan: Takshala murulapita ñäbus jeqarkamur winashqannömi Tayta Dios mandaykashqanpis maysayman chanqa.
Levadüraman Jesús tinkusishqan
Lucas 13.20-21
33Tinkusiypa yapay yachasirmi Jesús nirqan: <<Tayta Dios mandaykashqanqa levadüranömi kaykan. Tantata rurananpaq ishkay arröbano jarinaman levadürata winaptin mäsa shumaqmi jakan>>.#13.33 Sayno nirmi Jesús nirqan: Ichikla levadüra mäsata jakasishqannömi Tayta Dios mandaykashqanpis maysayman chanqa.
Imapaq tinkusiypa Jesús yachasishqan
Marcos 4.33-34
34Saynömi Jesús imamanpis tinkusiypa runakunata yachasirqan. Imamanpis mana tinkusiypaqa manami imaypis yachasirqansu. 35Sayno yachasirqan Tayta Diospa profëtan kayno nishqanta cumplinanpaqmi:
<<Imamanpis tinkusiypami yachasiyäshayki.
Kay pasata kamashqanpita pasa pipis mana tantiyashqankunatami wilakushaq>>.#Sal. 78.2.
Ballicuman tinkusiypa yachasishqanta Jesús tantiyasishqan
36Saypitanami runakunata despachaskir juk wayiman Jesús yaykurqan. Saychömi discïpulunkuna ruwakuyarqan ballicuman tinkusiypa yachasishqanta tantiyasinanpaq.
37Saymi Jesús nirqan: <<Trïguta muruq kaqqa Runapa Surinmi kaykan. 38Chakraqa intëru kay pasami kaykan. Trïguqa Tayta Dios mandaykashqancho kawaq runakunami kaykäyan. Ballicuqa Satanás munashqanno kawaq runakunami kaykäyan. 39Ballicuta shikaq kaqqa diablumi kaykan. Cosëchaqa juiciu finalmi kaykan. Cosëchata shuntaqkunanami angilkuna kaykäyan.
40<<Ballicuta shuntarkur ninaman qaykushqannömi juiciu final junaqpis kanqa. 41Say junaqmi angilninkunata Runapa Surin kachamunqa jusalikasiqkunata y jusalikuqkunatapis mandashqanpita shuntaykur 42bunyaypa bunyaykaq ninaman qaykuyänanpaq. Saychömi fiyupa waqar kiruntapis uchuyanqa. 43Tayta Dios munashqanno kawaqkunami isanqa Tayta Dios mandaykashqancho intinöraq asikyäyanqa.#Dan. 12.3. Rinriyuq kaqkunaqa nishqäkunata wiyakuyäsun.
Pamparaq qellayman Jesús tinkusishqan
44<<Tayta Dios mandaykashqanqa chakracho qellay pamparaqmanmi tinkun. Juk runashi chakracho saysika qellay pamparaykaqta tarinaq. Say qellayta tariykurshi kashlanman pampaykunaq. Nirkurshi lapan imaykantapis rantikuykur say qellay pamparaykaq chakrata kushish rantinaq.#13.44 Sayno nirmi Jesús nirqan: Say chakracho tarishqan qellay lapan imaykanpitapis mas ali kashqannömi Tayta Dios mandaykashqanman yaykunansipaq kashqanpis lapan imaykansipitapis mas ali kaykan.
Perlaskunaman Jesús tinkusishqan
45<<Saynöpis Tayta Dios mandaykashqanqa kuyaylapaq perlasmanmi tinkun. Juk negociantishi alinnin perlasta rantinanpaq ashinaq. 46Mas alinnin kaqta tariykurnashi lapan imaykantapis rantikuykur say perlasta rantinaq>>.#13.46 Sayno nirmi Jesús nirqan: Say rantishqan perlas lapan imaykanpitapis mas ali kashqannömi Tayta Dios mandaykashqanman yaykunansipaq kashqanpis lapan imaykansipitapis mas ali kaykan.
Redman Jesús tinkusishqan
47<<Saynöpis Tayta Dios mandaykashqanqa redmanmi tinkun. Lamarman redta jitar imayka casta pescädutami sariyan. 48Red juntatami lamar kuchunman jorquyan. Saychömi ali kaq pescäduta canastaman winayan y mana ali kaqtana jitariyan. 49Saynölami juiciu finalcho angilkuna shamur ali runakunapita jusalikur kawaq runakunata rakiyanqa. 50Jusalikur kawaq runakunatami bunyaypa bunyaykaq ninaman qaykuyanqa. Saychömi fiyupa waqar kiruntapis uchuyanqa>>.
Maran kaq y mushuq kaq mikuyman Jesús tinkusishqan
51Sayno yacharkasirnami discïpulunkunata Jesús tapur nirqan: <<¿Kay yachasishqäkunata tantiyayankiku?>>
Sayno tapuptinmi niyarqan: <<Aw, tantiyayämi, taytay>>.
52Saymi Jesús nirqan: <<Tayta Dios mandaykashqanpita yachasiq runaqa maran kaq mikuykunata y sayraq churashqan kaqkunata jorqarkamur qarakuqnömi kaykan>>.#13.52 Maran kaq mikuykunata tinkusin Moisés qelqashqanman y profëtakuna wilakuyashqanmanmi. Sayraq churashqan kaqkunata tinkusin Jesucristo yachasishqanmanmi.
Nazaretcho Jesús wilakushqan
Marcos 6.1-6; Lucas 4.16-30
53Imamanpis tinkusiypa yacharkasirmi Jesús saypita aywakurqan. 54Markanman chaykur sinagögacho yachasiptinmi marka mayinkuna admirayashpan niyarqan: <<Sayno yachasinanpaq ¿maychöraq yachakamush? Saynöpis ¿imanöparaq milagrukunata ruran? 55¿Manaku payqa carpintëru Josépa surin kaykan? Saynöpis paypa maman ¿manaku María? Wawqinkunapis ¿manaku Santiago, José, Simón y Judas? 56Lapan paninkunapis ¿manaku kaycho täyan? Sayjinanpa yachasinanpaqqa ¿maychöraq yachakamush?>>
57Sayno nirmi Jesús yachasishqankunata chaskikuyarqansu. Saymi Jesús nirqan: <<Wakin markakunacho profëtata chaskikuyaptinpis ayllunkuna y marka mayinkunaqa manami chaskikuyansu>>.#Juan 4.44.
58Sayno mana chaskikuyaptinmi juk ishkay milagrukunalata saycho rurarqan.
© 2003, Wycliffe Bible Translators, Inc. All rights reserved.