Mateo 11
11
1Chunka ishkay discïpulunkunata yachasiyta ushaskirnami Galileapa markan markan Tayta Diospa wilakuyninta wilakur Jesús purirqan.
Discïpulunkunata Bautizaq Juan Jesúsman kachashqan
Lucas 7.18-35
2Carcilcho kaykarmi Bautizaq Juan musyarqan Jesucristo imata ruraykashqantapis. Saymi [ishkay] discïpulunkunata Jesús kaqman kacharqan 3tapumur niyänanpaq: <<¿Qamkush kaykanki Tayta Dios kachamushqan Cristo o juktaraqkush shuyakuyäshaq?>>
4Sayno tapuyaptinmi Jesús nirqan: <<Kutir Juanta wilayay wiyayashqaykita y rikayashqaykita. 5Qaprakuna rikayannami. Makllukuna puriyannami. Leprawan qeshyaqkuna aliyashnami. Upakuna wiyayannami.#Isa. 35.5-6. Wanushkuna kawariyämushnami. Muchuqkunapis Tayta Diospa ali wilakuyninta wiyaykäyannami.#Isa. 61.1. 6Yarpäyashqanno mana ruraptïpis mana ajayaypa noqaman yärakamaq runaqa kushishqami kawanqa>>.
7Juanpa discïpulunkuna kutiskiyaptinnami runakunata Jesús nirqan: <<¿Imata rikaqtaq sunyaq jirkaman aywayarqayki? ¿Shoqushta wayra kuyusiqta rikayänaykipaqku? 8Manasayqa ¿ima rikaqtaq aywayarqayki? ¿Ali mödanash runata rikaqku aywayarqayki? Musyayashqaykinöpis reypa wayincho taq rïcu runakunalami ali mödanan jatish kaykäyan. 9Sayno kaptinqa ¿ima rikaqtaq aywayarqayki? ¿Profëta rikaqku? Aw, profëta rikaqmi. Noqa kaynömi nï: Paynöqa manami mayqan profëtapis kashsu. 10Juanta kachamunanpaqmi kayno qelqaraykan: <Nänita pisaq japuy runakunata kamarikasinanpaqmi wilakuqnïta puntaykita kachashaq>.#Mal. 3.1.
11<<Rasunpami nï: Lapan profëtakunapitapis Bautizaq Juanqa mas tantiyakuqmi. Sayno kaptinpis Tayta Dios mandaykashqanman sayraq yaykuqkuna Juanpitapis masmi tantiyayan.
12<<Bautizaq Juan wilakur qalaykushqanpita pasami Tayta Dios mandaykashqanman aska runakuna yaykuykäyan. Sayno kaykaptinpis wakin runakuna manami munayansu say wilakuyta wilakuyänanta, sinöqa imanöpapis sapatami churapaykäyan. 13Juan manaraq wilakuptinmi Moiséspis y profëtakunapis sayno kananpaq kashqanta wilakuyarqan.#Luc. 16.16. 14Paykuna wilakuyashqanta mana criyiyaptikipis <Elías shamunqami> nir profëta wilakushqantaqa Juanmi cumplish.#Mal. 4.5; Mat. 17.10-13; Mar. 9.11-13. 15Rinriyuq kaqkunaqa nishqäkunata wiyakuyäsun.
16<<Kanan tiempu runakunata ¿imamanraq tinkusïman? Paykunaqa pläzacho puklaq wamrakunanölami kaykäyan. 17Say wamrakunami qayarar niyan: <Pinkulluta tukayaptïpis manami tushuyankisu. Aya apay cantata cantayaptïpis manami waqayankisu>. Say wamrakunanölami kanan tiempu runakunapis kaykäyan. 18Juan tantata mana mikuptin y vïnuta mana upuptinmi niyan: <¡Payqa supaypa munayninchömi kaykan!> 19Runapa Surin mikuptin y upuptinmi niyan: <¡Kay runaqa mikular upular purikun! ¡Impuestu cobraqkunawan y jusasapa runakunawanmi shuntakan!> Sayno niyaptinpis discïpulükuna Tayta Dios munashqanno kawayaptinmi Juanta y noqata Tayta Dios kachayämashqan tantiyakaykan>>.
Jusalikuqkunata juzgananpaq Jesús nishqan
Lucas 10.13-15
20Aska milagrukunata Jesús rurashqanta rikarpis jusalikuykunata runakuna manami wanakuyarqansu. Saymi Jesús nirqan: 21<<¡Wawalaw, Corazín runakuna! ¡Wawalaw, Betsaida runakuna! Markaykikunacho milagrukunata rurashqäno Tiro markacho y Sidón markacho#Isa. 23.1-18; Eze. 26.1—28.26; Joel 3.4-8; Amós 1.9-10; Zac. 9.2-4. milagrukunata rurash kaptïqa maynami jusalikuykunata wanakuyashpan qachqa mödanata jatikurkur uchpa janancho jamaräyanman karqan. 22Noqa kaynömi nï: Tiro y Sidón runakunata castigashqanpitapis peormi juiciu final junaqcho Tayta Dios castigayäshunki.
23<<Capernaúm runakuna, ¿jana pasaman chäyänaykipaq kashqantaku yarpaykäyanki? ¡Qamkunaqa Hadesman qaykushqami kayanki! Qamkunacho rurashqä milagrukunata Sodomacho#Gén. 19.24-28. ruraptïqa jusankunata kachariyaptin kananyaqmi say marka kaykanman karqan. 24Noqa kaynömi nï: Sodoma runakunata castigashqanpitapis peormi juiciu final junaqcho Tayta Dios castigayäshunki>>.#Mat. 10.15; Luc. 10.12.
Tayta Diosta Jesús manakushqan
Lucas 10.21-22
25Saychömi Tayta Diosta manakur Jesús nirqan: <<Jana pasacho y kay pasacho munayyuq Papä, qamtami alabä. Manami yachaq tukuqkunatasu yarpaykashqaykikunata musyasishkanki, saypa trukanqa wamrano kaqkunalatami. 26Sayno kanantami munashkanki, Papä>>.
27Nirkurnami saycho kaykaq runakunata nirqan: <<Taytämi lapantapis munaynïman churamush.#Juan 3.35. Surin kaptïmi payla noqata reqiman. Saynöpis Taytä kaptinmi noqala payta reqï. Saymi noqa tantiyasishqä kaqkunala Taytäta reqiyan>>.#Juan 1.18; 10.15.
28<<Utikash y lakish kaqkuna, lapayki noqaman shayämuy. Noqami jamayta tarisiyäshayki. 29Noqapa yügüta matankakuyay.#11.29 Noqapa yügüta matankakuyay nishqanqa discïpulü kayay ninanmi. Kuyapäkuq y ali shonqu kashqäta rikakur noqapita yachakuyay. Noqapita yachakurmi jamayta tariyanki.#Éxo. 33.14; Jer. 6.16. 30Noqapa yügü ankashlami. Manami aja apaysu>>.
© 2003, Wycliffe Bible Translators, Inc. All rights reserved.