Jemusi 4
4
Kulibombya kuli Lesa
1Anu cilengesha kulwana akwaambana pakati kanu nciinshi? Sa te njimiyeeyo yakuyandishisha kulikondelesha iyo ilwana muli ndimwe? 2Mulisuni kuba ashintu shimwi, sombi tamukoonshi kushicana, aboobo mulilibambite kucayana. Mulakumbwa shimwi shintu, sombi tamukoonshi kushicana, aboobo mulalwana akwaambana. Tamushicaani ceebo tamusengi kuli Lesa. 3Alimwi nabi mwaseenga inga tamushitambuli ceebo miyeeyo njemucitila boobo njibiibi. Mulasenga shintu kwaamba ayi mushisebenseshe mukulikondelesha mwebo nobeene. 4Mwebo nobantu batashomeki! Sa tamwishi kwaamba ayi kupanga bushicibusa abuumi bwa cishi ca panshi nkuba mulwani wakwe Lesa? Ee, uyo woonse usuni buumi bwa cishi cino ulalilengesha kuba mulwani wakwe Lesa. 5Mutayeeyi ayi Malembo akwe Lesa alabeca ndyaamba ayi, “Muuya Lesa ngwaakabika muli ndiswe ulayandishisha shamubili.” 6Sombi Lesa ulatupa luse lwakushikoma. Nceceeco Malembo ncaambila ayi, “Lesa ulakaka bantu balisumpula sombi ulapa luse kubaabo baliceesha.”#Tushimpi 3:34
7Ono aboobo amulibombye kuli Lesa. Amupikishe Mubiibi, lyalo ulaakumutalamuka. 8Kamusena pafwaafwi aLesa alakwe ulaakusena pafwaafwi amwebo. Amusambe kumaansa mwebo nobamucita shibi! Amusalashe myoyo yanu nobantu baamba nshemutaciti. 9Amuungumane, mulile buumpute amibila, kuseka kwanu mukwaalule kulila akwalo kusangalala kwanu mukwaalule buumba! 10Amuliceeshe pameenso a Mwaami Lesa, lakwe ulaakumusumpula.
Kucenjesha shakoomboloshanya
11Nobamakwesu, mutanoofuyana. Uyo ufuya nabi woombolosha mushominyina, ulacobola akoombolosha Milawo yakwe Lesa. Ono na woombolosha Milawo, ingayi wacileka kwiikonkela, akuba shikuyoombolosha. 12Ono Lesa eenkabo ngoshikupa Milawo akoombolosha bantu. Lakwe eenkabo ngweenga wapulusha muntu nabi kumunyonyoola. Ino webo ulayeeya ayi ndiwaani, pakoombolosha muntunyoko?
Kucenjesha shakulumbaisha
13Amunyumfwe mwebo nomwaamba ayi, “Sunu nabi ciilo tulaakuya kundabala inene imwi tukekaleeko mwaaka katusambasha makwebo esu akucana mpindu inene.” 14Sombi tamwishi ambweshi bukace ciilo. Mwebo mulibo anga mbwiishi ubo bubonekabo ciindi ciniini akushimingana.#Tushimpi 27:1 15Mwebo mulyeelete kwaamba ayi, “Mwaami Lesa na nkuyanda kwakwe tulaakubukila buumi akucita boobo aboobo.” 16Ono mwebo mulalisumpula akulilumbaisha. Kulilumbaisha koonse kwa mushobo uyo nkubisha. 17Kulilabo muntu ushi nshaaelete kucita ono kaatashiciiti, ulabisha.
Lenje Bible with Deuterocanon © Bible Society of Zambia, 2003.