Zac 9
9
Ri ch'aqa' chik ruwach'ulew xa xkek'is
1Ri Jehová xuya' jun rutzijol, y jare' k'a:
Xkiyakatej k'a chikij ri tinamit Hadrac y Damasco.
Konojel winaqi' richin ri ruwach'ulew kan e nutzuliben-pe yin Jehová,
chuqa' konojel tzobaj ri e richin ri Israel.
2Xkiyakatej chikij ri aj-Hamat,
roma ek'o chikinaqaj ri Hadrac y ri Damasco,
y chuqa' chikij ri aj-Tiro y aj-Sidón,
stape' kan janila na'oj k'o kik'in.
3Ri aj-Tiro xekibanala' k'a q'anej tz'aq richin tobel,
y xkimol saqipueq achi'el xa ta ri poqolaj.
Xkimol chuqa' q'anapueq achi'el xa ta ri ch'abeq ri ek'o pa taq bey.
4Jak'a yin Jehová kan xtinwelesaj-el ronojel re' chike.
Xtinbenk'aqa' kan k'a chupan ri palou ri tz'aq ri',
y ri Tiro xtibek'is roma ri q'aq'.
5Toq xtikitz'et k'a re' ri winaqi' aj-Ascalón, kan janila xtikixibij-ki'.
Ri winaqi' aj-Gaza janila xtikik'en rukiy.
Ri oyobenri'il ri k'o kik'in ri aj-Ecrón xa xtik'is.
Xtiken k'a ri rey richin ri tinamit Gaza,
y ri tinamit Ascalón kan xtitole' kan.
6Ri winaqi' aj-Asdod xkek'ule' kik'in winaqi' ri man e kiwinaq ta rije'.
Y roma ri' ri aj chiri' xtiqasex kiq'ij.
7Rije' man xtikitej ta chik ti'ij rik'in kik',
y chuqa' ch'aqa' chik q'utun ri kan ninwixowaj yin.
Ri juba' chik winaqi' ri xkek'ase' na kan xke'ok aj-Israel.
Xke'ok kik'in ri tzobaj richin kan ri Judá.
Ri winaqi' aj-Ecrón xkexime' pa samaj achi'el xkiben ri aj-Jebús ri ojer kan.
8Yin kan xtinchajij ri wachoch richin keri' ri xkeyakatej chuwij man xkech'akon ta.
Y ri yetz'ilo kichin ri nuwinaq man jun bey chik xketikir xkekitz'ila',
roma ja yin ri yichajin kichin.
Ri rupeten ri rey richin Jerusalem
9Kan kixkikot k'a janila rix aj-Sión.
Kan kixbixan k'a rik'in kikoten rix aj-Jerusalem,
roma ri i-rey xa kan xtipe k'a iwik'in.
Rija' jun choj laj achin y kan ch'akonel-wi.
Kan jun achin ri kan yalan ch'uch'uj.
Rija' ch'okol-pe chirij jun alaj bur.
10Rija' kan xkeruwulaj k'a ri carruaje e richin labal richin ri Israel.
Y xkeruk'is k'a ri kiej e richin labal ri ek'o pa Jerusalem.
Y xkeruk'is chuqa' ri ch'ab ri yekusex pa labal.
Rija' kan xtrelesaj ronojel oyowal pa taq ruwach'ulew.
Rija' xtuq'et-tzij chupan chijun ruwach'ulew;
xtitiker-el chuchi' jun palou,
xtapon k'a chuchi' jun chik palou,
xtitiker-el chuchi' ri raqen-ya' Éufrates,
y xtapon k'a pa ruk'isibel chire re ruwach'ulew.
Ri aj-Israel xketzolej chik pa kiruwach'ulew
11Yin kan nubanon k'a jun jikibel-tzij iwik'in rix israelita,
y re' kan xjike' rik'in kik'.
Roma ri' kan xkenkol-pe ri iwinaq pa ximonri'il,
ri achi'el xa ta chupan jun pozo chaqi'j ek'o-wi.
12Roma ri' tik'oje' oyobenri'il iwik'in.
Rix kan xkixtzolin chik chupan ri itinamit ri e sutin-kij chi tz'aq.
Ninbij k'a chiwe chi kan xtinya' urtisanik pan iwi'.
Xtinya' k'a ka'i' mul urtisanik chiwe achi'el ri xik'ul pa nabey.
13Xkixinkusaj k'a rix aj-Judá y rix aj-Israel,
richin xkenya' pa tijoj-poqonal ri aj-Grecia.
Rix aj-Judá ix achi'el ri nuk'aqbal-ch'ab,
y rix aj-Israel ix achi'el jun ch'ab.
Rix aj-Sión kan ix achi'el nu-espada,
richin xkench'ek ri aj-Grecia.
14Chupan ri q'ij ri' yin kan xtink'ut k'a wi' chiwech rix nuwinaq.
Ri nuch'ab ri xkenk'eq kan achi'el xa ta koyopa'.
Y ja yin ri xkixupun ri trompeta richin labal.
Xtinchop kere' pa xokon,
y xkipe achi'el jun surkum.
15Yin kan xkixinto' k'a,
y ri e etzelanel iwichin kan xke'ixeq',
y xke'ich'ek rik'in ri iwikeq'.
Rix kan xtiben chike chi xtitix ri kikik'el
achi'el toq nitix ri vino.
Rix kan xkixnoj k'a rik'in ri oyowal,
achi'el ninoj ri xára ri nik'ulu ri kik' richin jun kamelabel.
16Chupan ri q'ij ri' yin Jehová kan xkixinkol,
achi'el nuben jun yuq'unel kik'in ri taq rukarne'l.
Y kan jebel k'a xtiben chupan ri iruwach'ulew,
achi'el yeyok'olin ri jalajoj kiwech taq abej ri nibe chuwech jun corona.
17Kan janila k'a jebel xtiben chuwech ri iruwach'ulew.
Ri iwalk'ual chi alaboni' chi xtani' kan jebel k'a xkek'iy-q'anej,
achi'el ri tiko'n y ri juwi-uva, xcha'.
Kaqchikel Bible © Bible Society in Guatemala, 2003.