Ovaroma 9
9
Kalunga novantu ve
1Ame ndjimuntu waKristus me popi otjatjili, híme kembe. Elityoo lyandje mali mpopile okutya híme kembe, mena lyokutya mali viyulwa kOmbepo Ondhilikwa. 2Ndji na oudheu ounene momutima noviihamo mbihamavi polo. 3Ame omwene mbe tje hala okutya ndji thingwe kuKalunga, ame ndji yapulwe ko kuKristus mena lyovakwetu, omuhoko wandje, 4mbave li Ovaisraeli. Kalunga we ve ninga ovana, ye he ve pa etumbalo, ewaneneno, oveta, eundapelokalunga nomaudhiko.#Eks. 4:22 5Mowoiheombwale omo mwa dha Kristus, hiaa yumukwa mountu. Kalunga, Omutuminiwaavihe, nga tumbalekwe apehe katee apehe! Amen.
6Iya hakutya odhondaka dhaKalunga dha puka ngaile, mena lyokutya havantu avehe womoIsrael ve li Ovaisraeli. 7Oluyumuko lwaAbraham halo aluhe lu li odhondele, Kalunga mbaa udhikila Abraham. Kalunga wa heela Abraham ha tyaa: “Oluyumuko lwoye malu ka dha muIsak.”#Gen. 21:12 8Hehi matji tya odhondele mbava yumukwa mountu, hawo ve li odhondele dha Kalunga, iya odhondele dhaKalunga ombava yumukwa meudhiko lyaKalunga, owo mava tiwa ovana. 9Iya ondaka yeudhiko lyaKalunga mai tyaa: “Me ka tjuna ombula ndjimai ya poluvedhe ngahendu, me ka vadha Sara ae na ondele omudhantu.”#Gen. 18:10
10Hehi hatjo vala atjiika, iya naRebeka wa yumuka wo epaha ovadhantu, ihe wa li tateombwale Isak. 11Tainkolo epaha háliya yumukwa ne háliya undapa ouwa ne ouvi, eholowolo lyaumo opo li kale nawanawa, hamena lyovilinga, iya olyanguma ithana. 12Kalunga omwene wa heela Rebeka ha tyaa: “Omunoye omunene watjo ma ka undapela omunitje,”#Gen. 25:23 13omusonekwa ngahi mau tyaa: “Ame ndji hole Jakob, ndji yele Esau.”#Mal. 1:2-3
14Iya ngatu tye vi? Ngatu tye Kalunga ke na tja ouvyuuki? Hatjo nokanunu! 15Iya Kalunga wa heela Moses ha tyaa: “Me t̯ile onkenda ngume hala okut̯ila onkenda, me etele olweembya ngume hala okweetela olweembya.”#Eks. 33:19 16Iya kaatji ningwa mena lyehalo ne lyovilinga vyomuntu, iya matji ningwa mena lyolweembya lwaKalunga. 17Omusonekwa mau heele Farao amau tyaa: “Mbe ku yela peulu, ndji yulike mwoove odhonkono dhandje, nena lyandje li teethelwe mouye auhe.”#Eks. 9:16 18Iya Kalunga ma t̯ile onkenda nguma hala okut̯ila onkenda, ha kukutike nguma hala okukukutika.
Oluyuma nonkenda yaKalunga
19Umo owomun̯e ma mpula ama tyaa: “Iya omena lyatji Kalunga me tu pa ombedhi? Iya aan̯i nguma ulu okukondjetha ehalo lyaKalunga?” 20Oove aan̯i mukwetu ngumo hala okuyaka Kalunga? Ombiya yoluma kaai ulu okupula ngwee i ma, hai tyaa: “Omena lyatji wa ndinga hinyahi?”#Jes. 29:16; 45:9 21Nguu ma odhombiya ke na tja odhonkono okuma odhombiya dhimo ndhaa tumbala nadhimo ndhihadhi tumbalele?
22Iya Kalunga otjo a ninga nyahoka. Ye wa li ama hala okuhololola oluyuma lwe nokuyulika odhonkono dhe, iya we likambulithila unene ovantu mboka mbava thele okuyumanekwa nokuhan̯aunwa po, 23opo a ule okuhololola ouhona wetumbalo lye, kumboka mbava t̯ilwa onkenda, mbava longekedhelwa ae lukulu etumbalo, 24nant̯e wo hemba mbaa ithana, hamOvajuda vala aveika, iya nomovapaani wo. 25Iya membo lyaHosea ma popi ama tyaa:
“Ovantu mboka mbahave thi ovandje,
me ke ve ithana ‘ovantu vandje’.
Otjiwan̯a soka himba li ahe hole,
me ke tji ithana ‘Otjihivilikwa tjandje’.#Hos. 2:23
26Pomaluvedhe mpoka mpava tiwaa:
‘Kamuvantu vandje’
mpoka yatjo mava ka ithanwa
odhondele dhaKalunga omunamwenyo.”#Hos. 1:10
27Iya Jesaja wa wololokela Israel ha tyaa:
“Ovaisraeli nandaku tiwa ovengi,
ve lithike peheke lyokontyo yelunga,
mokati kawo mbamava ka hupithwa ovanunu vala.#Jes. 10:22-23
28Iya Muhona ma ka hwithila po ondaka ye kombanda yohi,
me ke i hwithila po motjikando tjimo.”
29Hehi Jesaja otjo a popya lukulu ha tyaa:
“Ngaile Muhona Sebaot ke tu thiilile po omaluyumuko,
ngai twa ila Sodom, hatu ningwa ngaGomorra.”#Jes. 1:9
Ovaisraeli nondaka ombwa
30Iya ngatu tye vi? Ovapaani kava kondjele okulitwaa pouvyuuki, iya ouvyuuki mbuva pewa owomeitavelo. 31Ovaisraeli mbava kondja okulitanta noveta va ninge ovavyuuki, va anyenwa. 32Omena lyatji? Omena lyokutya kava kondjele okupitila meitavelo, iya va kondja okupitila movilinga. Iya ve liputala mewe lyokuputaletha. 33Ngahi kwa sonekwa haku tiwaa: “Taa tuutuu, ame me twaa moSion ewe lyokuputaletha noluwaa lwoku ve withitha. Iya nguma itavele muye, kaa ka t̯ithwa ohon̯i.”#Jes. 28:16
Dhimba New Testament © Bible Society in Namibia, 2010.