Ovaroma 16
16
Omameneko omuyapostoli
1Napano me mu pa omukwetu Foibe nguu li omupopili weongalo lyomoKenkrea. 2Mu tambulen̯i mena lyaMuhona, n̯e mu mu popile movipuka avihe mbima hepa ngahi matji thevelwa ovadhilikwa vaKalunga, mena lyokutya wa popila ovantu ovengi, naame wo wa mpopila.
3Menekelen̯i po ooPriskila naAkula, ovaundapi vakwetu muKristus Jesus.#Ovil. 18:2 4Ovantu mboka va yandja omienyo vyawo mena lyandje. Me ve pandula unene, haame vala aika, iya nomaongalo ovantu avehe mbava dha moupaani. 5Eongalo ndii onganena moyawo nalyo li menekelen̯i po.
Menekelen̯i po Epainetus, omuhivilikwa wandje, nguu li omutenga waKristus moAsia. 6Menekelen̯i po Maria, ngwee mu undapela unene. 7Menekelen̯i po ooAndronikus naJunias ovetu, nodhonkwatwa dhonkwetu mbava tumbala mokati kovayapostoli, mboka mbava li ovatenga okwiila ovakriste pwaame.
8Menekelen̯i po Ampliatus, omuhivilikwa wandje muMuhona. 9Menekelen̯i po Urbanus, omuundapi omukwetu muKristus naStakus omuhivilikwa wandje muMuhona. 10Menekelen̯i po Apelles, ngoka ngwee liyulika okutya ma hala okulandula Kristus. Menekelen̯i po ovaAristobulus. 11Menekelen̯i po Herodion owetu. Menekelen̯i po ovakriste ovakwetu muMuhona owomoyooNarkissus.
12Menekelen̯i po ooTrifaina naTrifosa, Ovakadhintu mboka mbave li motjilinga tjaMuhona. Menekelen̯i po Persis omukadhintu ngoka ngwaa undapa unene otjilinga tjaMuhona. 13Menekelen̯i po Rufus, ngwaa holowolwa okukala motjilinga tjaMuhona, naina, ina nahi hitu kala naye, u ndinga ngomuna.#Mark. 15:21 14Menekelen̯i po ooAsinkritus nooFlegon nooHermes nooPatrobas nooHermas novakwetu mbamu kala nawo. 15Menekelen̯i po ooFilologus nooJulia nooNereus nompandje, nooOlimpas novadhilikwa avehe mbamu kala nawo.
16Limenekelen̯i po nehupito edhilikwa. Omaongalo aehe aKristus mae mu menekele po.
Lungamenen̯i ovapukithi
17Vakwetu, me mu pukulula mu lungamene ovantu mboka mbava eta omaliyapauko nokupukitha ovaitaveli. Va kondjetha elongo ndyoka ndimwa longwa. Kalen̯i kokule nawo. 18Ovantu mbava ninga ovipuka mbii li nyahoka, kava undapele Muhona wetu Kristus, iya va undapela omadhimo awo ovene. Va popya odhondaka odhombwa dhokupukitha omitima vyovantu mbahave na ombedhi. 19Omuntu auhe wa tyaa ouhunga nan̯e okutya mu tyaa kodhondaka dhaKalunga. Ame mbe mu hulukilwa, iya me hala mu kale ovanadhondunge movipuka oviwa, kalen̯i kokule novipuka ovivi. 20Iya napano Kalunga kouwa ma ka nyanyauna dhiva Satana kohi yodhompadhi dhen̯i. Et̯ilonkenda lyaMuhona wetu Jesus ngali kale nan̯e.
Omameneko
21Timoteus omuundapi omukwetu, novetu ooLukius nooJason nooSosipater mave mu menekele po.#Ovil. 16:1
22Ame Tertius, ngumba sonekethwa omukanda hembu, me mu menekele po muMuhona.
23Gaius, mpandji kala, me mu menekele po. Monganda ye omo mu onganena ovakwaneongalo. Erastus nguu ungula odhombongo dhotjitungwalongo nomukwetu Kwartus mave mu menekele po.#Ovil. 19:29; 1 Kor. 1:14; 2 Tim. 4:20 24Et̯ilonkenda lyaMuhona wetu Jesus Kristus ngali kale nan̯e. Amen.
Ealikano lyokutumbaleka
25Kalunga nga tumbalekwe. Ye u na odhonkono oku mu koleka meitavelo pandaka ombwa yandje ndjimba teetha ouhunga naJesus Kristus nopaholololo lyotjiholekwa hitja holekelwe moluvedhe lwalukulu. 26Iya napano otjiholekwa tja holololwa momisonekwa vyovaprofeti nondaka yaKalunga yaapehe. Tja ivithilwa oviwan̯a, ovantu avehe opo ve mu itavele, wo ve mu tyee.
27Kalunga vala aika nguu li omunongo nga tumbalekwe apehe katee apehe. Amen.
Dhimba New Testament © Bible Society in Namibia, 2010.