Yokaana 4
4
OYesu nʼomukali oMusamaliya
1Awo aBafarisaayo ni bawura nti oYesu yaali atungire obumanyiki era ngʼakubatiza abeegesebwa baingi okusinga oYokaana. 2Baitu oYesu omwenyenere tiniye yaali akubatiza, abeegesebwa baamwe nibo baabatizanga. 3Niyeetejerye kini, nʼazwa e Buyudaaya nʼairayote e Galiraaya. 4Oku mulundi guni yaali nalina okwakaara e Samaliya.
5Awo nʼaika omu Samaliya omu kibuga ekyetebwa Sikari, ampi nʼekibanja oYakobo kyeyaali nawaire omutaani waamwe oYusufu. 6Ani nigyo waali eizuba rya Yakobo, oYesu weyaikaliire omwiyangwe nakeerwe olwa lugendo.
7Omukali oMusamaliya niyaizire okwizuba okusyoma amaizi, oYesu nʼamukoba ati, “Mpeeryaku amaizi nnywe.” 8Omu bwire obwo abeegesebwa baamwe baali nibaabire okugula emere omu kibuga.
9Omukali oMusamaliya nʼakoba oYesu ati, “We oli Muyudaaya njete ndi mukali Musamaliya, osobola otyai okunsaba amaizi ga kunywa?” (ABayudaaya tibaayimbyanga nʼaBasamaliya.)
10OYesu nʼamwiramu ati, “Niwaakuli omaite ekitwo kya Kanca nʼoyo akukusaba amaizi okunywa, waakumusabire era yeena yaakukuwaire amaizi agaleeta obwomi.”
11Omukali nʼamukoba ati, “Tolina kyakusenesya ngʼate eizuba rirai, ati amaizi ago agaleeta obwomi wagaiya ayi? 12We oli mukulu okusinga ozeiza waiswe oYakobo, eyatuwaire eizuba rini, era ye omwenyenere mweyanywanga, abaana baamwe nʼebitugwa byamwe?”
13OYesu nʼamwiramu ati, “Buli muntu anywa amaizi gani airamu okukwatwa amalo, 14baitu buli muntu anywa amaizi gengaba taliiramu kukwatwa malo. Ekyʼamananu, amaizi gendimuweerya galimufookera ensulo ereeta obwomi obutawaawo.”
15Omukali nikwo okumukoba ati, “Mukama wange, mpeerya amaizi ago ndeke kwiramu kukwatwa malo nʼobutairanga ani kusyoma maizi.” 16OYesu nʼamukoba ati, “Yaba, oyete oiba waamu era oire.”
17Omukali nʼamwiramu ati, “Tindina iba wange.”
OYesu nʼamukoba ati, “Obazire mananu nokobere nti tolina ibaawo. 18Kubba waakabandulwaku abasaiza bataanu era omusaiza gwolina ati buni ti ibaawo. Ekyobazire kiikire.”
19Omukali nikwo okumukoba ati, “Ati nkwetejerye, oli mulangi. 20Abazeiza baiswe baaramiryanga ku lusozi luni baitu nywe aBayudaaya mukoba nti ekifo gyetuteekwa okuramirya kiri mu Yerusaalemu.”
21OYesu nʼamukoba ati, “Mukali we, ikiriza kyenkukukoba, ebiro bikwiza nimutakwiza kuramiryanga Ite waiswe ku lusozi luni gonze omu Yerusaalemu. 22Nywe aBasamaliya muramya kyemutamaite, baitu iswe turamya kyetumaite, kubba obujuni buzwa mu Bayudaaya. 23Baitu obiro bikwiza era biikire abantu abaramya omu ngeri eikire baramyenge oIte waiswe omu mwoyo nʼamananu, kubba oIte waiswe abamuramya batyo nibo ayendya. 24OKanca mwoyo, nʼabamuramya bateekwa okumuramirya omu mwoyo nʼamananu.”
25Omukali nʼairamu ati, “Ati buni neetejerye nga niiwe Masiya (era ayetebwa oKurisito) akwiza. Kubba ye naliiza, alitusoboora abintu bini byona byona.”
26OYesu nʼamukoba ati, “Ninjembe akubaza naawe.”
27Omu kaseera ako akenyenere abeegesebwa baamwe nibaire, ni beewuunya okumusanga nakubaza nʼomukali. Baitu ndoowo yabwirye nti, “Okwendya ki” oba nti, “Lwaki okubaza nʼomukali?”
28Awo omukali nʼalekawo ensuwa yʼamaizi, nʼairayo omu kibuga nʼakoba abantu ati, 29“Mwize, mubone omusaiza ankobore ebintu byona byona byenakoore. Yaakubba oKurisito?” 30Abantu ni bazwa omu kibuga ni baaba oYesu weyaali.
31Omu bwire obwo, abeegesebwa ni bamwesengeerya bati, “Mwegesya, lya oku kamere.”
32Baitu oYesu nʼabakoba ati, “Ndina ekika kya mere nywe kyemutamaite.”
33Abeegesebwa ni babuulyangana bati, “Waakubba niwaliwo omuntu amuleeteire emere?”
34OYesu nʼabakoba ati, “Emere yange nikwo okukola eyantumire byayendya nʼokumaliirya omulumo gwamwe. 35Nywe mukukoba nti, ‘Wasigaireyo emyezi enai amakungula gaike.’ Baitu nkubakoba, mwimule amaiso mubone emisiri! Ebyana biikire okukungula. 36Omukunguli aweebwa empeera yaamwe, nʼakumbaania ebyana nga nibwo obwomi obutawaawo. Ale omusigi nʼomukunguli ni basemereerwa amwei. 37Olwʼekyo embanzo gini nʼeikiira ekoba eti, ‘Omuntu omwei yasigire owondi nʼakungula.’ 38Nabatumire okukungula ebyemutaasigire. Abantu abandi nibo baagadire, baitu nywe ni mukungula byebaakoore.”
ABasamaliya baingi abaikiriize
39ABasamaliya baingi abaabbanga omu kibuga ekyo ni baikiriza oYesu omukali niyabakobere nti, “Ankobere byenakolanga.” 40Awo aBasamaliya nibaizire gyali, ni bamwesengeerya abbe nabo, era yeena nʼabba nabo ebiro bibiri. 41Abantu baingi ni baikiriza oYesu olwa bigambo byamwe.
42Ni bakoba omukali bati, “Ati tukwikiriza nitutakusigikira ku bigambo byobazire, baitu kubba twewuliriireku iswenkai era twetejeirye kimwei nti oni niye Mujuni wa nsi.”
OYesu akutamba omwana wa Mukungu
(Mat 8:5-13; Luk 7:1-10)
43Niwaayakairewo ebiro bibiri, oYesu nʼayaba e Galiraaya. 44(OYesu omwenyere yaali amaare okubaza nti omulangi tabba na kitiinisya omu nsi gyabyalwa.) 45OYesu niyakire e Galiraaya, abantu baayo ni bamutangiira, kubba baaboine ebintu byeyakoleire e Yerusaalemu oku Bugenyi bwa Kwakalibwaku, kubba boona baaliyo. 46OYesu niyaireyote omu Kaana e Galiraaya, gyeyafooleire amaizi omwenge gwa zabbibbu, nʼasangayo omukungu eyaalina omwana omulwaire omu kibuga kya Kaperenawumu.
47Omukungu oni niyawuliire nti oYesu aikire e Galiraaya nakuzwa e Buyudaaya, nʼayaba gyali nʼamusaba aize atambe omwana waamwe eyaali nali ampi okufa. 48OYesu nʼamukoba ati, “Nnywe timusobola kwikiriza okwiyaku nimuboine obubonero obwewuunyisya nʼebyʼamaano.”
49Omukungu nʼakoba ati, “Mukama wange, twabiranwe ewange omwana wange atakafiire.” 50OYesu nʼamukoba ati, “Weeyabire, omwana waamu alulumukire.”
Omusaiza nʼaikiriza oYesu kyakobere nʼayaba. 51Niyaali acaali omu nzira, abairu baamwe ni bamwitirana ni bamukoba omwana waamwe alulumukire. 52Niyabwirye okweteja omutaani waamwe aweyatandikiire okubba okusai, ni bamukoba bati, “Omusuja gwawonere izo oku saawa nkʼomusanju eza misana.” 53Awo oite wa mwana nikwo okwizukira nti, nibwombe obwire oYesu weyamukobeire nti, “Omwana waamu alulumukire.” Olwʼekyo ye nʼabʼeka yaamwe ni baikiriza oYesu.
54Kani niko kabonero akeewuunyisya akakabiri oYesu keyakoore nakuzwa e Buyudaaya nakwaba e Galiraaya.
