Yokaana 1
1
OKigambo owa bwomi
1Omu kwekeera ensi etakawangirwe oKigambo yaaliwo, oKigambo oyo yaali amwei nʼoKanca era oKigambo yaali Kanca. 2Yaali amwei nʼoKanca okuzwera kimwei omu kwekeera. 3Omu ye ebintu byona byona nimwo byawangiirwe era ye waataali ndoowo kiwange ekyawangirwe. 4Omu ye nimwo muli obwomi, era obwomi obwo nibwo kyengeezi kyʼabantu. 5Ekyengeezi kyakira omu kiiruma, baitu ekiiruma nikitasobola kukirikirya.
6Waaliwo omuntu ayatumirwe oKanca, omuntu oyo yayetebwanga Yokaana. 7OYokaana oyo yaizire okusubiira abantu ebikufa oku kyengeezi ekyo, leke boona boona baikirize okwakala omu bukwenda bwamwe. 8Tiniye yaali ekyengeezi; yaizire kusubiira bantu ebikufa oku kyengeezi. 9Ekyengeezi ekyʼamananu ekya kwakira buli muntu kyali kikwiza omu nsi.
10OKigambo yaizire omu nsi, ensi oKanca gyeyawangire nakwakala omu ye, baitu ensi tiyamwetejerye. 11Yaizire omu nsi yaamwe, baitu abantu baamwe tibaamutangiriire. 12Baitu abo abaamutangiriire era ni bamwikiriza yabawaire obuyinza okufooka abaana ba Kanca. 13Baana ba Kanca abataabyairwe omu ngeri abantu gyebabyalwamu; baitu oKanca omwenyenere bani yabafoire okubba abaana baamwe. 14OKigambo yafookere omuntu era nʼabbaaku naiswe ngʼalina ekisa kingi nʼamananu. Twaboine ekitiinisya kyamwe, ekitiinisya kyeyatungire nkʼoMwana omwei yenkai oIte waamwe gweyabyaire. 15OYokaana yamubazireku nʼakoba ati, “Oni niyembe oyo gwenaali nkubazaku ninakobere nti, ‘Ye alinzwaku emababega, niye ansinga obukulu, kubba yaaliwo nje ntakabbairewo.’”
16Omu kisa kyamwe ekingi iswena iswena yatuwaire emikisa egikwabiirwanganaku. 17Kubba oKanca yatuwaire amateeka okwakala omu Musa, baitu ekisa nʼamananu byaleeterwe Yesu Kurisito 18Ndoowo muntu gonze omwei eyaali naboineku oKanca. OMwana waamwe omwei yenkai, alimbe ekimwei nʼoKanca era ngʼali amwei naye, niye yamutumanyisirye.
Obukwenda bwa Yokaana oMubatiza
(Mat 3:1-3; Mak 1:1-8; Luk 3:1-18)
19Abeebemberi bʼaBayudaaya omu Yerusaalemu ni batumira oYokaana abakabona nʼaBaleevi okumubuulya bati, “Niiwe naani?” 20OYokaana tiyalemerwe kubairamu; yabairemu nʼayatula ati, “Tininje Kurisito.”#1:20 Kurisito Kini kiri mu Luyonaani, omu Lwebbulaniya kiri Masiya, baitu bikali byombi bimanyisya Eyasukirweku amafuta.
21Ni baira ni bamubuulya bati, “Ati obwo niiwe naani? Niiwe Eriya?” OYokaana nʼabairamu ati, “Bbe.” Era ni baira ni bamubuulya bati, “Niiwe omulangi odi?” Ye nʼabairamu ati, “Bbe.”
22Awo ni bamubuulya bati, “Niiwe naani? Tuweerye ekiiribwamu kyetwatwara abaatutumire. We okwebazaku otyai?” 23OYokaana nikwo okubairamu nakukolesya ebigambo bya mulangi oIsaaya ebikoba biti, “Ninje iraka rya muntu akwamiira omwirungu ati, ‘Mugoroore oMukama enzira atambuuremu.’ ”#Isa 40:3 24Awo aBafarisaayo abamwei abaatumirwe 25ni babuulya oYokaana bati, “Niwaabba otali Kurisito, oba Eriya oba oMulangi, obwote lwaki obatiza?”
26OYokaana nikwo okubairamu ati, “Nje mbatiza na maizi, baitu omu nywe nimwo muli oyo gwemutamaite. 27Ye niye akundigaku ennyuma, gwentansemeire na kusandala buguwa bwa nkaito zaamwe.”
28Bini byona byona byabbaire Bbesaniya ebuwuluka bwa mwiga Yoludaani, oYokaana gyeyabatirizanga.
OYesu niye oNtaama omuto owa Kanca
29Enceege oYokaana niyaboine oYesu nakwiza gyali, nʼakoba ati, “Bona, oNtaama omuto owa Kanca, aiyawo ebibbi bya nsi! 30Oni niye gwenabazangaku nti, ‘Omuntu akunzwaku ennyuma mukulu okunsinga, kubba yaaliwo ntakabbairewo.’ 31Omu kwekeera tineetejerye nti niye oKurisito gonze nga naizire ninkubatiza nʼamaizi okumumanyisya egiri abantu ba Isirairi.”
32Awo oYokaana nʼaweerya obujuurwa ati, “Naboine oMwoyo wa Kanca nali omu kiisani kya nkaiba nakusirimuka okuzwa omwiguru, nʼaiza nʼamwikalaku. 33Baitu tinaakumwetejerye, oKanca eyantumire okubatiza nʼamaizi nataakunkobere nti, ‘Oyo oMwoyo gwasirimukireku era nʼamwikalaku niyembe oyo alibatiza nʼoMwoyo Akwera.’ 34Kini kyaliwo ni nkibona. Olwʼekyo nkukakatya nti omuntu oyo niye oMwana wa Kanca.”
Abeegesebwa ba Yesu abeekereire
35Enceege oYokaana yaalite nʼabeegesebwa baamwe babiri. 36Niyaboine oYesu nakwakalawo, nʼakoba ati, “Bona, oNtaama omuto owa Kanca!”
37Abeegesebwa baamwe ababiri beyaali nabo nibaawuliire oYokaana byeyabazire, ni basengeerya oYesu. 38OYesu niyayindukire nʼabona abantu abakumusengeerya, nʼababuulya ati, “Mukutoolya ki?”
Bo ni bamwiramu bati, “Labbi, oraara ayi?” (Labbi kimanyisya Mwegesya.) 39OYesu nʼabairamu ati, “Mwize, mwabonayo.”
Awo ni baaba ni babona gyeyaraaranga, ni babba naye ekiro ekyo. Esaawa zaali nkʼeikumi eza igolo.
40Andereya, omuganda wa Simooni Peetero niye omwei oku beegesebwa ababiri abaawuliire oYokaana kyeyabazire era nibo abaasengereirye oYesu. 41Ekintu ekikwekeera Andereya kyeyakoore kwali kutoolya na kukobera omugande oSimooni nti, “Tuboine oKurisito” 42Andereya nʼatwala oPeetero egiri oYesu. OYesu niyaboine oSimooni nʼamukoba ati, “Niiwe Simooni omutaani wa Yokaana baitu ati okwiza kwetebwanga Keefa,” (ekimanyisya Peetero#1:42 Peetero Kini kimanyisya “Lwazi”.).
OYesu akweta oFiripo nʼoNasanairi
43Enceege oYesu nʼasalawo okwaba e Galiraaya.
Niyaboine oFiripo nʼamukoba ati, “Nsengeerya.”
44OFiripo yaali wa mu kabuga ka Bbesusaida, Andereya nʼoPeetero boona gyebaabbanga. 45OFiripo niyaboine oNasanairi nʼamukoba ati, “Tuboine omuntu oMusa gweyawandiikireku omu Mateeka gʼaBayudaaya, era nʼabalangi gwebaawandikireku. Omuntu oyo niye oYesu owa Nazaaleesi, omutaani wa Yusufu.”
46ONasanairi nʼakoba ati, “Waliwo ekintu ekisai ekisobola okuzwa omu Nazaaleesi?” OFiripo nʼamukoba ati, “We iza obone.”
47OYesu niyaboine oNasanairi nakwiza nʼakoba ati, “Oni niye oMwIsirairi omwenyenere, omu ye ndoomu bugobya!”
48ONasanairi nʼamubuulya ati, “Waneetejerye otyai?”
OYesu nʼamwiramu ati, “Nakuboine niwaali noli ansi wa musaale omusikamooli, oFiripo nacaali kukweta.”
49Awo oNasanairi nʼayatula nʼakoba ati, “Mwegesya, oli Mwana wa Kanca; oli Mukama wa Isirairi!”
50Awo oYesu nʼamukoba ati, “Oikiriize kubba nkukobere nti nakuboine nocaali ansi wa musaale omusikamooli. Okwiza okubona ebikusinga ekyo obukulu bingi.” 51Era nʼaira nʼabakoba ati, “Mulibona eiguru niriswekukire, nʼabamalaika ba Kanca nibakutemba abandi nibakusirimuka oku Mwana wa Muntu.”
