Iluk 3
3
Iyohana ari Ibaptisma kyene ʊtira
(Imat 3:1-12; Imark 1:1-8; Iyo 1:19-28)
1Bidɔɔ ɛnyɛɛ atarhi ni ɔtɔng ami igumo Ikaisar arʊ sini ayirhi ngɛ ni Itibariya, akywa dang Ipontos Ibilatus kɔn ibʊng Iyahudiya, Ihiridus shoo ogumo Igalili, arupya Ifilibus ku igumo Ituruya kǝni Itarakunitas, Ilisaniyas kaa oshoo ogumo Abiliya. 2Bakywa dang Annas kǝni Ikayafas ani ogu ubyen Ʊnʊng. Bakywa dang Ʊnʊng ka ma Iyohana ɔnɔ Izakariya ngɛ itina ikpara sini ani bi idɔɔ orumo. 3Iyohana kǝkǝri kukum ʊbʊng ʊkʊkǝri Ugro Ijodan, asu tana irhing Ʊnʊng, “Inyi tere eshere ʊya ngɛ aki asany ibaptisma, Ʊnʊng nʊpʊna ʊya nyi ngɛ.” 4Kǝni sini ɔwori bidɔɔ ʊyaa ʊsha iring arʊ pɛrɛ onuo Ʊnʊng Ishaya ni:
“Ihywi opyo arʊ ku yirha bi idɔɔ orumo,
‘Kyene Ete ngɛ ʊtira,
kyene ngɛ ʊtira itituku.
5 Ku kǝni ukwoo anu tirɛ wɔ,
ku kǝni ukro kǝni ʊvra anu wurho wo okyo nɛmɛr,
Itira ugugumo nʊ nawa itituku,
itira ʊgbragbrarha nʊ sa igyang.
6 Orokru kukum nu rong oforo Ʊnʊng.’ ”#3:6Isha 40:3-5
7Iyohana ka sani ʊshi orokru sini okuni asu kyeng ba aki asamo Ibaptisma ni, “Inyi ɔnɔ iyow ibibi! Iyaa taniny ni inyi ting anang Ʊnʊng sini akye ba? 8Inyi si imi sini inu yen asani inyi tere baa ʊyany. Inyi bekya tikpa ʊsa nʊ opyo nyi ni Ibraim ngɛ ni ekperi arʊ. Kii itani nyi ni Ʊnʊng nʊ shu ukyene Ibraim ngɛ ɔnɔ ni atari yen. 9Ikywerhe karha to ba para ashi, kǝnawo ku kǝni ʊshi sini uno sumowo ɔnɔ adadʊma anu kpawo ɛfɛn kidɔɔ ʊra.”
10Ushi orokru ko gyurho, “Arʊ nʊ sa nenyee nɛchiyɛn?”
11Iyohana ko yoromo, “Arʊ sini ani ʊgbɛ ʊpari ngɛ ama arʊ sini asa ni yoo, arʊ sini oboshoo ni ʊmʊra ngɛ kaa asa kǝna.”
12Arʊ yirha ogon kamo abii aba samɔ Ibaptisma oko gyurho ngɛ, “Avuwa, ikimoyo arʊ nʊ sa?”
13Iyohana kasani moni, “Karhi inyi kya yirha epiri imasini inyi tani ʊyirha.”
14Ikpara dang opyoo arʊ tɛi ikɔ ko gyurho ngɛ asani, “Arʊ ni sa nenyee wo?”
Oko yoromo asani, “Karha inyi kya karha ʊfɛ bavu araru ni ikrʊ, boshoo orokru sesa ima inyi sani asayo, inyi yoro ni ima sini akʊ kpurany.”
15Orokru kasu yoro ʊsha asu tiri ikywi ni arʊ sa oforo, kukummo akasʊ wɔrɔfo asani kii inushe ushoo asani Iyohana ngɛ ani ɛkǝri Ikristi. 16Iyohana ka yoro mo kukum, “Isiny Ibaptisma ni omung. Yip opyo arʊ sini eprimi ni imɔru yeba, sini ko iwe ataka ngɛ isamam ushereyo. Anu sany Ibaptisma ni Ʊring Ʊshisha kǝni ʊra. 17Ʊfrɔɔ ʊpɛrhɛ ngɛ ni ba avu sini ani puna ʊgba ʊpɛrhɛ ngɛ otuno ikiri ogro asa kidɔɔ ɔfɔ, anu pya ɛkǝri iwung ni ʊra sini unokpowo.” 18Iyohana kɔ wɔɔ atung ɛkǝri orokru bekai ʊring napany nisini akʊ tanamɔ ʊring Ʊnʊng.
19Yip ni sini Iyohana tani ogumo Ihiridus ngɛ ʊyaa ngɛ bekai ubara ngɛ kǝni Ihirudiya ere arupya Ifilibus, kǝni kukum eteting sini asi, 20Ihiridus kojo sa opyo eteting ba aya anyan ngɛ. Sini asi aka afri Iyohana ngɛ bidɔɔ ʊbɔrʊ eting.
Ibaptisma Iyesu
(Imat 3:13-17; Imark 11:9-11)
21Sini Iyohana kywɛri ʊsa orokru Ibaptisma kukum, aka sa Iyesu ngɛ Ibaptisma kaa. Ni sini akʊ sɔrhɔ Ʊnʊng ayaya kayewe. 22Ering Ʊshisha ko shuro bayaa ani kǝni Ikrim ni. Ihywi ko kuno ba ayaya: “Ʊnwʊɔ ʊni Ɔnɔm, sini ɛwɛi ngɛ; ini ofofuru ngɛ nagang ni ʊnwɔ.”
Edei Iyesu
23Nɛchiyɛn Iyesu ʊkaa ete kyu fwa ɛnyɛɛ isitarʊ aka kpin ʊtʊna ngɛ. Ɛngɛɛ ni ɛkǝri ɔnɔ, orokru kasu yirha ngɛ ni ɔnɔ Isufu, Isufu ngɛ ni,
ɔnɔ Iheli 24Eli ngɛ ni ɔnɔ Imatthat,
Imatthat ngɛ ni ɔnɔ Ilevi, Ilevi ngɛ ni ɔnɔ Imelki
Imelki ngɛ ni ɔnɔ Ijanni, Ijanni ngɛ ni ɔnɔ Isufu,
25Isufu ngɛ ni ɔnɔ Imattatias, Imattatias ngɛ ni ɔnɔ Amos,
Amos ngɛ ni ɔnɔ Inahum ɔnɔ Esili, Esili ngɛ ni ɔnɔ Inaggai 26Inaggai ngɛ ni ɔnɔ Imaat,
Imaat ngɛ ni ɔnɔ Imattatiyas, Imattatiyas ngɛ ni ɔnɔ Isemein,
Isemein ngɛ ni ɔnɔ Ijosech, Ijosech ngɛ ni ɔnɔ Ijoda,
27Ijoda ngɛ ni ɔnɔ Ijowana, Ijowana ngɛ ni ɔnɔ Irhesa,
Irhesa ngɛ ni ɔnɔ Izerubbabel, Izerubbabel ngɛ ni ɔnɔ Isheyatiyel,
Isheyatiyel ngɛ ni ɔnɔ Ineri, 28Ineri ngɛ ni ɔnɔ Imelki,
Imelki ngɛ ni ɔnɔ Addi, Addi ngɛ ni ɔnɔ Ikosam, Ikosam
ngɛ ni ɔnɔ Elmadan, Elmadan ngɛ ni ɔnɔ Eri,
29Eri ngɛ ni ɔnɔ Ijoshua, Ijoshua ngɛ ni ɔnɔ Iliyaza,
Iliyaza ngɛ ni ɔnɔ Ijorim, Ijorim ngɛ ni ɔnɔ Imattat,
Imattat ngɛ ni ɔnɔ Ilevi 30Ilevi ngɛ ni ɔnɔ Isimiyon,
Isimiyon ngɛ ni ɔnɔ Iyahuda, Iyahuda ngɛ ni ɔnɔ Isufu,
Isufu ngɛ ni ɔnɔ Ijonam, Ijonam ngɛ ni ɔnɔ Iliyakim,
31Iliyakim ngɛ ni ɔnɔ Imeleya, Imeleya ngɛ ni ɔnɔ Imenna,
Imenna ngɛ ni ɔnɔ Imattata, Imattata ngɛ ni ɔnɔ Inathan, Inattata ngɛ ni ɔnɔ Idouda, 32Idouda ngɛ ni ɔnɔ Ijesi,
Ijesi ngɛ ni ɔnɔ Obed, Obed ngɛ ni ɔnɔ Iboaz,
Iboaz ngɛ ni ɔnɔ Isalmon, Isalmon ngɛ ni ɔnɔ Inashon,
33Inashon ngɛ ni ɔnɔ Amminadab, Amminadab ngɛ ni ɔnɔ Iram,
Iram ngɛ ni ɔnɔ Ihezron, Ihezron ngɛ ni ɔnɔ Iperez,
Iperez ngɛ ni ɔnɔ Ijuda, 34Ijuda ngɛ ni ɔnɔ Iyakubu,
Iyakubu ngɛ ni ɔnɔ Ishaku, Ishaku ngɛ ni ɔnɔ Ibraim,
Ibraim ngɛ ni ɔnɔ Iterah, Iterah ngɛ ni ɔnɔ Inabor,
35Inabor ngɛ ni ɔnɔ Iserug, Iserug ngɛ ni ɔnɔ Ireu,
Ireu ngɛ ni ɔnɔ Ipeleg, Ipeleg ngɛ ni ɔnɔ Iber,
Iber ngɛ ni ɔnɔ Ishelah, 36Ishelah ngɛ ni ɔnɔ Ikɛnan,
Ikɛnan ngɛ ni ɔnɔ Arfaza, Arfaza ngɛ ni ɔnɔ Ishem,
Ishem ngɛ ni ɔnɔ Inuu, Inuu ngɛ ni ɔnɔ Ilamek,
37Ilamek ngɛ ni ɔnɔ Imetusela, Imetusela ngɛ ni ɔnɔ Enok,
Enok ngɛ ni ɔnɔ Ijared, Ijared ngɛ ni ɔnɔ Imahalale
Imahalale ngɛ ni ɔnɔ Ikɛnan, 38Ikenam ngɛ ni ɔnɔ Enosh,
Enosh ngɛ ni ɔnɔ Iset, Iset ngɛ ni ɔnɔ Adamu,
Adamu ngɛ ni ɔnɔ Ʊnʊng.
©️2025 Luke Initiative for Scripture Translation