लुका 2
2
येसुक जनम
(मत्ति १:१८-२५)
1ओहे समैम रोमि माहारजा अगस्टसले आप्न अधिनम भेल सभे देसम मानुकसिक गन्ति कर लागि हुकुम देल्के। 2यि सभेस सुरुक गन्ति कर लागि हुकुम छले। उजुमा सिरिया देसक सासक कुरेनियस छले। 3माहारजाक हुकुम भेल कारनस सभे जना ना दर्ता कराब लागि आप्न-आप्न पुर्खौलि गाँ आ सहर गेले।
4उजुमा योसेफ गालिल पर्देसक नासरत सहरम रहत छले। तर ओक्र आप्न सहर चाहिं रजा दाउदक सहर यहुदिया पर्देसक बेथलेहेम छले किरकि उ दाउदक कुलक छले। ओहेस उ आप्न ना दर्ता कराब लागि बेथलेहेम सहर गेले। 5योसेफले आप्नसङ मरियमका पनि लगाइल्के किरकि ओकर्सिक बिह्या कर लागि दिन् ठेकि सक्ल छले। उजुमा मरियम देहभारि छले। 6ओकर्स्या बेथलेहेमम रहले जुमा मरियमले बच्चाका जनम देल्हार बेला भेले। 7अनि मरियमले आप्न जेठ्का बेटाका जनम देल्के आ नुङाम सेंरिक गोहालिक एगो नाबरम#2:7 नाबर कहल पसुसिका अँह्रा देल्हार डोङ स्यो। सुताइल्के किरकि ओकर्सिक लागि ओइलग कुन्हुँ धर्मसालाम खालि ठाउँ नाइ छले।
सोर्गदुत आ भेरा चर्भासब
8उजुमा ओहे आस्पासक चौरिम भेरा चर्भास्या राति खुमा आप्न भेरासिका ओग्रिक बेठ्ल छले। 9ओहे जुमा अन्चक्एम प्रभुक सोर्गदुत ओकर्सिक अगाम देखा पर्ले आ प्रभु पर्मेसोरक इजोत ओकर्सिक चारोभर चम्कले। यि देखिक भेरा चर्भासब डरस लद-लद काँप लग्ले। 10तर सोर्गदुतले ओकर्सिका कहल्के, “तोर्स्या नाइ डेरा! किरकि हम सभे मानुकसिका एक्दम आनन्द देल्हार खुसिक खबर लइक आइल स्यो। 11आजु रजा दाउदक सहरम तोर्सिक लागि एक जना मुक्ति देल्हारक जनम भेल छो। ओहे मुक्ति देल्हार खिरिस्ट आ प्रभु स्यो। 12ओक्रा चिनक लागि यि चिनह हेतो, तोर्स्या एगो बच्चाका नुङाम सेंरिक नाबरम सुताइल भेटाइब।” 13ओहे जुमा आरो थुप्रे सोर्गदुतसब देखा पर्ले आ पर्मेसोरक पर्संसा कर्ति एनामे गितकाब लग्ले,
14“सोर्गम पर्मेसोरक जयजयकार हउस,
आ पिर्थिबिम जुन मानुकसिसङ पर्मेसोर खुसि छो ओकर्सिका सान्ति हब्ति रहुस।”
15एतेक कहिक सोर्गदुतसब फेरि सोर्ग गेले। तब भेरा चर्भास्या आपसम एनामे कहल्के, “ले आब् आपन्स्या बेथलेहेम सहर च आ पर्मेसोरले कहल घट्नाका देखम।”
16ओहेस ओकर्स्या झप्सिन-झप्सिन गेले। अनि ओत पुग्ले त मरियम, योसेफ आ बच्चाका चाहिं नाबरम सुताइल देखल्के। 17तब भेरा चर्भास्या सोर्गदुतले बच्चाक बारेम कहल बात सभेका सुनाइल्के। 18भेरा चर्भास्या कहल बात सुनिक मानुकसब छक पर्ले। 19तर मरियमले यि सभे बातसब आप्ने मनम राखिक सोच्ति छले। 20पछास भेरा चर्भास्या सोर्गदुतले कहले जक्या देख आ सुन पाइक पर्मेसोरक जयजयकार आ पर्संसा कर्ति घुमिक गेले।
बच्चाक ना येसु राख्ल
21जब बच्चाका जनम भेल आठ दिन् पुग्ले त यहुदिसिक धार्मिक नियम अन्सार खत्ना करिक बच्चाक ना येसु राखल्के, जुन ना मरियम देहभारि हबस अगाहि सोर्गदुतले राख्ह्य कहल छले।#लेबि १२:३; लुका १:३१
येसुका पर्मेसोरक मन्दिरम सुम्पल
22जब मोसाले देल नियम अन्सार ओकर्सिक छुटहर भगाइलाहार#2:22 जब कुन्हुँ यहुदि जनिले बेटाका जनम दिएक त उ जनि चालिस दिन् पछा मत्रे मन्दिरम जाइ पाबेक आ मोसाले देल नियम अन्सार छुटहर भगाब लागि बलि चर्हाबेक। दिन् पुरा भेले त येसुका बाप-मतारले पर्मेसोरका सुम्प लागि येरुसलेमक मन्दिरम लगाइल्के।#लेबि १२:६-८ 23किरकि पर्मेसोरले मोसाका देल नियमम एनामे निख्ल छो, “हरेक जेठ्का बेटा पर्मेसोरका सुम्प पर्तो।”#प्रस्थान १३:२-१२ 24ओहेस ओकर्स्या पर्मेसोरक नियमम कहल अन्सार एक जोर ढुकुर कि पेर्बाक बच्चा बलि चर्हाब गेले। 25उजुमा सिमियोन कहलाहार धर्मि आ पर्मेसोरक भक्ति कर्लाहार मानुक यरुसलेम सहरम छले। ओइले इस्राएलिसिका बचाब आइलाहार मान्खक पैरा ताक्ति छले। अनि पबित्र आत्मा ओक्र उप्रिम छले। 26पबित्र आत्माले अगाहि सिमियोनका एनामे कहल छले, “तुइं पर्मेसोरले पठाइल मुक्ति देल्हार खिरिस्टका बिना देखिक नाइ मोर्ब।” 27ओहेस सिमियोन पबित्र आत्माक अगुवाइस मन्दिरम गेले। ओहे जुमा धार्मिक नियमका पुरा कर लागि मरियम आ योसेफ पनि बच्चा येसुका लइक मन्दिरम पुग्ले। 28तब सिमियोनले बच्चाका आप्न कोराम लइक पर्मेसोरक पर्संसा कर्ति एनामे कहल्के,
29“हे प्रभु, तुइं आप्न बचनका पुरा कर्ल,
आब् आप्न दासका सान्तिस यि सन्सारस जाइ दे।
30किरकि हम्र आप्ने आँखिस तोर पठाइल मुक्ति देल्हारका देख्ल्यो।
31जक्रा तुइं सभे मानुकसिक लागि तयार कर्ल स्या।
32एहे दस्रो जातक मानुकसिका तोर पैरा देखाइलाहार इजोत स्यो,#यसैया ४२:६; ५२:१० आ तोर आप्न पर्जा इस्राएलिसिक लागि गौरब स्यो।”
33बच्चाक बारेम सिमियोनले कहल बात सुनिक बाप-मतार छक पर्ले। 34तब सिमियोनले ओकर्सिका आसिक देति मरियमका कहल्के, “देख्, यि बच्चा पर्मेसोरले पठाइल एगो एहेन चिनह स्यो, जक्र बिरोध थुप्रे मानुकस्या कर्तो। एहे कारनस इस्राइलम थुप्रे मानुकसिक नास आ उद्दार हेतो। 35अनि थुप्रे मानुकसिक् मन भित्रिक बिचारसब पर्कट हेतो तर तोर मन चाहिं चोख तर्बारस भोक्ल जक्या एक्दम दुखाइतो।”
36ओइ मन्दिरम एक जना हन्ना ना भेल बुर्ह्या अगमबादिनि पनि छले। उ आसेर कुलक फनुएलक बेटि छले। ओक्र बिह्या भेलक साते बरिसम उ बिध्वा भेल छले। 37उजुमा ओक्र चौरासि बरिस पुग्ल छले। ओइले कह्याहु मन्दिर नाइ छोरेक तर उपबास#2:37 उपबास कहल भुख सहिक पर्मेसोरसङ समै बिताब स्यो। रहिक पर्थना कर्ति दिन-रात पर्मेसोरक सेबा करेक। 38ओहे जुमा हन्ना पनि मरियम आ योसेफक लगम जाइक पर्मेसोरका धन्येबाद देति यरुसलेमक मानुकसिका मुक्ति देल्हारक पैरा ताक्लाहार सभेका बच्चाक बारेम कहल्के। 39जब योसेफ आ मरियमले पर्मेसोरक नियम अन्सार कर पर्लाहार सभे काम करि सकल्के त ओकर्स्या आप्ने सहर नासरत घुमिक गेले।#मत्ति २:२३ 40पछास बच्चा येसु बह्र्ति गेले आ जोर्गर हब्ति ग्यान, बुद्धिस भोर्ति गेले। अनि पर्मेसोरक आसिक येसुक उप्रिम छले।
येसु पर्मेसोरक मन्दिरम
41येसुक बाप-मतार बर्से पिछो निस्तार पब्नि मनाब यरुसलेम जाबेक।#प्रस्थान १२:१-२७ 42ओहेस जब येसु बार बरिसक भेल त ओकर्स्या येसुका पनि सङि लइक पब्नि मनाब यरुसलेम गेले। 43अनि पब्नि ओराइ सक्ले त ओकर्स्या घर घुम्ले तर येसु चाहिं यरुसलेमेम रहले। यि बात येसुक बाप-मतारका थाहा नाइ भेले। 44येसु पैराम हिंठ्लाहार मानुकसिसङ छो कहिक ओकर्स्या दिन् भोरिक पैरा हिंठिक गेले। अनि साँझ खुमा येसुका आप्न आ चिन्ल मानुकसिलग खोज लग्ले। 45तर येसु कटु नाइ भेट्ले। ओहेस ओकर्स्या येसुका खोज फेरि यरुसलेम घुमिक गेले। 46खोज्त-खोज्त तिन दिनक पछा ओकर्स्या येसुका मन्दिरम भेटाइल्के। उजुमा येसु धर्मगुरुसिसङ बेठिक ओकर्सिक बात सुन्ति परस्न पुछ्ति छले। 47सुन्लाहार सभे जना येसुक ग्यान, बुद्धि आ उत्तर देल देखिक छक पर्ले। 48येसुक बाप-मतार पनि बेटाका ओइलग देखिक छक पर्ले। अनि येसुका मतारले कहल्के, “बेटा, तुइं हमर्सिका छोरिक किर एना कर्छ? देख् त तोर बाप आ हम कतेक चिन्ता करिक तोरा खोज्योक।”
49तर येसुले ओकर्सिका कहल्के, “तोर्स्या हम्रा किर खोज्छ? हम्रा हम्र बापक घरम रह पर्तो कहिक तोर्सिका थाहा नाइ छो झन?” 50तर येसुले कहल बात मरियम आ योसेफले बुझ नाइ सकल्के।
51तब येसु आप्न बाप-मतारसङ नासरत गेले आ ओकर्सिक आग्याकारि भइक रहले। येसुक मतारले यि सभे बात आप्ने मनम राखल्के। 52अनि येसु पर्मेसोर आ मानुकक दया पाइक बुद्धि आ देहम बह्र्ति गेले।
© 2024 (Active), Mother Tongue Translators Society and Wycliffe Bible Translators, Inc. All rights reserved.