Lukka 2
2
Weledu tee Yesu
(Matthew 1:18-25)
1Fih waakati weede ligo Yokana mee weledu, Sultan ab tee guddrra Agusto amrisha gali annas kuul ab ggi geni fih mamlaka tee Romu ummon endis tee katif asmma tomon fih kitabu tee Bele. 2Weede yaa kaan mara tee awlan Bele tee Romu amrisha nee annas kuul katif asmma tomon. Dukur weede kaan fih ligo Kuleniyo yaa kaan gavana tee Bele tee Siria fih mamlaka tee Romu. 3Dukur ini yaa killa wayyi ruwa fih meddina tomon fih katif asmma tomon. 4Ini yaa Yusufu kaman taala fih Nazaresi tee Galilaya, dukur uwo ruwa fih meddina ab ggi weledu uwo fogo meddina tee Sultan Daudi ab ggi naadi Bethlekem tee Yudaaya, kalam uwo kaan taala fih kabila tee Daudi. 5Yusufu ruwa fih katif uwo bakaan wayyi mee Mariyam. Kalam kaan ummon kaan ggi adul jooju tomon, mee Mariyam kaan ggi steenu weledu. 6Waakati Yusufu mee Mariyam ligo ummon lissa fih inna, waakati tee Mariyam tee weledu nyereku tim. 7Dukur oweledu nyereku too tee awlan ab kaan yowele, okati uwo fih gumasa dukur okutu uwo fih saani ab lamgaba ggi akul fogo. Kalam ummon maa ligo bakaan tee num fogo fih juwa tee diffaana.
Kabar ab kuweesi nee annas ab ggi chunnga kooru
8Fileli dee fih bakaan wayyi dee, kaan fih inna annas ab ggi chunnga kooru fih bakaan ab ggi akul fogo. 9Dukur fih gwaam zaidi, Malaika taala nee Rabbana dukur beenu noomon mee hishima tee Rabbana jee taa ab ggi wara-wara beenu fih bakaan ab kaan ummon fih fogo, ladi ummon kaffu zaidi 10Ini yaa Malaika wonus mee annas ab kaan ggi chunnga kooru, “asmma kum, matta kum kaffu, kalam anaa ggi jibu nee itakkum kabar ab seme ab jaa jibu furaayi fih annas. 11Kalam naare weledu nyereku fih meddina tee Daudi Bethlekem muhlis teena Kristo. 12Wedede yaa bijja kun alama ab itakkum bijja faham fogo nyereku dee! Itakkum bijja ligo uwo ligo lifu uwo fih gumasa ligo onum fih saani ab lamgaba ggi akul fogo.” 13Fih gwaam zaidi kom tee Malaika min samayi beenu nee Malaika tee awlan, ummon kuul abidu abdu Rabbana ligo ummon ggi kelem
14“Hishima kee aarja nee Rabbana ab fih foo zaidi mee raha kee kun noomon fih duniya ab Rabbana ggi furaayi noomon!”
15Bakaan Malaika dee aarja fih samayi, annas ab kaan ggi chunnga kooru dukur ummon wonus badum tomon, “kede inna ruwa fih meddina tee Bethlekem aseede” kee inna ruwa fih meddina tee Bethlekem saa dee dukur inna ayinu nyereku dee ab Rabbana weri nee inna fih futu Malaika. 16Ini yaa ummon ruwa fih gwaam fih meddina Bethlekem, ummon gussu nyereku ladi ummon loggo Mariyam mee Yusufu, dukur ummon ayinu nyereku ab kaan num minjuwa tee saani ab lamgaba ggi akul fogo. 17Ini yaa waakati annas aba ggi chunnga kooru dee ayinu nyereku dee, ummon kelem nee killa wayyi kabar ab Malaika kelem noomon ab ggi amsuku fih nyereku dee. 18Killa ajol ab asmma kabar annas ab ggi chunnga kooru kelem, ummon shannga zaidi. 19Lakin Mariyam chunnga kabar dole ligo tee faida zaidi dukur uwo fudur ligo uwo ggi feker fogo ummon. 20Dukur annas ab kaan ggi chunnga kooru ummon aarja fih bakaan abkan ummon ggi saraa fogo kooru tomon, ligo ummon ggi siiffa mee shukur nee Rabbana, fih killa sokol ab ummon jaa asmma mee ab ummon jaa ayinu jee nammna weri noomon fogo.
21Waakati nyereku dee tim yom tamaniya, dukur taaru wo jee sharia tee Musa kaan fih, wu Babba Yusufu too mee mamma Mariyam too wedi noowo asmma tee Yesu. Kalam Malaika kaan kelem nee Mariyam wedi nee nyereku dee asmma wedede kabbla Mariyam maa lissa aamili.
Yesu ggi wedi uwo fih Yeekalu
22Waakati yom tee Mariyam tee abnedif uwo kalas, jee nammna ab tee sharia tee Musa ggi kelem. Dukur ummon sulu nyereku dee Yesu fih-fih Yeekalu fih Jerusalem kede wedi uwo nee Rabbana. 23Ummon soh wedede fih ab jaa katif tee Rabbana, “killa nyereku yowele tee awlan endis tee wedi fih soh kidima nee Rabbana.” 24Fih saa wayyi dee wazazi tee Yesu ruwa fih wedi sadaka jee sharia tee Rabbana ggi amrisha gali, “wedi kum sadaka tee hamam tenini.”
Simeoni ayinu hidaaya tee Rabbana
25Fih meddina kebir Jerusalem, kaan fih inna ragi ab ggi naadi uwo Simeoni okaan ragi seme ligo uwo ggi kaffu Rabbana. Mee kaman okaan ggi steenu Massia ab kaan bijja wedi hidaaya nee annas tee Israel. Wu kaman roho abnedif kaan fih bakaan wayyi moo uwo. 26Wu Roho abnedif kaan jaa kelem zaaman nee Simeoni gali, “Itaa maa bijja muttu kabbla lissa Itaa maa ayinu Kristo ab Rabbana jaa kelem liju.” 27Bakaan wazazi jibu nyereku Yesu fih Yeekalu fih wedi uwo nee Rabbana jee jaa katif uwo fih sharia tee Rabbana. Dukur roho abnedif faatiya nee Simeoni jaa fih midani tee Yeekalu. 28Simon dukur ayinu nyereku Yesu, uwo arfa uwo fih idda too ligo ggi oshukur nee Rabbana wu uwo kelem;
29“Ayi siddu tayi Rabbana, ludu labbi takki kee muttu fih raha kalam itaa soh jee nammna ab itaa jaa kelem nee anaa,
30Anaa ayinu hidaaya ab itaa liju kede jaa hidaaya annas takki.
31Uwo ab Itaa tayirisha nee annas takki kuul kede ayinu.
32Obijja kun jee nooru weri nee Rabbana nee annas ab maa tee Yudaaya.
Dukur yaa ggi jaa jibu hishima annas takki Israel.”
33Bakaan Yusufu mee Mariyam asmma kalama ab Simeoni wonus fih nyereku, ummon shannga zaidi. 34Ini yaa Simeoni baraka Yusufu mee Mariyam, dukur okelem nee Mariyam, “Rabbana nigitu nyereku weede fih jibu nee annas milaan fih Israel geeru min Rabbana mee taanin milaan bijja aarja nee Rabbana. Uwo bijja kun jee alama min Rabbana lakin milaan bijja amin uwo maa. 35Fih misho tee dole, fikra tee gelbba tee annas bijja faham. Mee kaman itaa Mariyam, singa ab ggibenu jee laruba bijja ataan gelbba takki.”
Anna Nebbi ab mariya
36Fih yom wayyi dee kaan fih inna Nebbi ab mariya ab kaan ginadi uwo Anna fih Yeekalu. Okaan binniya tee Fanuweli ab ggi taala fih kabila tee Aseri. Anna al kaan ajussi zaidi lakin uwo kalas saana saba fih jooju too ligo uwo lissa binniya dukur ragi dee muttu. 37Ini yaa uwo faddul bila ragi, fih saade uwo endis saana arba wu tamanin. Osulu mudda too ab milaan fih Yeekalu ligo uwo ggi abdu Rabbana futu fih womba mee sayim fileli mee minahara. 38Simeoni waakati ggi wonus nee Mariyam mee Yusufu, Anna jaa nee ummon dukur uwo abidu shukur nee Rabbana. Dukur uwo wonus kalama ab kaan ggi amsuku nyereku Yesu nee annas kuul ab kaan ggi steenu jaa tee Kristo jibu hidaaya nee annas tee Jerusalem.
Yusufu mee Mariyam ggi aarja fih Nazaresi
39Ini yaa Yusufu mee Mariyam bakaan ummon kalas soh jee sharia tee Rabbana ggi amrisha ummon soh, ummon aarja fih beyy tomon fih meddina tee Nazaresi fih Bele tee Galilaya. 40Bakaan nyereku Yesu rabba, okun tee guddrra fih gildu mee fih agil wu baraka tee Rabbana jaa kun fuguwo.
Yowele Yesu fih Yeekalu
41Killa saana Babba mee Mamma tee Yesu, ummon kaan ggi ruwa fih meddina Jerusalem ab kebir fih furaayi haffla tee futu fogo mee annas taanin tee Yudaaya. 42Waakati Yesu tim saana itinashar, oruwa mee Babba mee mamma too fih haffla tee futu fogo fih meddina tee Jerusalem ab kebir jee nammna ab kaan gihso moo killa saana. 43Waakati haffla kalas, Babba too mee mamma too ummon aarja beyy tomon lakin ummon maa jaa faham gali Yesu faddul fih Jerusalem. 44Babba too mee mamma too ummon jaa feker gali uwo kaan fih mee annas ab ggi ruwa bakaan wayyi mee ummon. Ummon masi yom wayyi, fih misho tee yom dee, ummon abidu gussu uwo fih annas tomon mee fih sabiyana tomon. 45Waakati ummon maja ayinu uwo, ummon aarja wara fih meddina Jerusalem ab kebir fih gussu Yesu. 46Fih yom talata ligo ummon ggi gussu uwo, ummon loggo uwo fih midani tee Yeekalu. Yesu kaan ligo geni mee annas tee tafsir sharia. Okaan ggi asmma fih kalama abkan ummon ggi tafsir mee asaadu ummon maswali. 47Annas kuul ab kaan ggi asmma Yesu, ummon kuul shannga agil ab uwo endis mee nammna ab uwo ggibisha fogo maswali ab annas tee tafsir sharia asaadu uwo. 48Bakaan mamma too mee Babba too ayinu uwo, ummon shannga. Dukur mamma too asaadu uwo, “nyereku tayi, ley itaa soh inna jeedde?. Anaa mee Babba takki inna kaan ggi gussu itaa ligo inna kaffu.” 49Ini Yesu jaa aarja fogo ligo oggi kelem gali, “ley itakkum kaan ggi gussu anaa?. Itakkum maa arfu jee anaa kaan endis tee kun fih juwa tee Rabbana Babba tayi?” 50Lakin mamma too mee Babba too maa jaa faham maana tee kalama ab uwo jaa kelem noomon.
Yesu ggi rabba fih agil mee fih huruma
51Badda kalama dolde, Yesu dukur aarja mee mamma too mee Babba too fih beyy tomon fih meddina tee Nazaresi bakaan ummon kaan ggi geni fogo. Lakin Mariyam chunnga kabar dole ligo tee faida zaidi dukur uwo fudur ligo uwo ggi feker fogo ummon. 52Yesu dukur rabba fih gildu mee agil. Annas dukur aju uwo zaidi wu kaman oggi furayisha Rabbana.
Nubi Bible by Beyond Translation is licensed under Creative Commons Attribution-ShareAlike 4.0 License.