Luke 2
2
Krais Amina Osi Mary
Emina ma ini uyo-etɔ onu Jisɔs
(Mattiu 1:18-25)
1Ogonu ku ima use onu, ku Caesar Augustus ɔgɔnɔ ewɔu yak ovid enwi ku Idak ugra Rome egedio enyiŋ emu ku ŋwid ubad onwi.
2Onyi onu ogonu ata akpa ubad enwi ku idiwid enyiŋ onwi idio ku ŋwid, kini omu Quirinius egede ugra ku ikpeghe Syria.
3Ene, ovid enwi egega uduŋ emu ididio enyiŋ ku ŋwid.
4Josef ŋgo, ogosi ku uduŋ Nazared ku ikpeghe uduŋ Galilee aga ku uduŋ onu David omu eku Bethlehem ku Judea, sia ku onyi ogonu onwi uvɔk onu David.
5Josef azaŋa ma Mary omu onyi ɔgɔmuɔ idilɔ omu agazaŋa ma udɨb idigidio enyiŋ ku ŋwid,
6kini omu emu ebak ku Bethlehem, umeh ene onyi,
7Ene, onyi eme akpa oyo onwi-eni izighi, ɔnɔŋ ede useh awaŋ, onyi, ɔnɔŋ ebei onyi odio ku ɔbukpɔ-ŋkilie atak-kpɔ sia ku ele numegebak enɔ emu ku uvɔk ikienwi.
8Onu ima okpɨme-ɔrɔŋ egebak ku ukɔ ku ikpɨghe ŋgaŋ onu, ekpɨme otu ɔrɔŋ emu ɔgɔ-esi onu.
Itro Onji Abazi ku ata Ɔnyɔŋ
9Ene ulagha-ulagha onu enjel Abazi ɔwuɔ ɔnɔ ima okpime-ɔrɔŋ uyima ufɔŋ Abazi ɔnɔŋ ayima agan emu ɔguk. Ene, ubighe ɔnɔŋ ɔmuɔ emu eke-eke.
10Onu enjel ɔdɔghɔ emu ogu, “Egubiak ubighe-ou, Ami nde edɨghe etu nzɔk evu omu odine ovid enwi eneŋere enji uniogid.
11Ɔgɔ-esi omu, oyo amina ku uduŋ onu Ɔfɔŋ David idinu Anyiŋ-inyiaŋa evu. Onyi onu Krais alagha onu Ɔfɔŋ.
12Onu omu ma onu idiɔŋɔ omu edide ivak Onyi: Evu megid nzek-oyo omu ewaŋ ku use enim ku ɔbukpɔ-ŋkilie atak-kpɔ.”
13Ene ku ulagha-ulagha onu, udim onu ima enjel ku heaven edidiana ma enjel onu etro Abazi, enɔŋ edɔghɔ ogu:
14“Etro Abazi ku heaven, emem ɔnɔŋ abak ku izɔŋ, ɔnɔ enwi omu onyi ɔfɔ udɔk ma emu.”
15Ene, kini omu ima enjel egelagha enyɔŋ heaven, ku ima okpɨme-ɔrɔŋ edɔghɔ gi ma ogu, egu, “Yak enyin ulagha omu iga ku Bethlehem, inɔŋ igiseh Anyiŋi-nyiaŋa omu Abazi egene enyin ivak omu.”
16Ene emu enɔŋ edi gu uzɔp, enɔŋ egid Mary ma Josef, ma nzek-Oyo sughu ana ku ɔbukpɔ-ŋkilie atak kpɔ.
17Onu kini okpime ɔrɔŋ egegid nsek-oyo, emu esughu enɔ ovid enwi su ima Enjel egezughu enɔ emu ebaŋa nzek-Oyo omu.
18Onu ile akpa ovid enwi omu egei nsiŋi onu ima okpɨme ɔrɔŋ egezughu enɔ emu.
19Onu Mary ɔmuɔ ovid kpɔ omu aga ku okid izighi, ɔnɔŋ ogre abaŋa emu.
20Ene, sughu ima okpime-ɔrɔŋ esɔ enyɔŋɔ ebine ɔrɔŋ emu, emu eneŋere etro Abazi. Ku ntak ovid kpɔ omu emu egei elagha egid kpa sughu enjel egezughu enɔ emu.
Utɨne-ibuu Onu Jisɔs
21Onu ku ɔyɨghɔ use itɨŋate tɔŋɔ oyo aga-mana, emu etine onyi ibuu sughu asaŋa agasu ma ibed Abazi, onu Eti (Josef ma eke Mary) ezighi Onyi enyiŋ Jisɔs, enjel ɔgɔdɔghɔ Mary okuh oyo enyiŋ-em kpaŋ onyi odiyo udib izighi.
Ebei Jisɔs Egewuɔ Ku Tempul
22Onu ku ima use idine emu ele odisu sughu azaŋa agasu ma ibed onu Mozes, Josef ma Mary ede nzek oyo Jisɔs ega gu tempul ku uduŋ Jeruzelem idiyak inɔ Abazi.
23Ku ntak omu egewid ku ibed Abazi ogu, “Ovid-evid akpa oyo onwi-eni omu ogiih enwa udib-umeh, ediku elile inɔ Abazi edene ŋkpɔ ɔnɔ onyi.”
24Emu enɔŋ ega idiwa uwah sughu azaŋa agasu masu ibed Abazi ɔdɔghɔ, “Semin-ogugu iba, nu-onu ibiom iba.”
Simiɔn Ogid Anyiŋi-Inyiaŋa Abazi
25Ku inien onji onwi ki omu agabak ku Jeruzelem omu enyiŋ izighi ogonu Simiɔn. Onyi ogonu enin-inen onwi ma ene-uto Abazi. Onyi egetei obi onwi omu odidɔŋ enwi Izruel ogid. Elile Spirit ɔgɔnɔŋ abak ma onyi.
26Elile Spirit agaya ɔwuɔ onyi ku onyi ma edikpa-ou, tutu onyi ogid Krais omu Abazi ɔgɔwɔŋɔ ididɔŋ.
27Ku use onu Elile Spirit ede Simiɔn ɔluk odi ku eziŋi-ɔtɔ tempul, onu kini eti ma eke ebei Nzek-Oyo Jisɔs edi, idide iyak inɔ Abazi sughu azaŋa agasu ma ibed omu Ɔfɔŋ otime ogu ene.
28Simiɔn ogid nzek oyo Jisɔs ɔnɔŋ ɔbɔghɔ onyi aga gu ubɔk izighi otro Abazi ogu,
29“Ku omu Ou Ɔfɔŋ, kpa ulaghan ovu okime iyak mi oyo-uto ovu nyiɔŋ ku emem, ku ntak omu ovu ene uwɔŋɔ ovu osu ɔnɔ mi.
30Ku omu onji omi ogid anyiŋ-inyiaŋa omu ovu ɔgɔdɔŋ odinyiaŋa ovid enwi.
31Ovu ogotɨm onyi onim ɔnɔ ovid-evid enwi edevak,
32Onyi malasu unwina omu odiya Abazi inɔ ima Gentile, ma ɔnɔŋ ede ufɔŋ ɔzɔk enwi Izruel omu enu udime ovu.”
33Josef ma Mary ebak ku mkpa-ile ebaŋa ima kpɔ omu Simiɔn ogozughu abaŋa nzek-oyonu Jisɔs.
34Ku onyi onu ama egefei, Simiɔn ɔdiɔŋ eti ma eke izighi, ɔnɔŋ ɔdɔghɔ Mary eke izighi ogu, “Abazi, egemek Oyom onim edene onyi onu ŋkpɔ ntuak-uku inɔ awak-iwak enwi ma ŋkpɔ omu ede enyiaŋa awak-iwak enwi ku Izruel. Onyi odila su idiɔŋɔ omu osi Abazi onu awak-iwak enwi ma ezughu nsiŋi edian onyi,
35Ku ibrɔ, onyi mayaa ogugre awak-iwak enwi. Munu ovu Mary ma egei mvughɔ eti-eti.”
Anna Etei Nteise Ɔnɔ Avak-Ivak
36Ku ukem use onu prɔved enwa gi omu egegre Anna agabak ku tempul. Onyi ogonu oyo onu Fanuel, omu osi ekpok uvɔk onu Asher. Onyi ɔgɔkiɔŋ eti-eti, ɔgɔnɔŋ abak ma ebi ku izughe itɨŋaba, ebi odikpa ayak.
37Enwa onu ɔnɔŋ ɔsughɔ su ebi-ukpa ku kpɔ su izughe aniaŋ ma iniaŋ. Onyi etei abiad awak-iwak ini izighi ku tempul, onu onyi ana ene ntuak ubughu ɔnɔ Abazi ku utre ulie ma ubɔŋ agam.
38Ku Simiɔn ozug ozughu nsiŋi ɔnɔ Mary ma Josef emu etro Abazi enɔŋ ezughu abaŋa nsek-oyo Jisɔs enɔ ovid-evid ima omu etei ebi Abazi edenɔ Krais odivak enwi ku Jeruzelem.
Ubin Esɔ Enyiɔŋɔ Ega Nazared
39Ene, kini Josef omu osi Nazared omu odio ku Galilee ma Mary ema-egene ovid kpɔ tutu ozim kpɔ uwah idine Mary eleh sughu ibed onu Mozes otɨme ma ididiɔŋ Jisɔs.
40Oyo onu ebek, okpo, ɔnɔŋ otu-ile, ɔyɨghɔ ma ɔniɔŋ, mfɔ Abazi ɔnɔŋ abak ma onyi.
Uyetɔ onwi-eni Jisɔs ene ile akpa ima nta-mvuvak
41Ovid izughe Eti ma eke onu Jisɔs egetei ega ku Jeruzelem ididra uzrɔ Ŋkiaŋa-mfei, omu eku Passover, ma awak-iwak ima Jew.
42Ene, kini omu Jisɔs onu izughe lughu-iba, onyi ma eti ma eke egega Jeruzelem sughu ezeghe ezaŋa ene ovid izughe.
43Ene, kini uzrɔ ama egegre, eti ma eke izighi (Josef ma Mary) etɔŋɔ idisɔ inyɔŋ, emu egevag ku Jisɔs ɔsɔ etei ku uduŋ Jeruzelem onu ku ile izighi.
44Eti ma eke egre ku onyi azaŋa ku otu-enwi onu egezaŋa ma emu. Ene, emu egezaŋa ovid use gi. Onu ku utid use gi onu emu egetɔŋɔ idiluŋɔ Onyi ku otu onu ima mme ma ima avak-onwi emu.
45Onu kini omu eti ma eke numa egid onyi, emu esɔ enyɔŋ ega Jeruzelem egetɔŋɔ idiluŋɔ onyi.
46Onu ku use ite ama egefei, emu egid Onyi ku tempul, sughu etei ku otu onu ima ekpiek ibed onu Mozes, onyi agakpaŋ-utɔŋ ɔnɔ su emu ekpiek alagha ɔsɔ obid emu mbid.
47Onu ile akpa ovid enwi omu egei nsiŋi izighi ku abaŋa mvuvak ma ibrɔ izighi.
48Ile agakpa eti ma eke kini omu emu egid onyi non, eke ogobid onyi ogu, “Oyomi, ntak omu ovu ene su omu ma enyin-eh? Sese, usɔ ma ami, izaŋa iluŋɔ vi ma ubighe idigid fi.”
49Onu Jisɔs ɔdɔghɔ emu ogu, “ntak omu eluŋɔ mi? Onu su evu mivag ku onu nnenen kpɔ ɔnɔ mi idibak momu ku mbubighe onu Eti omi?”
50Onu emu egevag su nsiŋi onu onyi ogozughu-on su ɔwuɔ.
Jisɔs ebek ku mvuvak ma mfɔ-onji
51Onu ku onyi onu amagefei, Jisɔs azaŋa ma eti ma eke ɔnyɔŋ ku uduŋ Nazared ɔnɔŋ aga onji ɔzughɔre ile ɔnɔ emu, onu eke izighi Mary ɔmuɔ ovid kpɔ omu aga ku ogid izighi ɔnɔŋ aganji ogre abaŋa ovid su otɨbe.
52Onu Jisɔs ebek ku eti ubughu ma ulagha, onu Abazi ma enwi enni ogid ma onyi (ega onji-nji).
Oro Bible by Beyond Translation is licensed under Creative Commons Attribution-ShareAlike 4.0 License.