Mak 15
15
Brah Jê-sus di mat Phi-lat
(Ma-thi-ơ 27:1,11-31; Lu-ka 23:1-5,13-25; Jang 18:28 – 19:16)
1Mhei meeng aang, bơl yau thwaai ndap ttơơm pơrgum pơrgênh n'hai bơl raanh ttơơm, bơl yau gưt jhai u leq Phung kliêu Jưm mlưm; bu kơt Brah Jê-sus ja nei jưn ndơơp aan Phi-lat. 2Phi-lat ôp Pang: “'Bei geh laa Snđach raih Jo-thai 'bưn?” Brah Jê-sus ơh: “Nơơm 'bei ja lah bei nei.” 3Bơl yau thwaai ndap ttơơm pnđing kơt Pang ơk ntil. 4Phi-lat kươi ôp Pang: “'Bei 'bưn ơh ơơn laang? Phrui mơq, bu pnđing 'bei ơk đat!” 5Dôh Brah Jê-sus 'bưn ơh baak ơơn hôm, lơh aan Phi-lat sot nglêk nglak.
6Laap nar ryơơng, Phi-lat rnđơơih krôih snôk sroong aan di mbu dôih khaam tênh phung raih rơ maanh. 7Bei au geh mbu bnih chhak laa Ba-ra-ba dol gôq khaam pôl n'hai bơl bah ta wal, lah bơl ja geh dôih lưm bnih knông dơk kơđau. 8Phung raih ja raan lôh u dan Phi-lat lơh tênh ntil bu rnđơơih lơh aan bu. 9Phi-lat ôp: “Bơl 'bei geh êch hei krôih snđach raih Jo-thai aan bơl 'bei 'bưn?” 10Đươm bu gưt srlah, bơl yau thwaai ndap ttơơm ja ndơơp Pang đươm chưt skiêr. 11Dôh bơl yau thwaai ndap ttơơm leet nôôl phung raih dan Phi-lat krôih Ba-ra-ba. 12Phi-lat ôp ndih: “Bei nei [bơl 'bei êch]#15:12 [bơl 'bei êch]: Knông m'baak plơơp 'bian ti 'bưn geh pal sêr au. hei pơrkat bei êch n'hai [bnih baah bơl 'bei chôôl laa]#15:12 [bnih baah bơl 'bei chôôl laa]: Knông m'baak plơơp 'bian ti 'bưn geh pal sêr au. Snđach raih Jo-thai?” 13Bu leet hao troh: “Phrui pơng đênh bu lơ tơơm chhư rglaang!” 14Phi-lat ôp bu: “Dôh bnih au ja lơh ntil ơơn ap?” Bu dươn troh mơh huôih: “Phrui pơng đênh bu lơ tơơm chhư rglaang!” 15Đươm êch lơh dip chưt phung raih, Phi-lat ja krôih Ba-ra-ba. Di kươi pơm Brah Jê-sus, Phi-lat ndơơp Pang aan bơl bu liêu han pơng đênh teq u chhư rglaang.
16Bơl lênh jưn Brah Jê-sus mưt knông nhi yau tông; leq phung lênh kot kươt pơrgum tu nei. 17Bu kơnđok aan Pang di mlơm ao pơrhei u ndau aan Pang mlơm môôk look ja taanh ơơm, 18ja nei chah Pang: “Smbah snđach raih Jo-thai!” 19Bơl bu kot pơih tơơm taoruôi pơm teq u bôôk Pang, chhoh brech lơ Pang, ja nei kơltut smbah Pang. 20Di kươi ja pơchanh Pang, bơl nei doh teq ao pơrhei, dook ao Pang ri u liêu sot gaaih jah pơng đênh teq u chhư rglaang.
Brah Jê-sus dol pơng đênh
(Ma-thi-ơ 27:32-44; Lu-ka 23:26-43; Jang 19:17-27)
21Bơl bu nhôp di mbu han rloot troong jah tung chhư rglaang Pang ri. Bnih au chôôl chhak laa Si-môn, bnih Si-ren, lah bươp A-lek-san-đơ u Ru-phu, mhei lôh a poh lôt.#Rô 16:13. 22Bu liêu Brah Jê-sus tơt di ktôk chôôl laa Gô-gô-tha, rơih laa Bnơm Tting bôôk. 23Bu aan Pang ôn bih wat n'hai kơrya tang, dôh Pang 'bưn ôn. 24Tơt ja pơng đênh Pang teq chhư rglaang, bu ta cheq khôw ao Pang ri, bơl nei pool jah mơq 'bơơn kươt bôh pa êch. 25Plah bu pơng đênh Pang lap tơmlai sưn bêl ôi.#15:25 S'bt: bêl ttal pei, awap laa bêl klap pei. 26Kaap dôih Pang kươt 'bian lơ kơđaar laa: “SNĐACH RAIH JO-THAI.” 27Pôl n'hai Pang, bu kot pơng đênh baar du ttung: di mbu mak ma, di mbu mak giêu. 28[Bei nei baak Sm'bưt Brah ja kươt dip plak: Pang ja dol kơơp bei bơl snơ geh dôih 'baap.]#15:28 Knông m'baak plơơp 'bian ti 'bưn geh ndroong 28.
29Bơl han rloot nei kot đam điêl, ngich ngưr bôôk u mor: “Ơi! 'Bei laa bnih awap rươih rlơm nhi r'bưn ja nei sun kươi knông pei nar,#Mak 14:58; Ja 2:19. 30phrui đoh êêng chhak nơơm u jưr rlach chhư rglaang ơơi!” 31Bơl yau thwaai ndap ttơơm u bơl yau gưt jhai kot đam điêl Pang bei nei. Bu mor tơrnang nơơm: “Bu ja đoh bnih nday baah 'bưn geh đoh êêng nơơm! 32Ơi Yaang Krist, Snđach I-sra-ên, bei au phrui jưr rlach chhư rglaang ơơi jah bơl hei sau u jơ!” Baar du ttung pôl dol pơng đênh n'hai Pang kot raak pơchanh Pang dơơh.
Baak chhưt Brah Jê-sus ri
(Ma-thi-ơ 27:45-56; Lu-ka 23:44-49; Jang 19:28-30)
33Tơmlai nar tam,#15:33 S'bt: lap bêl ttal prau, awap laa bêl klap prau. jơ ngôw ja rlum rleh jôm teh aan tơt pei bêl mau.#15:33 S'bt: bêl ttal sưn, awap laa bêl klap sưn. 34Tơt pei bêl mau, Brah Jê-sus khuôl mơh: “Ê-lô-i, Ê-lô-i, lam-ma-sa-bach-ta-ni?” rơih laa: “Brah Ưn Koon ri, Brah Ưn Koon ri, a hay Ay teq lơơi Koon?” 35Ttang bei nei m'baak bnih ta yoong dơơh mor laah: “Mơq tôw, bu khuôl Ê-li.” 36Di mbu tuôt han pơih di ndêq kao blaang tơyuk bêêng daak sraat, pưt lơ bôôk tơơm taoruôi, ndơơp aan Pang ôn u mor: “Phrui kơp mơq Ê-li geh lôh đoh bu jưr 'bưn.” 37Dôh Brah Jê-sus hao khuôl di ttôk mơh, hơơi kơsot n'hơm ptut.
38Knat m'ang knông nhi r'bưn dol a yah baar bôh a trôôk tơt teh. 39Kan bôôk raanh ta yoong rdang, sau Pang kơsot n'hơm ptut#15:39 Pang kơsot n'hơm ptut: Knông m'baak plơơp 'bian ti laa Pang troh ja nei kơsot n'hơm ptut. bei nei lah: “A ngan Bnih au laa Koon Brah Ưn!” 40Kot geh bơl dơur ta yoong mơq a ngngai; knông nak au geh Ma-ri Ma-đơ-len, Ma-ri mei Ja-kơ dêq u Jô-sep, n'hai Sa-lô-mê,#Lu 8:2-3. 41laa bơl bnih ja tênh u lơh kaar aan Brah Jê-sus khal Pang nha gôq Ga-li-lê; kot geh ơk dơur nday, lah bơl bnih ja han n'hai Pang tơt Jê-ru-sa-lem.
Baak rôôp tơơp Brah Jê-sus
(Ma-thi-ơ 27:57-61; Lu-ka 23:50-56; Jang 19:38-42)
42Trôôk êch dơơh jơ ngôw, baah nar nei leet laa nar Riêp, nei laa nar a mat nar sa-'bat, 43mơ Jô-sep, bnih A-ri-ma-thê, di mbu bnih klung kaar kơn hing Phung kliêu Jưm mlưm, bnih rêêng cham nggoor Brah Ưn, ja baanh khwaan han tơt ktôk Phi-lat jah dan kmôôch Brah Jê-sus ri. 44Phi-lat êêng aang đươm Pang ja chhưt, mơ khuôl kan bôôk raanh lôh jah ôp laa Pang ja chhưt a ngan laa 'bưn. 45Tơt ja iat kan bôôk raanh chhuôr tơmbơh, Phi-lat ndơơp kmôôch aan Jô-sep. 46Bu pook di plơơp knat look ja nei liêu kjưr Pang, nhôq knat nhop Pang u dơih teq u rôông kmôôch ja kươt 'boh ơơm knông tmau. Ja nei bu pơrlam di bliêng tmau dêêl bôôk lpôông kmôôch. 47Ma-ri Ma-đơ-len u Ma-ri mei Jô-sep kot sau ktôk rôôp tơơp Pang.
© 2024 Bible Society Vietnam. All rights reserved.