Rut 3
3
Rut nua Boas la whatin rusa trigu waana
1La lharan se, Noemi ehela othamorin Rut nausini, ''Naueti tempu nata deba, sa'i asukai se iá la ka, nikibo ka beki di uma kaina rasik, ka beki lhaha hakmatek. No nausei?
2Dene hihiana mai. Ka hati teha asukai se nain Boas naunda? Eto prepara nikibo ka beki kholi trigu la ona'ata kose serbisu sirani tukana. Eto famila nua kita, familia osi au-asukai semo mata deba. Degusini kii olida'e laka rhusa trigu wa'ana whatin. Boas laka latodi. 3Aku hama'a nausini: Ka laka riula, thau mina morinna tahi roupa semo hiana. Depois ka na'adi la whatin se rusa trigu wa'an sini. Masi hria Boas kha nuu ma'ala, nikibo eto beki ei ka lato di. 4Kha ma'ala, eto hati laka nhero. Ka ei hihiana, eto nhero la weleseri, tanba itawailiu. Waihira eto nhero deba, ka laka lato di, loke eto kapotina no iá sinal la eto. No ka laka nhero dasi la eto kelena. Boas tada osi eto kulturana, nikin eto hati ehe la ka, ka tenki lose'i."
5Rut hatana, ''Hia. Aku hati lo'osi sini." 6No eto na'adi la whatin rhusa trigu. No eto lo'osi ma'ala se'ie eto mimin onaata kasa.
7Waihira Boas kha-nuu ma'adeba, eto senti besudeba. No eto laka nhero la trigu wa'ana bou sini naesini. Hria nata matan ba'i, Rut gugulalaku laka la Boas whatin. No lhokela kapoti la Boas kelen, No nhero lato di. 8Natadeba nau degutena di, Boas naha hroko marala. Eto gese aan, Neteda'e, tanba Eto senti ona'ata se la eto kelena . 9No Boas neko la eto, "Sia ne seti?"
"Rut hatana, "Aku Rut, Hira atana ona'ata. Mas senhor di 'direitu selu mutu' aku. Sini magaritina senhor di direitu kaben nua aku, nikin iá jerasaun la au-asukai semo mata debani. Nikin aku neko la senhor taka kapoti roan la aku, naubotu sinal se Hira hama'a kaben nua aku."#Ezequiel 16:8
10No Boas admira, eto'o ehe "Aku neko la NAI iá bensa la ka! Ka beki sa'i raba asukai kosemo diha'ana, wailita siramo riku nua kiakana la eti, mas ka da'lo sini. Ka kii kiakna! Tanba ka khina domin nua respeitu la ga-asukai mata debani debani familian sira. Ka lale hiana naueti seti, hebawailiu duke enen ka khina la inau Noemi. 11Nikin ka dabeki thaku! Aku hati lo'osi ma'ala ga hama'ana. Dabeki theha oliwailiu, tanba kii heban tauderi la sidade sini sira tada'osi deba ka, Ehe, ka ona'ata se lale hiana nua badinas. 12Masi naueti hati di se'i se lati Ehe, aku ga-asukai semo matadebani familiana nikin di direitu selu mutu' ka. Masi la kiise dase wailiu ka'nii duke aku. Nikin eton di direitu desidi beki kaben nua ka. Se eto baru, nike aku di direitu.#Rut 2:20 13Entaun aku iá dalan nausini'ana: no'oti deguseti ka baha la raba seti di. Remawae aku laka nua eto nenehe. Se eto prontu kaben nua ka dase'ise. Mas se eto baru, aku jura Gulara lhahan naina, aku rasik hati kaben nua ka. Hira kultura ehe, aku 'selu mutu' ka. Entau nhero raba la seto nata rema."
14No Rut nhero raba la Boas kelena. La maraldi Rea itakoukou'ana, Rut maradeba. Tanba Boas ehe'leba, "Da'enna se kii tadaosi degu-degu ona,ata mai di naha la whatin rusa trigu wa'an sini. 15Mai, iá ga kapoti la aku thau trigu." No eto rhaku trigu lalekailimaresi thau la Rut kapotina. Depois eto ala thau la Rut palaina. Nua Boas whali hila la eto aldeiana.
16Waihira Rut nata la umana, eto mimina ona'ata neko la eto, "Lhaidegu nause'i?"
Rut ehemesu ma'ala se'ie Boas Lo la eto, 17no ehe teni, "eto iá trigu sini la aku. No Eto'o ehe, 'Ka dalika whali la ga mimi ona'ata nua lima lalema'a.'''
18No Noemi hatan, "Godi deba! Naueti ka tenki pasensia beki hria. Tanba klaru deba, Boas hama'a deba resolve problema sini no baru hriadeba. Godina eto hama'a resolve la lharasini."
Wycliffe Timor-Leste © 2025 Wycliffe Bible Translators Inc