Rut 2
2
Rut sudi loor o Boas
1Vere sidadi Belem dia atu ha'e iso i u atu riku teba'a, gala Boas. U veki familia o Elimeleke, Noemi nii laki iso ke mate see. Dara atu seri u'u sii lisa, Boas o Noemi familia iso.
2Lee aer iso, Rut, vine Moab, laa le Noemi odi negi, “Amaa! A lebo laa ruku odi loi trigu kai#2:2 Atu Israel kalobu trigu kai odi sai nii uu odi sega ka punu rau odi ha'a raki ke madou vere atu servisu noor sii kavovo, lebo ka tai? [Pita Maromak nii lei kero dale, posi atu kiak noor punu ple'u.]#Levitiku 19:9-10; Deuteronomio 24:19; Deuteronomio 25:5-6 Be punu ke, atu seri matani sii lara bloi mai a.”
Noemi mataar dale, “Lebo, Rut lebo la.”
3I Rut laa le ruku iso odi loi trigu kai raki ke atu servisu noor posi bali. I ruku u'u Boas ni'i. Boas iso ke familia o Elimeleke, Rut nii ama-ba'i iso ke mate see.
4Aipiil iso Rut loi tili trigu kai raki, ruku ubu, Boas, mai pio sidadi Belem, i toku laa atu servisu dale, “Salom! NAI Maromak posi mat navati le kimi!”
Roo mataar dale, “Salom, am-na'i! NAI Maromak matani nii lara bloi le kiti!”
5Aipiil iso Boas eto Rut loi trigu kai, Boas tugu laa nii mandoor dale, “Vine veki nan sae iso kano'o, nii familia ta seni?”
6Mandoor dale, “Vine u'u, atu Moab iso ke veki nan galelu putu o senhora Noemi pio Moab. 7Buso, vine u'u mai negi le a dale, ‘Mandoor! A lebo dara laa loi trigu kai raki ke atu servisu noor posi bali vere kano'o ka?’ I a mataar dale, ‘Lebo!’ I vine u'u servisu uru pes buso, lelo tee sa'e veki rata agora kade'e. I u maderi udi ta sani'it le palboo kano'o.”
8I Boas laa soru o Rut dale, “Mana! Kiti atu mat veu, loba ka? Se'i puun bloi mai a batu. Kiti loi trigu kai raki na le kade'e, tee dia muda laa atu selo nii ruku-lara. Bloi desi tee lebo karoo pio ana vine seri ke servisu mai a. 9Lise puun bloi atu servisu noor kalobu trigu kai vere mane, i kiti lebo dara laa loi trigu kai raki vere sii kavovo. A nee panaa bali laa mane noor, ke tee lebo book kiti. I se kiti broo, laa enu ee vere sii kantil seri ke roo soki benu bali see.”
10Pli'i ple'u, Rut sibtu'ur rata rae. I u dale, “Obrigadu, am-na'i! Mas a let dale lapa iso. See am-na'i panaa bali see a tee loos atu kade'e. Pita seta am-na'i posi mat mai a, i matani lara bloi mai a?”
11Boas mataar, “Loba. A panaa see pita atu ma'o mege vere kade'e dale mai a kiti matani kiti lara bloi laa ina-ba'i Noemi aipiil iso kiti laki mate noo. I roo mos dale kiti posi bali kiti ina-ama o kiti rae mori vati, odi mai le atu selo nii talaa, mas ke kiti tee panaa roo.
12See ple'u a negi laa NAI,
kami atu Israel nii NAI Maromak,
selo kiti lara bloi ma'o!
A negi laa NAI nee bensa dotu laa kiti,
pita kiti matani kiti lara bloi laa kiti ina-ba'i Noemi.
NAI ta kuidadu kiti le kade'e,
pita kiti leti sebreke laa NAI,
meges manu-ana ke buni vere manu-ina sii lilar.”
13I Rut mataar dale, “Am-na'i! Maske a telos kiti atu ke servisu, pita am-na'i punu dania kau lara, i matani mos kiti lara bloi mai a.”
14Aipiil iso roo maderi udi leti ha'a, Boas dale laa Rut, “Mai ha'a putu o kami le kade'e! Bua paun kade'e, i se manara demi le nau mos lebo.” I Rut laa maderi garai atu servisu noor. Dara mai, Boas nee trigu-uu sega la Rut. Rut ha'a rata beso, i veki dia raki.
15-16Aipiil iso Rut galelu vali la ruku-lara odi loi trigu kai raki seri ke atu servisu noor posi bali, Boas dale laa nii atu servisu noor dale, “Se'i puun bloi! Te lebo book Rut. Posi Rut loi trigu kai raki vere man-mane. Se Rut loi gini trigu butu seri kade'e mos, tee dia lapa iso. A tee kasiit, kimi lebo sai trigu kai iso-ruu ke kimi butu bali see, posi bali laa ke Rut loi. Te lebo toe u, i tee lebo punu makae u.”
17Rut servisu le ruku-lara aer katemo. Aipiil iso lelo mat duu see, u bonu trigu kai, odi sai trigu-uu pio nii kai, i posi trigu-uu le sabai iso benu.#2:17:Dale-uu Ebreu kero dale, sabai iso magees eyfah iso. Eyfah iso, magees kilu 12. 18I Rut odi trigu-uu le sabai no galelu la sidadi Belem, i Rut matani nii onu ee pio nii servisu la ni ina-ba'i Noemi. I u mos sai ha'a raki meu-dia nii ke nee la Noemi.
19I Noemi tugu la Rut, “Panai kiti loi trigu-uu iso kade'e le mane? Kiti servisu le sen ta nii ruku-lara? Odi NAI Maromak nee bensa le atu iso ke matani u nii lara bloi la kiti le aer iso kade'e.”
Rut mataar, “Amaa, ruku-ubu u'u gala Boas.”
20Noemi dale laa nii vine veu, “NAI Maromak nee bensa laa Boas. Pita NAI Maromak tee baligu matani Nii lara bloi laa kiti seri ke mori, o mos le kiti laki seri ke mate bali see. A dale le kiti, Boas u'u kiti familia garai. U ta dia direitu odi selo tagotu. [U'u dale tok de, Boas batu dia direitu odi kaben o kiti, odi nee ana o ubu-ana le kiti laki iso ke mate see.]”#Levitiku 25:25
21Rut mataar, “Amaa, panai Boas mos dale mai a, ‘Aer mai vali. Kiti lebo loi trigu kai gini kau atu servisu noor rata kalobu trigu kai ma'o.’”
22Noemi mataar vali, “Lebo bali! U'u sinal bloi. I kiti lebo laa servisu putu o nii atu vine noor le tempu kalobu trigu kai ma'o. Le atu selo nii ruku-lara, atu lebo book kiti. Mas le Boas nii ruku atu tee lebo book kiti.”
23Pita ple'u, Rut loi trigu kai raki le Boas nii ruku-lara gini vine servisu noor rata tempu kalobu trigu kai o kalobu tora kai ma'o. Pes tempu u'u, Rut peni navati o ni ina-ba'i Noemi.
Wycliffe Timor-Leste © 2025 Wycliffe Bible Translators Inc