ଲୁକ 24
24
ଜିସୁ ହାଅନ୍ତାୱାଟି ନିଙ୍ଗନ୍
(ମାତିଉ ୨୮:୧–୧୦; ମାର୍କ ୧୬:୧–୮; ଜହନ ୨୦:୧–୧୦)
1ମତ୍ର ପାଲୁତି କାହେତ୍ ଦିନାତାୱା ଡାଃଏସ୍ ମାହୁ ମାହୁତାୱା ଏୱା ହାମ୍ୱେର୍ କିଆନ୍ ଇଟ୍ଟାଚ୍ଚି ନେହିଗାନ୍ଦା ନିଜ୍ଜୁ ଅଆନ୍ ଗ୍ରିପାଙ୍ଗୁଟିଇନ୍ଦା ହାଚ୍ଚୁ । 2ଆଟେ ଏୱା ଗ୍ରିପାଙ୍ଗୁଟିତାୱାଟି ୱାଲ୍ଲିତିଦି ଦୁର୍ଚାନ୍ନାଦା ହୁଡ଼ିତୁ, 3ମତ୍ର ଲାଃଇ ହାଜ୍ଜାନାହି ଦାର୍ମୁ ଜିସୁତି ଗାଣ୍ଡି ପାଃନାତୁ । 4ଆଟେ ଏୱା ଏଦାବାଗା ଆଜ୍ଜିତୁ, ଏଚିତୁକାତାୱା ହୁଡ଼ାଟୁ, ଅଲାଗାଟି ଅଙ୍ଗିଙ୍ଗ୍ ମେଦ୍ଦାଚ୍ଚି ରିଃଆର୍ କୁଇଙ୍ଗ୍ ଏୱାଡ଼୍ ରେଃଏସ୍ ତଞ୍ଜୁ ଆତେରି; 5ଏମ୍ୱାଟି ଏୱା ଆଜ୍ଜାନାହି ନେତେ ମ୍ରୁମ୍ବୁ ହିକିତୁ, ଏୱାରି ଏୱାଡ଼ିକି ୱେସ୍ତେରି ହାନ୍ନାର୍ତାୱାଟି ମିରୁ ଇନାବାଗା ନିମ୍ୱାନ୍ନାଞ୍ଜିକି ଦାହ୍ପିଞ୍ଜେରି ? 6#ମାତି ୧୬:୨୧; ୧୭:୨୨,୨୩; ୨୦:୧୮,୧୯; ମାର୍କ ୮:୩୧; ୯:୩୧; ୧୦:୩୩,୩୪; ଲୁକ ୯:୨୨; ୧୮:୩୧–୩୩ଏୱାଞ୍ଜି ଇଦିମ୍ୱା ହେଃଲ୍ଲେଞ୍ଜି, ମତ୍ର ନିଙ୍ଗାନ୍ନେଞ୍ଜି । ଇ ଇମ୍ୱିନ୍ ବାକ୍ୟ ଏୱାଞ୍ଜି ଗାଲିଲିତାୱା ମାଚ୍ଚାୱିଃଆ ମିଙ୍ଗେ ୱେସାଞ୍ଜାତେଞ୍ଜି, ଏଦା ଏଲୁ କିଦୁ । 7କୁଏଞ୍ଜ୍ ମ୍ରିଃଏଞ୍ଜିକି ଇନିସ୍କି ପାପିଗାଟାର୍ତି କାଜ୍ଜୁତାୱା ସର୍ପି ଆନାହି କ୍ରୁସତାୱା ହାଅନ୍ ଆନେ ଅଟେ ମୁ ଦିନାଟି ନିଙ୍ଗନ୍ ଆନେ ।
8ଏମ୍ୱାଟି ଏୱା ଏୱାଞ୍ଜ୍ତି ବାକ୍ୟ ଏଲୁ କିତୁ, 9ଆଟେ ଗ୍ରିପାଙ୍ଗୁଟିତାୱାଟି ୱ୍ଡେଚାନ୍ ହାଜ୍ଜାନାହି ଏଗାର ଗାଣ୍ଡି ଗ୍ରାମ୍ୱାଗାଟାରିକି ଅଟେ ବିହି ଦାଲ୍ଲାନିକି ହାବେ ଇ ହାବେତ୍ କାତା ୱେସ୍ତୁ । 10ଇୱା ମଗ୍ଦଲିନି ମରିୟମ, ଜହାନା, ଜାକୁବତି ଇୟା ମରିୟମ ଆଟେ ଇୱା ଡ଼ାହି ରହେ ମାଚ୍ଚି ବିହି ଆଚାସ୍କା, ଏୱା ପେରିତଙ୍ଗ୍ନିକି ଇ ହାବେତ୍ କୁଲାଟି ୱେସ୍ତୁ । 11ମତ୍ର ଇ ହାବେତ୍ କାତା ଏୱାରି ରେଃଏସ୍ କଲ ୱେସ୍ତି ଡେହେଙ୍ଗ୍ ଆତେ, ଆଟେ ଏୱାରି ଏୱାଡ଼୍ତି କାତା ମାଞ୍ଜାଡ଼ି କିଃଆତେରି । 12ମତ୍ର ପିତର ନିଙ୍ଗାନାହି ଡେହାନ୍ ଗ୍ରିପାଙ୍ଗୁଟିଇନ୍ଦା ହାଚ୍ଚେଞ୍ଜି, ଆଟେ ପ୍ଲାଙ୍ଗାନାହି ହୁଡ଼ିତାୱା ହୁକୁଲ୍ ଜିରାଙ୍ଗ୍ ହାବେ ହୁଡ଼ିତେଞ୍ଜି, ଆଟେ ଏୱାଞ୍ଜି ଏଦା ପୁଞ୍ଜାନାହି ଆକ୍କାବାଡ଼ାଙ୍ଗ୍ ଆନାହି ତା ଇଜ୍ଜା ହାଚ୍ଚେଞ୍ଜି ।
ଇମାୟୁ ଗିଜ୍ଜୁତାୱା ଜିସୁ
(ମାର୍କ ୧୬:୧୨–୧୩)
13ଆଟେ ହୁଡ଼ାଟୁ, ଏଚିୱେଲା ଏୱାର୍ତାୱାଟି ରିଃଆରି ଜିରୁସାଲମତାୱାଟି ଏଗାର କିଲ ମିଟର ଦେହା ଇମାୟୁ ପାରୁଗାଟି ନାଜୁଇନ୍ଦା ହାଜ୍ଜିଚ୍ଚେରି, 14ଆଟେ ଇ ହାବେ ଡୁଣ୍ଡେଲ୍ତି କୁଲାଟି ତାରୁ ତାରୁ କାତା ୱେସ୍ପିଆଇଚ୍ଚେରି । 15ଏୱାରି କାତାବାର୍ତା ଆଇଚ୍ଚି ତୁକାତାୱା ଜିସୁ ଏୱାର୍ ରେଃଏସ୍ ୱାନାହି ଏୱାର୍ ଡ଼ାହି ରହେ ତାକନ୍ ମ୍ରାସ୍ତେଞ୍ଜି । 16ମତ୍ର ଏୱାର୍ତି କାଡ଼୍କା ଇହିଙ୍ଗିସି ମୁଚ୍ଚି ଆନ୍ ମାଚ୍ଚୁ ଜେ, ଏୱାରି ଏୱାଞ୍ଜିକି ପୁନ୍ବନ୍ ମୁଃଆତେରି । 17ଜିସୁ ଏୱାରିକି ୱେସ୍ତେଞ୍ଜି, “ମିରୁ ତାକି ତାକି ଇମ୍ୱିନ୍ ହାବେ କାତା କୁଲାଟି ୱେସ୍ପିଆଇଞ୍ଜେରି, ଏଦି ହାବେ ଇନାଦି ?” ଏମ୍ୱାଟି ଏୱାରି ମ୍ରୁମ୍ୱୁ ହପ୍ଚ୍ଚାନ୍ ଡିଡ୍ଡାନ୍ ବାସାଆତେରି । 18ଆଟେ ଏୱାର୍ତାୱାଟି କ୍ଲିଅପା ପାରୁଟି ରଃଅଞ୍ଜି ଏୱାଞ୍ଜିକି ୱ୍ଡେପ୍ଚ୍ଚି ୱେସ୍ତେଞ୍ଜି, “ଜିରୁସାଲମତାୱାଟି ନିନୁ ଇନ୍ନା ରଃଅତାତେଃଏ, ଏ ହିତେ ଦିନାତି ଡୁଣ୍ଡେଲ୍ ନିନୁ ପୁଞ୍ଜାହେଃଲ୍ଲାଆ ?”
19ଏୱାଞ୍ଜି ଏୱାରିକି ୱେଚ୍ଚେଞ୍ଜି, “ଇନିମିଡିତି ଡୁଣ୍ଡେଲ୍ ?” ଏୱାରି ଏୱାଞ୍ଜିକି ୱେସ୍ତେରି, “ନାଜରିତତି ଜିସୁତି କୁଲାଟି; ଏୱାଞ୍ଜି ମୁଲାପେନୁ ଅଟେ ହାବେ ଦାଲ୍ଲାତି କାନ୍ନୁତାୱା, କାମାତାୱା ଅଟେ ବାକ୍ୟତାୱା ରଃଅଞ୍ଜି ବଲଗାଟି ବାବବାଦି ମାଚ୍ଚେଞ୍ଜି ।” 20ଆଟେ ମା ଗାମିନ୍ ଜାଜକଙ୍ଗ୍ ଅଟେ ପୁନ୍ବନ୍ତାରି ଇନିମିଡି ଏୱାଞ୍ଜିକି ହାଅନ୍ତି ଦଣ୍ଡ ହିଅନ୍ ବାଗାଟି ସର୍ପି କିଆନ୍ ଏୱାଞ୍ଜିକି କ୍ରୁସତାୱା ପାଗିତେରି । 21ମତ୍ର ଏମ୍ୱେନାଞ୍ଜି ଇସ୍ରାଏଲ ଦାଲ୍ଲାନିକି କୁଲ୍ନେଞ୍ଜି, ଏୱାଞ୍ଜ୍ ଜେ ଇ କୁଏଞ୍ଜି, ଏଦା ମାମୁ ଆସା କିଆଚ୍ଚାମୁ; ମତ୍ର ଇଦା ପିହାନ୍ ଇ ହାବେତ୍ ଡୁଣ୍ଡେଲ୍ ଆନ୍ ନିଞ୍ଜୁଟିଆଟି ମୁନେସ୍ ଆଇନେ । 22ଆଟେ ୱାଡ଼େ, ମା ତାୱାଟି ଏଚ୍ଚେ ଦାଲ୍ଲା ଆଚାସ୍କା ମାଙ୍ଗେ ଆକ୍କାବାଡ଼ାଙ୍ଗ୍ କିଆଞ୍ଜାନୁ; ଏୱା ଡାଃଏସେଃଏ ୱିଚାଙ୍ଗାଜୁ ରେଃଏସ୍ ହାଜ୍ଜାଚ୍ଚୁ । 23ଆଟେ ଜିସୁତି ଗାଣ୍ଡି ପାଃନେଟେଃଏ ୱାନାହି ୱେସ୍ତାତୁ, ଏୱା ଦୁତଙ୍ଗ୍ନିକି ହୁଡ଼ିତୁ ଅଟେ ଏ ଦୁତଙ୍ଗ୍ ୱେସ୍ତେରି, ଏୱାଞ୍ଜି ନିମ୍ୱାନ୍ନେଞ୍ଜି । 24ଆଟେ ମା ଡ଼ାହି ମାଚ୍ଚି ଦାଲ୍ଲା ତାୱାଟି ଏମ୍ୱେ ଏମ୍ୱେ ଗ୍ରିପାଙ୍ଗୁଟିଇନ୍ଦା ହାଜ୍ଜାନ୍, ଆଚାସ୍କା ଇନିମିଡି ୱେସାଚ୍ଚୁ, ଏହେଙ୍ଗିସି ହୁଡ଼ିତେରି, ମତ୍ର ଏୱାଞ୍ଜିକି ହୁଃଡ଼ାତେରି ।
25ଏମ୍ୱାଟି ଜିସୁ ଏୱାରିକି ୱେସ୍ତେଞ୍ଜି, “ଏ ବୁଦ୍ଦି ହେଃଲ୍ଲାନାତେରି ଅଟେ ବାବବାଦିଙ୍ଗ୍ ୱ୍ରିଗାନ୍ନି ହାବେ ବାକ୍ୟତିଦି ମାଞ୍ଜାଡ଼ି କିଅନ୍ ବାଗାଟି ହିଡେସ୍ ହଡାଙ୍ଗ୍ ଗାଟାନାତେରି ।” 26ଇ ହାବେତ୍ ଦୁଃକ ପାଁଣ୍ଡାନାହି ତା ମହିମାଟି ହଲ୍ବନ୍ ବାଗା ଇନ୍ନା କ୍ରିସ୍ଟନିକି ଆବସକ ହେଃଲ୍ଲାତେ ? 27ଆଟେ ମସା ଅଟେ ହାବେତ୍ ବାବବାଦିଙ୍ଗ୍ତାୱାଟି ମ୍ରାସାନାହି ହାବେତ୍ ଦର୍ମପୁତିତାୱା ତା କୁଲାଟ୍ତି କାତା ଏୱାଞ୍ଜି ଏୱାରିକି ନେହେନ୍ ବୁଜ୍ଜେ କିତେଞ୍ଜି ।
28ଆଟେ ଏୱାରି ଇମ୍ୱିନ୍ ନାଜୁଇନ୍ଦା ହାଜ୍ଜିଚ୍ଚେରି, ଏ ନାଜୁତି ରେଃଏସ୍ ଆଅନେଃଏ ଜିସୁ ଆଟେ ନକେସ୍ ହାଲ୍ବନ୍ତିକି ତସ୍ତେଞ୍ଜି । 29ମତ୍ର ଏୱାରି ଏୱାଞ୍ଜିକି ଜିଗାନ୍ ୱେସ୍ତେରି, “ମା ଡ଼ାହି ବାସାଆମୁ, ଇନାକି ମିଡ୍ଡଡ଼୍ ଆଏସ୍ନା ୱାଇନେ ଅଟେ ୱେଲା ମେଦ୍ଦିତେ ।” ଏମ୍ୱାଟି ଏୱାଞ୍ଜି ଏୱାର୍ ଡ଼ାହି ବାସାଆଅନ୍ତିକି ଇଡ୍ଡୁ ଲାଃଇ ହାଚ୍ଚେଞ୍ଜି । 30ଆଟେ ଏୱାର୍ ଡ଼ାହି ତିନ୍ବା ଉନ୍ବା କିଅନ୍ ବାଗା କକ୍ତାୱିଃଆଟି ଏୱାଞ୍ଜି ରୁଟି ଅଆନ୍ ମେଲା କିତେଞ୍ଜି, ଆଟେ ଏଦା ଲେକ୍ଚାନାହି ଏୱାରିକି ହିତେଞ୍ଜି । 31ଏମ୍ୱାଟି ଏୱାର୍ତି କାଡ଼୍କା ଏଗିତୁ ଅଟେ ଏୱାରି ଏୱାଞ୍ଜିକି ପୁଚ୍ଚେରି, ଏମ୍ୱାଟି ଏୱାଞ୍ଜି ଏୱାର୍ କାନ୍ନୁତାୱାଟି ମ୍ରାଙ୍ଗିତେଞ୍ଜି । 32ଏମ୍ୱାଟି ତାରୁ ତାରୁ କାତା ଆତେରି, ଏଚ୍ଚିକିଃଆ ଗିଜ୍ଜୁତାୱା ଏୱାଞ୍ଜି ମା ଡ଼ାହି କାତାବାର୍ତା ଆଇଚ୍ଚେଞ୍ଜି ଅଟେ ମାଙ୍ଗେ ଦର୍ମପୁତିତି କାତା ୱେସ୍ପିଞ୍ଜାତେଞ୍ଜି, ଏଚିତୁକାତାୱା ଇନ୍ନା ମା ହଡାଙ୍ଗ୍ ଗ୍ରେଞ୍ଜେ ହେଃଲ୍ଲାତୁ ?
33ଆଟେ ଏୱାରି ଏ ତୁକାତାୱା ନିଙ୍ଗାନାହି ଜିରୁସାଲମଇନ୍ଦା ୱ୍ଡେଚାନ୍ ହାଜ୍ଜାନ୍ ରପାଟ୍ଟେ ମାଚ୍ଚି ଏଗାର ଗାଣ୍ଡିନିକି ଅଟେ ଏୱାର୍ ଡ଼ାହି ମାଚ୍ଚି ଦାଲ୍ଲାନିକି ହୁଡ଼ିତେରି; 34ଏୱାରି ୱେସ୍ପିଆଇଚ୍ଚେରି, “ଦାର୍ମୁ ନିଜ୍ଜାନେଃଏ ନିଙ୍ଗାନ୍ନେଞ୍ଜି ଅଟେ ସିମନନିକି ତଞ୍ଜୁ ଆନ୍ନେଞ୍ଜି ।”
35ଆଟେ ଏୱାରି ୱାଡ଼େ ପାହେର୍ତି ହାବେ ଡୁଣ୍ଡେଲ୍ ଅଟେ ରୁଟି ପାହେଡ଼୍ କିଅନ୍ତାଦା ଜିସୁ ଇନିମିଡି ଏୱାରି ଡ଼ାହି ପୁନ୍ବି କିତେଞ୍ଜି, ଏଦା ହାବେ ୱେସ୍ପନ୍ ମ୍ରାସ୍ତେରି ।
ଗ୍ରାମ୍ବାଗାଟାରିକି ଜିସୁ ତଞ୍ଜୁ ଆଅନି
(ମାତିଉ ୨୮:୧୬–୨୦; ମାର୍କ ୧୬:୧୪–୧୮; ଜହନ ୨୦:୧୯–୨୩; ପେରିତ ୧:୬–୮)
36ମତ୍ର ଏୱାରି ଇ ହାବେତ୍ କାତା ୱେସ୍ପିଚ୍ଚି ତୁକାତାୱା ଦାର୍ମୁ ଜିସୁ ଏୱାର୍ତାୱା ଡିଡ୍ଡାନାହି ୱେସ୍ତେଞ୍ଜି, “ମି ପାଟ୍ଟି ଲତୁ ଆପାକାଦି ।”
37ମତ୍ର ଏୱାରି ଆକ୍କାବାଡ଼ାଙ୍ଗ୍ ଆତେରି ଅଟେ ଆଜ୍ଜାନାହି ରଣ୍ଡା ବୁତ ହୁଡ଼େନ୍ନାମୁ ଇଞ୍ଜାନାହି ଏଲୁ କିଚ୍ଚେରି । 38ଏମ୍ୱା ଏୱାଞ୍ଜି ଏୱାରିକି ୱେସ୍ତେଞ୍ଜି, “ଇନାବାଗା ଆଜ୍ଜେଞ୍ଜେରି ଅଟେ ମି ମନତାୱା ଇନାବାଗା ସନ୍ଦେହ କିଞ୍ଜେରି ? 39ନାନୁ ଜେ ଏୱାତାନୁ, ନା କାଜ୍ଜୁ ଅଟେ କାଟ୍କା ହୁଡ଼ାଟୁ, ନାଙ୍ଗେ ଡିଗାନାହି ହୁଡ଼ିଦାଦୁ, ଇନାକି ନାଙ୍ଗେ ଇନିମିଡି ଉଙ୍ଗା ଅଟେ ପ୍ଡେକା ମାନ୍ନାନାଦା ହୁଡ଼େଞ୍ଜେରି, ବୁତନିକି ଏହେଙ୍ଗିସି ହେଃଲ୍ଲ ।”
40ଆଟେ ଏୱାଞ୍ଜି ଇଦା ୱେସାନାହି ଏୱାରିକି ତା କାସ୍କା ଅଟେ କାଟ୍କା ତସ୍ତେଞ୍ଜି । 41ଆତେସ୍ୱାଡ଼େ ଏୱାରି ରାହାଙ୍ଗ୍ ଆନାହି ମାଞ୍ଜାଡ଼ି କିଃଏଟେଃଏ ଆକ୍କାବାଡ଼ାଙ୍ଗ୍ ଆତାୱିଃଆଟି ଏୱାଞ୍ଜି ଏୱାରିକି ୱେଚ୍ଚେଞ୍ଜି, “ହାଦାଡ଼ି ମି ରେଃଏସ୍ ଇନ୍ନିକୁଲା ହିତଡ଼୍ ତିନ୍ବନ୍ତା ମାନ୍ନୁ ?” 42ଏମ୍ୱାଟି ଏୱାରି ଏୱାଞ୍ଜିକି ୱାହାଚ୍ଚି ପାହେଡ଼୍ ମିନୁ ହିତେରି । 43ଆଟେ ଏୱାଞ୍ଜି ଏ ମିନୁତିଦି ଅଆନ୍ ଏୱାର୍ ରେଃଏସ୍ ତିଚ୍ଚେଞ୍ଜି ।
44ଆଟେ ଜିସୁ ଏୱାରିକି ୱେସ୍ତେଞ୍ଜି, “ମସାତି ହାଜୁ ପୁତିତାୱା ଆଟେ ବାବବାଦିଙ୍ଗ୍ତି ଅଟେ ଗାଡ଼େମାଲା ଦର୍ମପୁତିତାୱା ନା କୁଲାଟି ଇନ୍ନା ଇନ୍ନା ୱ୍ରିଗାଆନ୍ନେ, ଏୱା ହାବେ ସପଲ ଆଅନ୍ ମାନ୍ନେ, ନାନୁ ମି ଡ଼ାହି ମାଚ୍ଚି ତୁକାତାୱା ମିଙ୍ଗେ ଇ ହାବେତ୍ କାତା ୱେସାଞ୍ଜାତେଃଏ ।”
45ଏଚିତୁକାତାୱା ଏୱାରି ଇନିମିଡି ଦର୍ମପୁତିତି କାତା ପୁନ୍ବନ୍ ମୁନେରି, ଏଦାବାଗା ଜିସୁ ଏୱାରିକି ପୁନ୍ବନ୍ତି ଏଲୁ ଗେର୍ଚା ହିତେଞ୍ଜି । 46ଆଟେ ଏୱାଞ୍ଜି ଏୱାରିକି ୱେସ୍ତେଞ୍ଜି, “ଇହିଙ୍ଗିସି ୱ୍ରିଗାଆନ୍ନେ, କ୍ରିସ୍ଟ ଦୁଃକ ପାଁନେଞ୍ଜି ଅଟେ ମୁ ଦିନାଟି ହାନ୍ନି ଦାଲ୍ଲାତାୱାଟି ନିମ୍ୱାନ୍ନିଙ୍ଗିନେଞ୍ଜି, 47ଆଟେ ଜିରୁସାଲମତାୱାଟି ମ୍ରାସାନାହି ହାବେତ୍ ପୁଣ୍ଡିତି ରେଃଏସ୍ ଏୱାଞ୍ଜ୍ତି ପାରୁଟି ପାପ ମାକ୍ସାଡ଼ି ବାଗାଟି ଏଲୁୱ୍ଡେପନ୍ତି କାତା ୱେସ୍ପା ଆନେ । 48ମିରୁ ଇ ହାବେତ୍ କୁଲାଟି ପୁଞ୍ଜାଞ୍ଜେରି । 49#ପେରି ୧:୪ଆଟେ ହୁଡ଼ାଟୁ, ନା ଆବା ଇନ୍ନା ଦିବ୍ବା କିଆଞ୍ଜାନେଞ୍ଜି, ଏଦା ନାନୁ ମି ରେଃଏସ୍ ପାଣ୍ଡେଞ୍ଜା, ମତ୍ର ୱାନ୍ଦେଟ୍ତି ବଲ ପାଁଣ୍ଡାହେଃଲ୍ଲାନ୍ ଟିକ୍ନା ମିରୁ ଇ ଗାଡ଼ାନାଜୁତାୱା ବାସାଆଦୁ ।”
ଜିସୁ ସର୍ଗ ହାଲ୍ବନ୍
(ମାର୍କ ୧୬:୧୯,୨୦; ପେରିତ ୧:୯–୧୧)
50 #
ପେରି ୧:୯–୧୧
ଏମ୍ୱାଟି ଜିସୁ ଏୱାରିକି ବେତନିଆଇନ୍ଦା ହାଲ୍ବନ୍ତି ଗିଜ୍ଜୁ ଟିକ୍ନା ଅତେଞ୍ଜି ଅଟେ ତା କାଜ୍ଜୁ ଡେସାନାହି ଏୱାରିକି ମେଲା କିତେଞ୍ଜି । 51ଆଟେ ଏୱାରିକି ମେଲା କିଆନାହି ଏୱାଞ୍ଜି ଏୱାର୍ତାୱାଟି ଆଙ୍ଗେ ଆନାହି ସର୍ଗଇନ୍ଦା ହାଚ୍ଚେଞ୍ଜି । 52ଆଟେ ଏୱାରି ତାଙ୍ଗେ ଗାଡ଼ିହେରୁ କିଆନାହି ଏଗେଲ୍ ରାହାଙ୍ଗ୍ ଆନ୍ତାରି ଜିରୁସାଲମଇନ୍ଦା ୱ୍ଡେଚାନ୍ ହାଚ୍ଚେରି, 53ଆଟେ ଦିନାଙ୍ଗେଃଏ ଜିରୁସାଲମ ମନ୍ଦିରତାୱା ମାଞ୍ଜାନାହି ମୁଲାପେନୁନିକି ଗାଡ଼ିହେରୁ କିଅନ୍ ମ୍ରାସ୍ତେରି ।
