پیدأیش ۲۳
۲۳
سارا مٚردن
1 او وخت کی سارا صد و بیست و هفت سأل دأشتی، 2 حبرونٚ میأن کی کنعانٚ سرزیمینٚ دورون نهأبو بٚمٚرده و ایبرأهیم اویَه اونٚ رِه عزأدأری بوکود. 3 بأزون ایبرأهیم جٚه اونٚ بی‌جأنٚ جینأزه ورجأ ویریشته، حیتّی پیله‌کسأنَ بوگفته:
4 «من اَ سرزیمینٚ میأن غریب و میهمأن ایسم و جأجیگأ نأرم کی می زنَ بیگیلَ کونٚم. خأهیش کونٚم ایتأ تیکه زیمین مٚرَه بوفروشید کی می زنَ اونٚ میأن بیگیلَ کونٚم.»
5 حیتّیأن ایبرأهیمَ جوأب بٚدأده: 6 «شومأ اَمی آقأ ایسید و تأنیدی شیمی زنأکَ اَمی بِیترین مقبره میأن بیگیلَ کونید. هیتأ جٚه اَمأن اَمی مقبره‌یَ شیمی جَا دریغ نوکونیمی.»
7 ایبرأهیم اوشأنٚ جولو خمَ بوسته، تعظیم بوکوده، 8 بوگفته: «هسأ کی وئألیدی می زنَ اَیَه بیگیلَ کونٚم، خأهیش کونٚم عفرون صوحارٚ پٚسرَ بیگید 9 مکفیله غأرَ کی اونی کیشأورزی زیمینٚ آخر نٚهأ، مٚرَه بوفروشه. البت اونی پولَ تومأم و کمأل شأهیدأنٚ ورجأ فأدم کی او غأر می خأنوأرٚ مقبره بٚبه.»
10 عفرون، حیتّی پیله‌کسأنٚ ورجأ کی شهرٚ دروأزه ورجأ جمَ بوسته بود بوگفته: 11 «اَی می آقأ، من او غأرَ و او کیشأورزی زیمینَ اَ مردومٚ ورجأ شٚمٚره بٚخشم. بیشید و شیمی زنَ اونٚ میأن بیگیلَ کونید.»
12 ایبرأهیم ایوأردِه حیتّیأنٚ ورجأ خو سٚرَ تعظیمٚ وأسی بیجیر بأوٚرده 13 و همٚتأنٚ ورجأ عفرونَ بوگفته: «وئأل اونَ تی جَا بیهینم. من تومأمٚ او کیشأورزی زیمینٚ پولَ فأدم و اونٚ پٚسی می زنأکَ اونٚ میأن بیگیلَ کونٚم.»
14 عفرون جوأب بٚدأ و بوگفته: 15 «اَی می آقأ، چأرصد میثقأل نوقره اونی پول ایسٚه؛ ولی اَ قیمت اَمی دوستی ورجأ چی ارزش دأره؟ بیشید و شیمی زنأکَ اونٚ دورون بیگیلَ کونید.» 16 پٚس ایبرأهیم چأرصد میثقأل نوقره، ینی او قیمتَ کی عفرون همه کسٚ ورجأ پیشنهأد بٚدأبو، تومأم و کمأل اونَ فأدأ.
17 اَن ایسٚه او زیمینٚ صفت نیشأن کی ایبرأهیم بیهه: عفرونٚ کیشأورزی زیمین کی مکفیله میأن ممری مِلکٚ نیزدیکی ایتأ غأر کی او کیشأورزی زیمینٚ آخر نٚهأ بو و تومأمٚ اونٚ دأرٚ درختأنٚ اَمرأ. 18 اَ کیشأورزی زیمین و او غأر کی اونٚ میأن نهأبو حیتّی پیله‌کسأنٚ ورجأ کی شهرٚ دروأزه ورجأ نیشته بود، ایبرأهیمٚ شین بوبوسته. 19 پٚس ایبرأهیم خو زنأی سارایَ مکفیله زیمینٚ غأرٚ دورون کنعانٚ سرزیمینٚ میأن، ممری نیزدیکی کی هو حبرون ایسه، بیگیلَ کوده. 20 اَطؤیی بو کی، او زیمین و غأر ایبرأهیمٚ شین بوبوسته کی همیشکٚ رِه ایتأ خأنوأرٚ مقبره مأنستَن اونٚ جَا ایستفأده بوکونه.
The Gilaki Contemporary Bible is a Product of Transform Iran © 2024. All rights reserved. www.kelisayejame.org