3. Mose 9
9
O Aron marell firhen o baro Debleske
1Har o orhtato dives vas, kharas o Mose o Arones oun leskre morsh čaven oun i phoureder dran Israel pash peste, 2oun penas ap o Aron: “Le touke i terno gouroum#9:2 gouroum stiro oun i morsh bakro, ko gouroum, te vell lo maredo, te vell i doosh krik lino, oun ko bakro, te vell lo maredo, oun leskro tselo mass o baro Debleske rhačedo. Kal douy hounte venn sasto. Kolla an glan o baro Debleste: 3Oun rake i Israelentsa oun pen lenge: Anenn yek morsh bouzni, hoy vell maredo, te vell i doosh krik lino, ninna i terno gouroum oun i terno bakro, hoy yek bersh phouro hi, te vell lengro mass tseles rhačedo o Debleske. Kol douy hounte venn sasto. 4Anenn ninna i gouroum oun i morsh bakro, te maras mer len glan o baro Debleste, oun rhan len kote khetne. Koy pashel anenn yarro, kay djet dren hi, te rhačras mer les o baro Debleske. Kava dives hi ko dives, kay o baro Devel pes t'menge sikrell.”
5Yon anan kova, hoy o Mose penas, glan o voudar o baro Debleskro plarhteno kherestar. Oun i tsele Israelitarya van kote khetne glan o baro Debleste. 6oun o Mose penas: “O baro Devel penas, te krenn t'mer kava, te sikrell lo pes t'menge an peskro raylepen.”
7Oun o Mose penas ap o Aron: “Ab glan o Debleskri rhačepaskri, oun an leske ko firhes, koleha tiri doosh krik lino vell, oun mare ninna touke ko firhes, koleskro tselo mass o Debleske rhačedo vell. Palle kre kova kol firhentsa, hoy i Israelitarya anan, te vell lengri doosh krik lino. Yaake penas kova o baro Devel.”
8O Aron vas glan i rhačepaskri oun maras ko terno gouroum, hoy yob anas, te vell peskri doosh krik lino. 9Oun leskre morsh čave anan leske o rat. Oun yob čivas peskro goushto an o rat, oun makas čomone ko ratestar ap i shinga#9:9 shinga horne, hoy ap i star ekke pral ap i rhačepaskri hi. Oun o vavar rat čoras lo tella pash i rhačepaskri. 10O thulepen oun i nire oun ko thoullo kotar ap i lebra rhačras lo ap i rhačepaskri, yaake har o baro Devel kova o Moseske penas. 11O mass oun i hauta rhačras lo vin glan koy platsa, kay i menshe his.
12Palle maras lo ko firhes, koleskro tselo mass o baro Debleske rhačedo vell. Oun leskre čave anan leske o rat. Oun yob čoras les troul o Debleskri rhačepaskri ap leskre star rigya. 13Oun yon anan leske kol kotya mass, ninna o shero. Oun yob rhačras len ap i rhačepaskri. 14Yob thovas i bouke, oun i palstoune herya, oun čivas len pral ap ko vavar mass ap i rhačepaskri, oun rhačras len.
15Pal kova anas lo glan o baro Debleste kol firhen, hoy i Israelitarya anan. Yob maras koy morsh bouzni, te vell i doosh i Israelendar krik lino, oun kras kava firheha yaake, har lo glan kova koleha kras, hoy lo peskri doshake maras. 16Palle maras lo ko firho, koleskro tselo mass rhačedo vell, oun kras leha har o baro Devel penas. 17Ninna anas lo ko yarro, kay djet dren hi, las i vast pherdo oun rhačras les ap i rhačepaskri, yaake har kras lo ap i tsalla, har lo o firhes o Debleske anas, koleskro tselo mass rhačedo vas.
18Palle maras lo ko gouroum oun ko bakro ko rhapaske, hoy i menshe khetne rhan glan o baro Debleste. Leskre čave anan leske o rat. Oun o Aron las ko rat oun čoras les troul i rhačepaskri ap leskre star rigya. 19Ko thulepen kol douy firhendar, koy thoulli pori oun o thulepen ap i bouke, oun i nire oun o thoullo kotar, hoy ap i lebra hi, 20kava tselo thulepen čivas lo ap i bečeskre kotya. Oun o Aron rhačras ko thulepen. 21Kol bečeskre kotya oun i čače palstoune herya hadas o Aron glan o baro Debleste pre, te sikrell lo, kay kal tsele firhe o baro Debleske his. Yaake penas kova o baro Devel o Moseske.
22Har anas o Aron kal tsele firhen o Debleske, hadas lo peskre vasta pre pral i tsele menshende, oun rakras o Debleskri barht pral lende vin. Palle djas lo koy treppa tele foun koy rhačepaskri. 23Oun o Mose oun o Aron djan pale an o Debleskro plarhteno kheer. Oun har le pale vin van, rakran le o Debleskri barht vin pral i tsele menshende. Kote sikras pes o baro Debleskro raylepen glan i tsele menshende. 24I yag djas vin o baro Deblestar, oun rhačras ko mass pre kol firhendar, koleskro tselo mass rhačedo vell, ninna kol thoulle kotya, hoy ap o Debleskri rhačepaskri čiddo his. Har kova i tsele menshe dikan, dan le i barhtyatar gole, oun čivan pen tele glan o baro Debleste ap i phoub.
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.