MARKU 16
16
Yesu Dei To' Lo Khyoo:
(Mat 28:1-8; Luk 24:1-10; Yoh 20:1-10)
1Yuda Dougn: Bidnyid lid loo" lang"-Magadala Mari- Yaku nya: myhi' Mari yo' Solome gi-Yesu da" mang moo joid byid: wa shid re" shoem: nam pyo: da" xu: qei yu ago". 2Nyangnu" gi Dougno: bidnyid" nabsoin: no' bidxain" so' moo loeb khyoo: yhe: lo" ago". 3Nyangnu" gi khyoo: laid, moo-ngoonu" ri loeb khyung: nhoid mo lug loem: hang" se' tu: khyoo byid: wa lha"» ga: nyang: cang" nyang: tid go" yhe: lo. 4Nyangnu" yhe: yu" kaid boem ri lug zeing gi gye" gyi: zi nghoid. 5Nyangnu" gi loeb khyung: khoug khyoo: vang yhi: yo' mibyi: phyu: void ci: da" zoolu: dayug lo, yo shoid' moo zhoung: jo, ziri yhe: myang boem wigi nyangnu" gi gye" dain byug boem bye.
6Houg: lang" nyang: gi yangnu" riAdain amoug" goo"- nanu" gi pyang zeing moo said pyam bye: da" Yesu ri sho: nyid ago" nyang: gi dei to'' lo" byud, bye: nyang: hid: moo anyid loo: nyang: ri lheung: to" joyoo: moo we' yhe: yu" ge". 7Ngoid' loug Nanu" loo" ge'- Petru yo' nya: cangzoo: yi ri «nyang: gi Galile mung" moo nanu" da" shid' khyoo: yhe: loo" lang" wa ga: nyang: nanu" ri tid too" bye: ziyo' dakhyoo" houg: moo nanu" nyang: yo' yhe: shau" goo" wa ga: ein: lo" tid kyoo" ge'»ga: tid kaid.
8Nyangnu" gi loeb khoug mo thu' lo lho: tang" phang: lo" ago". Khasu" wim ga: ri nyangnu" gi gye dain nain" lo" boem bye- nyangnu" gi gyoug boem yoomo hang" ri ci" we' atid kyoo" nghoid boem ago".
Magadala Mari Ri: Yesu Nya: Gung Nyid Shoug Khyoo:
(Mat 28:9-10; Yoh 20:11-18)
9Akuid" Labain nyid" nabkyoo' no' mo Yesu dei to'' lo thang: ri-nyang: wigi yu nyhed, du: ri khaid thu' pyam byid: da" Magadala Mari ri xang shid" nya: gung nyid shug byid: 10Magadala Mari gi thu' yhe: lo" lho: koug ' shu: ziyo' ngau nyid boem da" shid' phyang" ngau Yesu yo' nyid yu bye bang: ri lo" tid kyo. 11Nghoidloug we' nyangnu" gi Yesu dei nyid ziri Mari gi Yesu ri myang bye: ga: zi nyangnu" shau" gyo ri aloem" boem nghoid ago".
Cangzoo: Eig Yug Ri: Yesu Nya: Gung Nyid Shoug Khyoo:
(Luk 24:13-35)
12Hau: thang: ri Yesu gi-sooyo, voogung khyoo: yhe: lo" nyid go" da"-cangzoo: eig yug ri-goo" tu: ayoeb abang khyo" nya: gung ri nyid shug. 13Houg: lang" nya: eig yug gi doem tau" phang: lo" lho:-gootu: cangzoo: yi ri we' hau: khyoo: lo" tid kyo" ago". Nghoidloug we-nyangnu" gi hau: khyoo: ri aloem" nghoid ago".
Cangzoo: Daxe: Dayug Ri: Yesu Nya: Gung nyid Shoug khyoo:
(Mat 18:16-20; Luk 24:36-49; Yoh 20:19-23; Lgy 1:6-8)
14Hau: thang: ri Yesu gi-cangzoo: daxe: dayug kyeing" voem: zo: nyid boem uri nya: gung ri nyid shug. Yesu gi nyang: shid: jang" mo doem dei to'' lo thang: ri nyang: ri shau" myang mo, dang: ri cangzoo: yi aloem boem yoomo-nyangnu" loem jeung" myid abo ziyo' nheugloem: thain: nyid khyoo: ri gyikoid. 15Houg: lang" Yesu gi nyangnu" ri- nanu" moug: myid goin" goem: sho' yhe: lo" wigi myu" cang: joeb sho' mo, ri hau: ngei bu: lu dang: kho" khyoo" ge'. 16Loem" jeung" lho:- Babtisma kham: su: hang" nghoid loug we' khyoid yu zi shau" goo" wa nghoid loug aloem" ajeung" su: gi hang" we' tarha" dang: phyed zi shug goo" wa. 17Loem jeung" mo, gi he: da alhoo: again joem ri yo" koid va, nga" myeung khyang" khyo" wigi yu joem ri khaid thu' pyam boem wa nghoid. Hau: lho: goo" ki" lid da" dang: joem ri tid loo goo" wa. 18Nyangnu" gi lhang: myu joem ri myheug zei: nghoid loug we-shid: lo" ja: myoo: no, dug yeung daja: ja: shug loug we' ci: aca" goo" wa hau: lho: noo phyoo" shau" mo, tho' moo nyangnu" lo, ki" byid: lang"-noo phyoo" shau" mo, we' ge shang: lo" boem wa"-ga: tid kyo".
Yesu Moug: khung: khyoo: Do, Lo" Khyoo:
(Luk 24:50-53; Lgy 1:9-11)
19 Aseing Yesu gi hougsu" ga: cangzoo: yi ri bain tid lang" nyang: gi moug: khung: khyoo: to' yu zi shau" lho: Mangso lo, yo shoid moo zhoung: jo, bye. 20Houg: lang" cangzoo: yi gi thu' yhe: lo" lho:-joyoo khyi, khang" moo" moo ngei bu: Ludang cang kho" kyo" lo". Aseing: gi nyangnu" yo' dage" moo" zei: yen" wigi-mau" pho" alhoo: again toin" shid khyo"-hau: mungdang: ri geung: teung jo, nhang.
Dang: Thang: Said Jang" Moo Axoug" Gootu: Daloem:
(9. Myiyi yi gi-Petru yo' nya: byen cang" yi jhang yhe: lho: nyangnu" ri tid da" dang: joem dangain" ri leung" khyo" wigi-nyangnu" ri yhe: tid kyo" ago". 10. Hau: thang: ri Yesu nyangnya: cangzoo: yi ri apyaid ato: khyoid' yu da" gyeungshang: zi ngoid dei nyid da" ludang: ri bid thu shoid mo zi bidvang shoid moo ju" sho' yhe: kho" kyoo" wa shid re" nhang: kaid.
Lacid Bible © Bible Society of Myanmar, 2009.