GAL 3
3
Bǝɗ Masaka Musa wa hana na ɓongtǝra ma Almaseho wa
1Saa ɓaa Galatiyawa ɓa, sǝ hautau? Ko yaake yǝ tomsǝ matǝma niu? Saase ɓaa nǝ weɗɗasǝsǝ Yeso Almaseho a talte, yaa yǝ woɗsǝ ɓoti a kwaakǝra ya. 2Waso nǝn yau me nǝsǝ taa mbuka fin maɗ. Sǝ kon Wis Kaa wa me sǝ tomma bǝɗɗo masaka Musa wau, ko me sǝ na ɓongtǝra ma mara u sǝ kurasǝ wau? 3Waso ǝn nkamǝra hautǝma nara sǝsǝ ma siso maasou? Aa sengge, sǝ ntii ma Wis Kaa wa, pa waso sǝn taa me sǝ feɗ ma kweeto nkweerase wa ma lau maabiri ete ete ya! 4Hankara, kongsa ɓolɓol sǝ weesǝ sa, kanggan salǝu? Maaso mbusǝsa kǝ tommou? 5Hankara, Kaa yaa yǝ nasǝsǝ Wis usu ya, ɗǝm yǝn tom mbu u nhiinyanhiinya wa a ɗaaso waaso, sǝn sen me yǝn tom maaso me sǝ tomma bǝɗɗo masaka Musa wa, ko me sǝ kurasǝ mara Almaseho ra, ɗǝm sǝ na ɓongtǝra wau?
6Sǝ sengge kaɗɗo Ibrahim wa. Nga ɓaa nyorsǝ a likarkar Kaa wa me, “Ibrahim yǝ na ɓongtǝra ma Kaa, ɗǝm Kaa yǝ kau mbu sǝsa nga tom mbu yǝsǝ keke a wiiyo a Kaa ni ɓa, a sanii.” 7Me maaso, aa maa me, ɓaa ɓǝsǝ ma na ɓongtǝra ɓa, ɓǝ tuwa Ibrahim wa, 8Nga ɓaa nyorsǝ a likarkar Kaa wa tangtang me, ɓaa ɓǝn Yahudawa ra ɓa, kǝɓǝ taa kaɗ ɓan tom mbu yǝsǝ keke a wiiyo a Kaa ni ɓa, ma lau na ɓongtǝra wa me, tangtang ɓaa wee nkee Ibrahim mara kwalari ran me, “Nsaad tǝna kǝɓǝ taa saltǝra ma lau waango.” 9Me maaso, ɓaa ɓǝsǝ ma na ɓongtǝra ɓa, ɓaa kǝɓǝ ti saltǝra ke ma Ibrahim eɗ ma naɓongtǝra ya. 10Nsaad ɓaa ɓǝn sensǝ me, Kaa kiyǝ ɓǝ kon me tomma bǝɗɗo masaka Musa wa ɓa, ɓǝ ɓan ma meto ɓa. Nga ɓaa nyorsǝ a likarkar Kaa wa me, “Hana yamni, yaa yǝ bǝɗ nsaad mbu ɓaa nyorsǝ a likarkar masaka Musa wa ra ya, yǝ an ma meto ya.” 11To, mbu sa a talte, yaake sem kǝn kiya nkaa yǝ taa kaɗ an tom mbu yǝsǝ keke a wiiyo a Kaa ni ɓa, ma lau tomma bǝɗɗo masaka Musa wa ra, nga ɓaa nyorsǝ a likarkar Kaa wa me, “An tom mbu yǝsǝ keke a wiiyo a Kaa ni ɓa ya, ma lau na ɓongtǝra wa, kiyaa ɗanyǝ wa.” 12Masaka Musa wa yǝ sem a ɗuura naɓongtǝra wa ra. Nga ɓaa nyorsǝ a likarkar Kaa wa me, “Yaa yǝ tomsǝ nsaad mbu ɓaa nkeesǝ a Masaka Musa wa, ma lau siso kiyaa ɗanyǝ wa.” 13Meto yǝsǝ a Masaka Musa siso wa, tǝ nkweetǝn a sin, me Almaseho yǝ kwan nkweeto waaton a meto siso, ma lau yǝ kangsǝ an ma meto ya a ɗuura ta wa. Nga ɓaa nyorsǝ a likarkar Kaa wa me, “Nsaad yaa ɓaa tarsǝsǝ a kwaakǝra ya, yǝ an ma meto ya a Kaa ni.” 14Almaseho yǝ kwan nkweeto waaton, tom maaso me saltǝra u ɓaa nasǝ Ibrahim wa, aa wo ɓaa ɓǝn Yahudawa ra ɓa, ma lau Almaseho Yeso wa. Ma lau maaso wa, ndase kǝn ma lau naɓongtǝra wa, kǝ ndǝ nkaa ndǝ taa Wis Kaa yǝ tomsǝ waa kawa.
Ɓolɓolto a ɗaaso Masaka ma Waa wa
15Ɓaata ɓǝna, a lee nǝsǝ na mǝɗkǝra a ɗuura mbu sǝ solsǝ ma siso ɓa. Me ɓeta raɓ ɓǝ tom waa a ɗaaso ɓoso, ɗǝm ɓǝ ti neme a si, me aa weɗɗa yauwo ɓosa, to, yaake sem kǝn kiya mbisi wa ra, ɗǝm yaake yǝ sookǝ mbuka a si ra. 16To, Kaa yǝ tom waa Ibrahim ma tuwa usu. Pa ɓaa nyor a likarkar me “nsaad tuwa” ra, u ka weɗɗa me u ɓeta dem wa ra. Awo, ɓaa nkee me, “tuwa waango,” weɗɗa me ete fin, ǝn ndǝ sase Almaseho. 17Mbu nǝn nkeesǝ ɓa ndǝ siso, Kaa yǝ tom waa ma Ibrahim ɗǝm yǝ ti neme asi. Masaka Musa u ɓaa wosǝ meeta pusa pu kurun nhaa pwataatǝn ndiira tom waa u Kaa wa, yǝ nkaa yǝ kang waa Kaa yǝ tomsǝ ɓa, aa tom mbu sal ɓa ra. 18Meka kangge u Kaa wa, ǝn taa ma lau tomma bǝɗɗo masaka wa wa, kama aa taa ma lau waa wa ɗǝm ra. Pa Ibrahim usu, ma lau waa wa, Kaa yǝ nasǝsǝ kangge siso wa.
19Yaa me maaso, mbu kwa mbi ɓaa wosǝ ma masaka Musa wau? Ɓaa sookǝ ma masaka Musa siso me ǝtǝ nwanyǝ tenatenato waato a talte. Ɓaa wo ma waa siso ma senda me aa tomma bǝɗɗo ndub fer tuwa Ibrahim siso ka wo wa, sase yaa ɗuura ira ɓaa tomsǝ waa siso wa ya. Masaka Musa siso ɓaa ti ma lau ɓan timira Kaa ɓa, ɗǝm ke ma yaa yǝn kansǝ mara a ɗaaso ɓeta ya wa. 20Yaa yǝn kansǝ mara a ɗaaso ɓeta ya, yǝ kanaa mbu nteesǝ ete fin ɓa ra, pa a mara waa siso ra, ǝn Kaa fin mbusa.
21Yaa usu weɗɗa me masaka Musa wa yǝn tom simɓara ma waa Kaa wau? Awo, sem maaso ra! Meka nkee me ɓaa wo ma masaka ko, u kǝ tǝn ti tǝ ɗanyǝ wa, u siso kǝ weɗɗa me, kǝ nkaa a taa kaɗɗo tom mbu yǝsǝ keke a wiiyo a Kaa ni ɓa, ma lau tomma bǝɗɗo masaka Musa siso wa. 22Pa nga ɓaa nyorsǝ a likarkar Kaa wa me, nsaad put taandi wa, yaa kunda kwangto tenatenato ra wa. Mbusa tom maaso me, waa ɓaa tomsǝ ma lau naɓongtǝra a Yeso Almaseho ni siso, ɓaa kǝ na ɓaa ɓǝ nasǝ ɓongtǝra ɓa.
23Tǝng naɓongtǝra si wo sundura wa, Masaka Musa siso likindǝ nga pursuna, ndub fer naɓongtǝra wa, ka nwanyǝ wa. 24Waso, ɓaa ti tǝ a kunda kuɓsutu Masaka Musa ra, me ǝtǝn ko a Almaseho ni, me ma lau na ɓongtǝra wa, ndǝ taa kaɗɗo ɓaa ɓǝn tomsǝ mbu yǝsǝ keke a wiiyo a Kaa ni ɓa wa. 25Waso tomsǝ me, naɓongtǝra wa won wa, tǝ sem a kaɗɗo a kunda kuɓsutu Masaka Musa wa ɗǝm ra.
Em Kaa ɓa
26Ma lau naɓongtǝra a Almaseho Yeso ni wa, nsaad saase, sǝ kaɗ em Kaa ɓan. 27Ɗǝm ɓaa soɓsǝ ɗuura u weɗɗasǝ me, saase sǝ kaɗ fin ma Almasehon, me maaso, sǝ too sikoo Almaseho wan, yǝ kaɗ kaɗɗo waason. 28Me maaso, mbuka ɓaa ɗaaso ɓaa Yahudawa ɓa, ma ɓaa ɓǝn Yahudawa ra ɓa. Ɗǝm mbuka ɓaa ɗaaso au taanda ya ma hoora ra, hana ɗaaso toone ma parara wa. Ai, nsaad saase, sǝ fin ma lau Almaseho Yeso wa. 29Pa me sǝ kaɗ fin ma Almasehon, usu weɗɗa me, sǝ kang tuwa Ibrahim wan, ɗǝm ɓan kangge ɓa ma lau waa siso wa.
©2023 Seed Company in collaboration with Language Developers and Bible Translators Association