2 Korantiyawa 4
4
Kǝnaa a hun honta wa
1Me maaso, waso tǝsǝ ma tinima ma, ma lau nyorataara Kaa ra wa, tǝ hik nwaa ra. 2Mbuka nteetǝ ma nkamǝra mbu a nhuukǝra ɓa ma mbu ɗuura nwaara ɓa ra. Mbuka nteetǝ ma nlaata hana para ma mara Kaa ra ra. Pa tǝn kan ɓongtǝra a talte. Ma lau maaso wa, hana yamni kiya maa a senda kuɗa ira me, tǝ taa ɗǝɗa a Kaa ni. 3Me hana mara kwalari tǝn nkeesǝ sǝra yaa nhuukǝra, ai, yaa nhuukǝra a ɓaa ɓǝsǝ a ɗǝɗa tumo ra wa. 4Ɓosa ɓǝn ɓaa ɓǝ naa ɓongtǝra ra ɓa, me Shaitan, yaa yǝn tomsǝ kuɓsutu put taandi yase wa, yǝ likiɓǝ kuti ɓosen. Yǝ saaɓǝ wǝr ɗekɗekto u ǝn tooɓǝsǝ handa wa, ɗekɗekto siso, ǝn u yǝn fiɗsǝ ma lau mara kwalari u too Almaseho ra wa, yaa yǝsǝn sase sakankuura Kaa ra wa. 5Mara tǝ nkeesǝsǝ ra, ǝn u nkweerate wa ra, pa ǝn u Yeso Almaseho wa, ǝn ndǝ sase Ankundi, taase kǝn tǝ nga hoota saa men Yeso. 6Kaa yaa yǝ nkeesǝ me, “Aa lee ɗekɗekto yǝ too handa a han teptepto ɓa ya.” Ɗǝm ndǝ sase yǝ tisǝ ɗekɗekto usu yǝn toosǝ handa a kuti yaande wa, me aa too handa ɓeta me ɓǝ maa too Kaa wa a oota Almaseho wa.
7Pa nsaad mbu tǝsǝ ma siso sǝsa wa, ɓǝ nga kǝnaa u yǝsǝ a hun honta wa maɗ, me aa weɗɗa me, kwangto u faɗsǝ nsaad wa, yǝ fiɗ a Kaa ni, yǝ fiɗ a taani ra. 8Ɓan natǝ kongsa ma ɗǝta ɓolɓol, hana maaso, ɓaa nkaa tǝ ti tǝ kong ma tom tinima sǝma wa ra. A kaa fera tǝn tom pǝno, pa tǝ hikaa nwaa wa ra. 9Ɓan ti tǝ wee kongsa, hana maaso Kaa yǝ leetǝ ra. A kaa fera ɓan hoɓ tǝ, tǝ nwii a putu, pa hana maaso ɓaa tumtǝ ra. 10Tǝ nfee a ee woɗɗa ya, nga ɓaa tomsǝ Yeso wa, me kaɗɗo Yeso wa, aa nwanyǝ a maabiri yaande u yǝn woɗsǝ wa. 11Nsaad a tǝro waato a put taandi wa, ɓǝn titǝ nfee a ee woɗɗa ya men Yeso, tom maaso, me kaɗɗo Yeso wa, aa nwanyǝ a maabiri yaande u yǝn woɗsǝ wa. 12Ndǝ siso mbu kwaasǝ tǝsǝ a ee woɗɗa ya wa, me saase sǝ taa huurtu.
13Nga ɓaa nyorsǝ a likarkar Kaa wa me, “Nǝ na ɓongtǝran, ndǝ mbu kwaasǝ nǝ kansǝ ɓa.” Waso ndǝsǝ ma nkamǝra wis naɓongtǝra fin wa, to, taase kǝn, tǝ na ɓongtǝran, ǝn siso mbu kwaasǝ tǝn kansǝ wa. 14Tǝ maan me Kaa yaa yǝ niksǝ Ankundi Yeso a woɗɗa ya, kiyǝ tǝ nik ke ma Yeso, ɗǝm kiyǝ tǝn wo ke ma saase tǝ nǝɗ a wii usu. 15Nsaad siso tom me saa hima, me nga kwasira Kaa ra yǝn sookǝsǝ maaso dem a ɓeta ni wa, siso kǝ tom mbuka sookǝ na himara a Kaa ni wa, me aa too Kaa.
16Me maaso tǝ hik nwaa ra. Hanaka maabiri yaate yǝn tǝblǝsǝ siso, hana maaso ɓan kangtǝ ma wis waato nfiinfii nfee. 17Tom maaso me kongsa ngeek u tǝn weesǝ wa, yǝ tom kwaɗ ɗa, kiyǝ tǝ wo ma too dem, u aa nkaa aa mǝɗkǝ ra wa, ɗǝm kiyǝ kaɗ pakarese wa. 18Ndǝ siso mbu kwaasǝ tǝ senggaa mbu nuuwa ǝn nkaasǝ aa wǝr wa ra, pa mbu nuuwa wǝraa ra ɓa maɗ, me mbu nuuwa ǝn wǝrsǝ ɓa, ǝn tum naakǝn, pa mbu nuuwa wǝraa ra ɓa, ǝn kaɗ pakarese.
©2023 Seed Company in collaboration with Language Developers and Bible Translators Association