JAŊ 16
16
1Ndi wãã ne nday doosen maga nday mo lag de hã ɓil ɓay ngiŋ. 2À niɗ we ge yaŋ go se tiŋ tosge ɓaaran wo. Day wurpo a ge yaŋ le pa, jar po id wo we yaŋ go, ɗig wo yaŋ ga saara de joŋge mokay diŋ joŋre Baa. 3Á joŋ ge wo doosen, diŋ werga á bay wo de ko Pããben wa, ko wo ndi gà lay. 4Ama ndi siin we go ne nday, maga wur sen wo ge we a ge, ni nday mo ɗig ti ga ndi hay sii we ne nday nono.
Joŋre Nenterse ma bay ɗag no
Ndi wããn le go ne nday taŋgu gà diŋ werga ndi hay hay yoo ɓay ɗa. 5Day patala ndi da rawge ɓiŋ je maga ɓoʼ me le mono, day jobo laa wii mege yoo ɓay ga ndi wo genla gà. 6Ama jiili ɓay raw caa ge go diŋ wer maga ndi wãã we doosen no mono. 7Patala ndi riŋ we kidolgi, daga ndi mo raw, sen diŋ ma woo we ge, werga hayga ndi raw we gà no, je ma kay we ge a ge see ɓay gà. Ama hayga ndi raw we no, ndi raw ɓoʼ ge ɓe ge le ne nday so. 8Á wo we a ge so no, á raw yaŋ kaŋ nen jar ma ti tamsir wo go ko ɓlagge ɓaara no, ko re ma de deele, ko wo re maga Baa cag ne ge mo lay. 9Ko wo yaŋ ga saara diŋ jar ɓlagge, wer maga saara yãã wããre ɓin gà mono. 10Ko wo re ma de deele no, wer maga ndi de rawge see Pan ɓi, á ko ge wo nen ɓi gà so hase. 11Ko wo re maga Baa cag ne yaŋ, werga ren go de baa waŋ jar ma ti tamsirn la no.
12Wããre yaŋ jag ɓi debaŋ ma jon siigi ne nday, ama nday kãã ma soɗ ge ɓe patala gà ɗa ane. 13Wur maga Nenterse ma wãã cwãyn a ge we no, á wo ge yaŋ de ɓay ko re ma cwãyn ɓuy. Á wãã ge ne nday diŋ wããre ma de ti ngel see ɓe gà ama á wãã ge ne nday diŋ wããre maga á hay laa ne, á sii gi ne nday diŋ re maga a ge wo wurpo. 14Á togoɗ ge ndi yaŋ, á hoo ge wããre ɓin wo, yaʼ ge sii gi ɓe ne nday. 15Fẽẽre maga wo diŋ ma Pããben mo ɓuy, wo diŋ ma ɓi lay. Diŋ wersen ndi riŋ we ga Nenterse ma bay ɗag hoo wããre ɓin wo, yaʼ ge sii gi ɓe ne nday mono.
Lawge see kol ge go wurpo diŋ fruygi
16Naw gwaʼ rab koɗe nday ko ge nen ɓi gà so hase, day blam naw sen rab pa, nday fer ge yaŋ ko nen ɓi tigriŋ pa. 17Jar po wo yoo jar ma wer ɓen raw wo riŋ kããra ga : A wãã ga naw gwaʼ rab koɗe, naa ko ge nen se gà so hase, day blam sen naw rab pa naa fer ge ko nen se kway pa. Se de wo ge see Pããbe no, á wãã naa gahãy ɓa? 18Wer wããre maga á wãã ga naw rab koɗ gahãy ɓa? Naa bay de laa wer fen maga á wãã ti ɓe mo hãʼ wa. 19Yeso raw koge ga á wo de sãy wii sege ti, raw riŋ rage ga : Ndi hay riŋ we we ga : Naw gwaʼ rab koɗe nday ko ge nen ɓi gà so hase, day blam sen naw rab pa, nday fer yaŋ ko nen ɓi, nday wii kããra naa diŋ ti sen no? 20Kidolgi ndi riŋ we ga nday raa ge yaŋ, nday ndum gi yaŋ, ama jar ma ti tamsir la joŋ wo fruygi yaŋ, nday kol yaŋ law see ɓay, ama law ge see ɓay kol yaŋ go diŋ fruygi. 21Naw wãy kos we go ma biŋgi so no, á raw ɓoʼ ɗee law see ɓe, werga bon de a ge ti ɓe, ama mbargan wo kal ge le go mokay, á raw yõõ ti bon ma keɓaan go, werga ɓil ɓe raw joŋge go feh ti mbarga maga se biŋ ne go mono. 22Nday de ngaɓge doo wãy no lay, patala nday de law see ɓay, ama ma ɓi, ndi fer ge yaŋ le ko we ge, nday joŋ ge fruygi yaŋ, jobo kãã ma dig fruygi ɓay ge go gà hase.
23Wur sen wo ge a ge mokay, nday wii mege ti mopo gà so hase. Kidolgi ndi riŋ we ga Pããben hã ge fẽẽre maga nday wiɗ ne ge de ɗúu ɓi mo ɓuy yaŋ ne nday. 24Hãã bo patala nday bay de wii mopo de ɗúu ɓi wa ɗa hase, wiɗ we, ni nday daɗ yaŋ, wersen ni ɓil ɓay joŋ yaŋ go feh debaŋ so.
Yeso ga se de joŋ blum jar ma ti tamsir wo no
25Ndi wãɗ ne nday patala ɓuy diŋ de jagjõõ. Day wurpo a ge yaŋ le maga ndi wãã ge ne nday de jagjõõ gà so hase, ama ndi kãã ma wãã wããre mani Pan ɓin go ne nday paha. 26Wur sen wo ge a ge mokay, nday wiɗ gi Pããben wo de see ɓay ti ɗúu ɓi. Ndi wii we ga ndi wii gi Pããben ti ɓay gà so. 27Werga Pããben de see ɓe da we. Á da we wer maga nday de da ndi, nday yãã re ɓi ga ndi a le go see Baa. 28Ndi a le go see Pããbe no, ndi raw age yoo jar ma ti tamsir la wo, patala ndi men jar ma ti tamsir lan wo go, ndi de ferge see Pããbe no.
29Jar ma wer ɓen raw wo riŋgi ɓe ga : Ndo de wãã ge ɓe go bay jagjõõ patalam pah kay so no. 30Patala wùr ko we ga ndo go de ko reen ɓuy, ndo bay de sãy maga à mo wii mo wii gi wa, diŋ wersen, wùr de yãã wããre ɓo ga ndo a le go see Baa. 31Yeso raw fer wããre ne hara ga : Nday yãã wããre ɓi we patala so gla? 32De ele, wùr yaŋ a ge, á go de a ge patala yaw, maga nday dus ge go boŋ boŋ ɓuy wosela liŋ ni ɓe liŋ ni ɓe, nday men ge ndi ge go boŋ, day ndi joŋ ge de see ɓi boŋ gà werga Pããben yaŋ de ɗaw ndi. 33Ndi sii sen ne nday mo ɓuy kay, maga nday mo hay de tayge see ɓi jam. Jar ma ti tamsir la joŋ wo coo ɓay yaŋ, ama lag we ngiŋ. Ndi go de joŋ blum jar ma ti tamsir wo no.
Tupuri Bible © Bible Society of Cameroon, 2016. All rights reserved.