Zawxkauq 13
13
Minghkoan Dij Sen Hawj Zauqhoiq Anztih'az Chaenh Nemz Bauxloah Daj Baznahbaz Bae Dih Bae Dih
1Zauqhoiq Anztih'az chaenh, miz jij goanz puj zawxkauq dij Sen ux daj miz jij goanz lauxswz ux, zoq zawh Baznahbaz, Cizmaenh goanz goj rongx hoak Nihjeh naeh,#13:1 "Nihjeh" zoq zawh hax "nowx ndaem," goanz naeh ingj zawh dij goanz Faezzaeuz. Luqchaeuh ndaw Guxliqnaiq, Maxnenj goanz daj laux hongz Cizlih zaemh yuq dihndeu zowngx dwx naeh, yaq Sauxloah. 2Zwz paenqdix kvej Zaeuj, jenjkaeuj hoakri daj Zaeuj hax kauq naeh, Minghkoan dij Sen daj paenqdix hax: "Gux nemz Baznahbaz daj Sauxloah bae hoak gaenq gux yaix paenqdix hoak naeh. Baenzzaqnaeh su aeu Baznahbaz daj Sauxloah hoak daj puj ndai mboq dungzlumj, hawj paenqdix zoanzmaenh hoak sowh gaenq gux yaix paenqdix hoak naeh." 3Yaq paenqdix zoq jenjkaeuj hoakri daj dij Sen hax kauq, aeu mungz baed mwz now doiqdixvanz dij Sen gumx doiqdix, zoq nemz doiqdix bae. 4Minghkoan dij Sen nemz paenqdix loangzdin, bae Cizleuhjiz, daeq Cizleuhjiz naengh lowz bae Saiqpuxluqsez haixdaux. 5Paenqdix bae taeng Saxlazmix, zoq yuq ndaw le aen rownzndawcowq puj Yaeuhtaiq dih naeh aeu kauqfaengz dij Sen laemh dwk daenh. Yezhanq goanz goj rongx hoak Maxkowh naeh yuq baihdawj paenqdix, saeh paenqdix hoak raeng raeng. 6Paenqdix daeq daengz Saiqpuxluqsez nauq, doaklaeng bae taeng Paqfuh chaenh, yuq ndaw Paqfuh, paenqdix mex goanz ux rongx hoak Baz-yezsuzyaq,#13:6 "Baz-Yezsuzyaq" zoq zawh hax: "Lug Yezsuzyaq." Yezsuzyaq zawh minxzwh dez goanz gaengnaeh, Loixmax zawh minxzwh dix. Lez ndaw Sw Ni Aizjih 11-12. goanz naeh zawh puj Yaeuhtaiq, dix rux hoakbang, dix zawh puj zawxkauq dij Sen goanz zaj gaenqnaeh. 7Goanz naeh kwnz daj puj saeq dwx goanz rongx hoak Seqchaeuh-bauxloah naeh zaemh yuq. Seqchaeuh-bauxloah zawh puj gvai, dix qingj Baznahbaz daj Sauxloah maz, daz biak paenqdix koanx kauq dij Sen. 8Gaj Baz-yezsuzyaq dix kauq dij goanz zawxkauq Yezsuz, mboq zawx hawj goanz saeq dwx naeh sinq Zaeuj. Baz-yezsuzyaq goj rongx hoak Loixmax, Loixmax zoq zawh hax rux hoakbang. 9Sauxloah, goanz goj rongx hoak Bauxloah naeh, Minghkoan dij Sen dumh daengz ndang dix, dix lez bae doq goanz hoakbang naeh daengz ta mboq yaep saw, 10yaq hax: "Mawz ah, yaiz lug do pi dwx naeh, mawz goix tai goix naeuh, mbowq daengh taeuq, gaenqrawz hoj, mawz daj gaenqrawz hoak dangqbaih. Ka loh Zaeuj daeq ngaihngez, gaj taeng gannaeh mawz naengz hawj ka loh Zaeuj daeq raix, hawj kauq dij Sen nyungj nauq. 11Gannaeh, mungz Zaeuj zaemj daeuj doq mawz, hawj mawz ta'mbud, hawj mawz lez mboq taen gaeng goanq." Baz-yezsuzyaq cenq lez mboq taen gaeng, lez mwz rawz goj ndaem zumhzumh, dix lumhlamh haenzhenz, vanz daenh zung dix. 12Goanz saeq dwx naeh leztaen sowh saeh naeh yaq, zoq sinq Zaeuj. Dix mboq naemz sowh kauq Zaeuj zau naeh miz riangz baenzzaqnaeh.
Bauxloah Yuq Mbanj Pihcizdix
13 Bauxloah daj dungzbownh naengh lowz daeq Paqfuh mwz ndaw mbanj Panghfaezliqyaq aen chaenh rongx hoakBehzaz naeh, gaj Yezhanq goanz goj rongx hoak Maxkowh naeh yuq ndaw Behzaz ni paenqdix dauh mwz Yezluqsaxlaengx. 14Bauxloah daj Baznahbaz doiqdix daeuq daeq mwz baihnaj, mwz taeng ndaw mbanj Pihcizdix aen chaenh Anztih'az naeh. Vaenz Cednoiq, paenqdix mwz rownzndawcowq puj Yaeuhtaiq naengh. 15Gau doag Sw Dij Sen naeh gah yaq, sowh puj gvanx rownzndawcowq naeh nemz dij goanz bae daj doiqdix hax: "Song laux bih aj, jixzawh su miz kauq dungzchownq dungzbyongz, su zoq hax ndeh." 16Bauxloah dwnq maz, yaeuj mungz dix, hax: "Puj Yixsowhleh aj, sowh puj yowngh ndai ruxndeq mbu dij Sen naeh aj, gaenqsu biak gux hax. 17Dij Sen puj Yixsowhleh lowg puj jeq rownz piu, zwz puj jeq rownz piu yuq ndaw Aizjih dex daenh ndowj naeh dij Sen hawj paenqdix raengh. Yaq dix aeu riangz dwx dix lingz paenqdix daeq Aizjih og daeuj. 18Dij Sen yuq ndaw doanghmowz yinx paenqdix siqsip bi. 19Doaklaeng dij Sen ndaep jiat yowngh dij goanz ndaw Zaznanh naeh yaq, aeu Zaznanh hawj paenqdix hoak dih yuq dih hoakjin. 20Daeq zwz puj Yixsowhleh bae Aizjih naeh yaq doaklaeng ni Aizjih maz taeng ndaw Zaznanh dih dij Sen aeu hawj paenqdix naeh daengzle ndaej teq siq baeg laeng hajsip bi ux naeh. Doaklaeng, dij Sen hawj paenqdix miz sowh puj saeq hoak lauxgoak naeh, taengdeg zwz puj zawxkauq dij Sen Saxmuxex naeh zuxgah. 21Doaklaeng paenqdix vanz dij Sen saeh paenqdix lowg laux hongz ux. Dij Sen zoq hawj Sauxloah goanz lug zaiz Jizseq, goanz daeq ngah Benqyaqminh daeuj naeh hoak hongz paenqdix siqsip bi. 22Dij Sen hawj Sauxloah hoak gah yaq, dix lowg Daqvaeq hoak hongz paenqdix. Dij Sen hoakzaqnaeh hax Daqvaeq: ‘Gux cha ndaej goanz ux hojzaw gux, dix toj gaj loh gaj tw'zaw gux, dix zoq zawh Daqvaeq goanz lug zaiz Yezciz naeh.’#13:22 Gaemz kauq naeh haeuz yuq Sw Saxmuxex Bwnz Daih Aet Naeh 13:14.#Lownx 89:20; Yixsaiqyaq 44:28. 23Dij Sen hoakzaq dix ndaej yinq naeh, lowg luglan goanz naeh goanz ux jeuq dij goanz Yixsowhleh. Goanz naeh zoq zawh Yezsuz. 24Zwz Yezsuz naengzbaeq daeuj dih Yezhanq naeh, Yezhanq haeuz koanx dwk dij goanz Yixsowhleh, haxdoq daenh hoak loang yauq rux gaix, hoak diauq zauh soiq naeh. 25Zwz Yezhanq zaekgaj hoak nauq najgaengx dix naeh, dix hax: ‘Gaenqsu faeklaih gux zawh gawz mux? Gux mboq zawh Jizduz. Jizduz daeuj doaklaeng gux, gux daengz saeh dix hih sai'haiz naengz mboq paeq.’" 26Bauxloah daeuq hax: "Bihnongx aj, luglan Yaqboahlazhanq aj, sowh puj yowngh ndai ruxndeq mbu dij Sen naeh aj, sowh kauq hawj dij goanz ndaej jeuq naeh zawh leuz daeuj hawj raeuz. 27Gaj sowh dij goanz yuq ndaw Yezluqsaxlaengx ndowj naeh daj puj saeq paenqdix mboq ruxndeq Yezsuz zawh Jizduz. Paenqdix Vaenz Cednoiq rawz goj doag le bwnz sw puj zawxkauq dij Sen naeh, gaj paenqdix naengz mboq ruxndeq, naengz gajfa hax Yezsuz hoj tai. Paenqdix hax Yezsuz hoj tai, paenqdix zoq hawj sowh kauq puj zawxkauq dij Sen hax naeh baenzzaeh. 28Paenqdix cha mboq taen saek yowngh hoj hawj Yezsuz tai, gaj paenqdix naengz vanz Bihlazdoz kaj dix. 29Sowh kauq ndaw Sw dij Sen mai hax dix rux zoah tai naeh baenzzaeh yaq, paenqdix zoq aeu dix daeq zaq maex daeuj, nyaengx bae ndaw mohbujreuh. 30Gaj dij Sen hawj dix tai yaq daeuq zaeu. 31Ndauj doaklaeng naeh, sowh puj daj dix daeq mbanj Zazliqliq mwz ndaw Yezluqsaxlaengx naeh ndaej taen dix. Paenqdix ndaej taen dix daeuq zaeu, paenqdix bae haxdoq dij goanz Yixsowhleh piu. 32Gannaeh gaenqpiu haxdoq su gaenq ux faengz taeuq, zoq zawh sowh gaenq dij Sen yinq puj jeq rownz piu naeh, 33dij Sen haeuz hawj yuq zoh zawjraeuz baenzzaeh, hawj Yezsuz tai yaq daeuq zaeu. Daj Sw Lownx zangz daih ngih hax naeh dungzlumj: ‘Mawz zawh lug zaiz gux, vaenz naeh gux rungj mawz.’ 34Hax taeng mbaed saeh dij Sen hawj Yezsuz tai yaq daeuq zaeu, zaeu daengznauq naeh, dix hoakzaqnaeh daj puj Yixsowhleh hax: ‘Gux aeu gaenq gux yinq hawj Daqvaeq, sowh gaenq sawrik, maengx ndaej naeh hawj su.’#13:34 Gaemz kauq naeh haeuz yuq Sw Yixsaiqyaq 55:3. 35Sw Lownx naengz miz zangz ux hax: ‘Mawz toj mboq rux hawj ndang dij goanz mawz goanz sawrik naeh naeuh.’#13:35 Gaemz kauq naeh haeuz yuq Sw Lownx 16:10. 36Daqvaeq daengz zohgoanz biak kauq dij Sen, doaklaeng tai yaq, mwz daj puj jeq rownz dix zaemh yuq, nowx dix goj naeuh. 37Mizgaj goanz dij Sen hawj daeuq zaeu naeh mboq taen nowx dix naeuh. 38Baenzzaqnaeh bihnongx aj, gaenqsu hoj ruxndeq: Mizgaj maengx Jizduz, gaenq hoakloang su zux ndaej yangq. 39Mboq miz gawz maengx biak fahlih Moahciz rux hawj hoakri byenqbaenz sowh goanz gaemz hax mboq miz naeh baenz, mizgaj maengx Jizduz zux ndaej hoak sowh goanz gaemz hax mboq miz naeh baenz. 40Baenzzaqnaeh gaenqsu yauq caqsiq hem, yaj sowh kauq puj zawxkauq dij Sen hax naeh yuq ndaw ndang su baenzzaeh. 41Pujzawxkauq dij Sen ndaej hoakzaqnaeh hax:
"‘Sowh puj lezmboqqix dij Sen naeh aj,
gaenqsu caqsiq jem, gaenqsu toj sawz taeuq mboqyaq, gaenqsu toj lown.
Unj jeh su naeh, gux hoak mbaed saeh ux, daengz miz dij goanz haxdoq su, su goj mboq sinq.’"#13:41 Suq kauq naeh haeuz yuq Sw Hazbazguh 1:5.
42Gau Bauxloah daj Baznahbaz ni rownzndawcowq naeh, dij goanz rownzndawcowq vanz doiqdix Vaenz Cednoiq mawq daeuq maz koanx kauqfaengz dij Sen hawj paenqdix biak. 43Dungzbyaeg rownzndawcowq yaq, miz puj Yaeuhtaiq lai taeuq daj sowh puj yowngh ndai sinq Yaeuhtaiq zauq naeh sowh puj nowngz dij Sen haen laez haen lih naeh nowngzlaeng Bauxloah daj Baznahbaz. Doiqdix daj paenqdix laemh kauq, saengq paenqdix yauq caqsiq yuq dawj sowh gaenq dij Sen yumq doiq dij goanz ndae naeh mwznaj. 44Daeuq taeng Vaenz Cednoiq naeh, damz daengz chaenh dij goanz maz rownzndawcowq nauq, biak paenqdix koanx kauqfaengz dij Sen. 45Puj Yaeuhtaiq leztaen miz dij goanz lai baenzzaqnaeh maz zaemh yuq, ta'ndaem doiqdix taeuq. Paenqdix hoakrawz gojmbaeuq, dix kauq Bauxloah, moakndai Bauxloah. 46Bauxloah daj Baznahbaz ngoah taeuq, paenqdix hax: "Kauqfaengz dij Sen mbaednduq hoj koanx dwk puj Yaeuhtaiq daekgoanq, gaj su mboq zaemz, haeggaj aeu hoakri hoak sowh puj mboq paeq ndaej aen mingh daengznauq naeh. Baenzzaqnaeh mbaenqnaeh gaenqpiu aeu kauqfaengz dij Sen bae koanx dwk puj yowngh ndai yah. 47Daengz Zaeuj goj haeggaj ndaej hoakzaqnaeh nemz piu: ‘Gux haeuz lowg mawz, hawj mawz hoak aen daeng lingz puj yowngh ndai, hawj mawz bae koanxdwk paenqdix hoakrawz ndaej jeuq, koanx bae daengz dawj fax nauq.’#13:47 Gaemz kauq naeh haeuz yuq Sw Yixsaiqyaq 49:6."
48Puj yowngh ndai ruxnyinz gaemz naeh zoq faengz taeuq, zaemz kauq Zaeuj. Nanghgaj sowh puj dij Sen lowg zoah hawj ndaej aen mingh daengznauq naeh, daengzle sinq Zaeuj nauq. 49Yaq kauq Zaeuj zoq leuz mbanj naeh nauq. 50Gaj puj Yaeuhtaiq coak sowh puj yuq chaenh naeh sowh puj miz najta naeh, daj coak sowh mehrownz baenzsaq nowngz dij Sen haen laez haen lih naeh, coak paenqdix hwnq Bauxloah. Paenqdix coak daenh bih Bauxloah daj Baznahbaz, daem paenqdix ni mbanj paenqdix. 51Doiqdix yuq doqnaj daengzle chaeuq mowdmoanz ndaw din paenqdix ni, zoq mwz Yixgoznenj. 52Cohsaenz Yezsuz ndaw zaw faengz taeuq, miz Minghkoan dij Sen dumh daengz ndang paenqdix.
© 2023, Peace Publishing Co. All rights reserved.