Yuuẖanna 18
18
Mutha gwa Yasuuⓐ
1Dina ma Yasuuⓐ abiŋi dhuŋuna ibidhe, alela calmiz jai juŋun almure gi dhibirtha dhina dhan Gidruun, dhina dhijina jinena, annuni ganu calmiz jai juŋun. 2A Yahuudha ko, gwina gwugejina, ŋwuliŋa kaloŋa; ŋinena athin Yasuuⓐ ela calmiz jai juŋun. 3Dina ma Yahuudha odha ejigur a jadham ja leleny la gusus a Farriisiyiin, alela mine ŋwamba ŋwai a iga yai a ŋidi ŋai ŋa ŋoŋor. 4A Yasuuⓐ liŋa dhuŋuna peth dhina dhiladha dugun, ŋwutuya por, ŋwulaici, Nyaŋa libupo eiuŋw? 5Alaicinu, Yasuuⓐ gwa Naas̱ira. Al Yasuuⓐ aicinu, Nyi gwiro. A Yahuudha ko, gwina gwugejina, gwidhunadhi lai. 6A dina muŋwulaici, Nyi gwiro, alaura duro dai, alupidhini kwiyaŋ. 7Ŋwulothaije galo manaŋ, ŋwulaici, Nyaŋa libupo eiuŋw? Alaicinu, Yasuuⓐ gwa Naas̱ira. 8Al Yasuuⓐ aicinu, Nyi gwimajabiŋaijo, ŋajaici, Nyi gwiro. Ada nyaŋa liminyibupe, abricul lijo ibile alela dhai dhegen. 9A dhuŋun dhaiuthi je ganu dhina dhabiŋuŋw, Gi liji lina lidhedhinyilo gwati gwiminyidhudhiye gwetipo no. 10A Simⓐaan Buṯrus uthi kalala, ŋwuwal, ŋwugimiri gadham ga kweleny gwa gusus, ŋwura kuni galo ga dhoi dhina dhiro dhiŋir. A jiriny ja gadham jan Malkhus. 11Abi Yasuuⓐ abiŋaijo Buṯrusuŋw, ŋwaici, Wurejo kalala kuli; finjaan gwina gwiminy Babo gwiny dhedha, gwati gwinyiye na? 12A ejigur a komandaan a jadham ja Yahuud mutha Yasuuⓐuŋw, alliguke. 13Alodhadha kwereny di H̱annaan, ŋinena ruŋw gwunen gwa Gayaafa, gwina gwiro kweleny gwa gusus gidhila ibige. 14A Gayaafa gwiro gwina gwimurejo Yahuud juriya ganu, ŋwarnu, Aram kwiji gweta gwaieijo lijo peth.
Buṯrus gwidoinyo Yasuuⓐuŋw
15A Simⓐaan Buṯrus a thilmiz dhiter dheta gwujani Yasuuⓐuŋw; a kweleny gwa gusus liŋa thilmiz ibidhe, aluni Yasuuⓐ ŋalai gi hosh ya dunu gwa kweleny gwa gusus. 16Abi Buṯrus dhuna kour por. A thilmiz dhiter tuya dhina dhiliŋidhi kweleny gwa gusus, ŋwabiŋaijo gwina gwethadho our, ŋwunija Buṯrusuŋw. 17A ŋera ŋina ŋethadho our ŋwabiŋaijo Buṯrusuŋw, ŋwaici, Ŋa ko gwati gwiro thilmiz dheta dha kwiji ibigwa na? Ŋwarnu, Nyi gwutu no. 18A jine a jadham jidhunadhi mine, alije dimuje iga ŋwura ŋwai ŋwa dure; ŋinena jilo karun; aldhuna Buṯrus ŋalai, alenaije. 19A kweleny gwa gusus othaije Yasuuⓐuŋw galo calmiz jai juŋun taⓐliim dhai dhuŋun ko. 20A Yasuuⓐ aicinu, Nyi gwathabiŋi dhuŋuna galo ditir gi liji la gidhila; athiny alimiye gi majmaⓐ gigina, nyalimiye gi hekal kalo gina gathin Yahuud ela gigina, athinyabiŋu dhuŋuna dheda girimu no. 21Kworaŋ nyibi othaije galo? Othaijilo galo lina liminyi diŋini aŋ gwabiŋaijinyilo; aŋadhilo, lo liliŋidhi dhuŋuna dhina dhiminyi abiŋi. 22Dina muŋwabiŋi minoŋ, a gadham geta gina gidhunudhi ŋwumiri Yasuuⓐuŋw kirke gai, ŋwaici, Kworaŋ ŋa babiŋaijo kwelenya gwa gusus minoŋ? 23A Yasuuⓐ aicinu, Ada nyi gwimabiŋi dhuŋuna dheta dhike, aŋajiny dhina dhike; abi ada dhimiŋir, nyibi mireje aŋa? 24A H̱annaan ukeje Yasuuⓐuŋw gwigukinu di Gayaafa gwina gwiro kweleny gwa gusus. 25A Simⓐaan Buṯrus je didhuna ŋwenaije, alabiŋaijo, alaici, Ŋa ko gwati gwiro gweta gwa calmiz juŋun na? Ŋwubi ŋiŋirini, ŋwarnu, Nyi gwutu no. 26A gine geta ga kweleny gwa gusus, gina giro geta ga kwijiŋa gwina gwurudhi Buṯrus kuni galo, ŋwaici, Nyi gwati gwaŋadhaŋa gi jinena ganu ŋeda gwai na? 27A Buṯrus ubirini manaŋ; an lugugure ora ganu.
Yasuuⓐ gwijo gi je ganu ja Biilaaṯus, gwina gwiro mudiir gwa Ruumiya
28Alodha Yasuuⓐuŋw di Gayaafa, algwela Daar al Waaliya; a kalo giro ro bigunu; a liji lina ludhi Yasuuⓐuŋw, athil ludhi Daar al Waaliya no, lati lara laro ŋirle no, albari leny Ŋidwa ŋa dh’Abrico. 29A Biilaaṯus tuya degen, ŋwulaici, Nyaŋa ludhudhi kwijo ibigwa kaŋ? 30Alabiŋaijo, alaici, Ada gwati gwirii kwiji gwike no, gwati gwanai odhadha duguŋa no. 31Al Biilaaṯus aicinu, Apul, nyakimiye gi dhuŋun dha naamuus gwalo. A Yahuud aicinu, Gwati gwiŋir gi dhuŋun dhuri dana rinya kwijo no. 32Di dhuŋun meadhe dhina dhar dhai Yasuuⓐ gi dhuŋun dha dhai gwuŋun akwai gwaji gwai. 33A Biilaaṯus uni Daar al Waaliya manaŋ, ŋwurnie Yasuuⓐuŋw, ŋwaici, Ŋa gwiro Malik gwa Yahuud a? 34A Yasuuⓐ aicinu, Ŋa gwabiŋu dhuŋuna ibidha gwiren a? i liji liter labiŋaijaŋa nyi gwai. 35A Biilaaṯus aicinu, Nyi gwiro Yahuudi a? Liji luŋa a leleny la gusus ludhadhaŋa diginy aŋ gwapaŋa? 36A Yasuuⓐ aicinu, Ŋeleny ŋiny ŋati ŋa gidhila ibiga no; ada ŋeleny ŋiny ŋirii ŋa gidhila ibiga, a jadham jiny jinyii upijo ŋoŋora, a nyi gwati gwai udhudhini gi Yahuud; ŋinena athi ŋeleny ŋiny rui ŋa mina no. 37A Biilaaṯus abiŋaijo, ŋwaici, Ŋa gwiro malik a? A Yasuuⓐ aicinu, Ŋa gwabiŋu darnu nyi gwiro malik. Gi dhuŋun ibidha nyi gwiliŋinu, a gi dhuŋun ibidha nyiladha kidhila, nyiro shaahid gi dhuŋun dhina dhiro titiganu. Peth lina luminyu dhuŋuna dhina dhiro titiganu lathidiŋini gwula gwiny. 38A Biilaaṯus aicinu, Aŋ bigwiro dhuŋun dhina dhiro titiganu? Dina muŋwabiŋi dhuŋuna ibidha, ŋwutuya gi Yahuud manaŋ, ŋwulaicinu, Nyi gwati gwibujo dhuŋuna dhetipo dhike dugun no. 39Nyaŋa luthi dhuŋuna dheta dhina dhathanya apai jidhileo peth, dhathajil gududhijo kwijo gweta galo gi lamun la Ŋidwa ŋa dh’Abrico. Nyaŋa lara nyi gwajigudejo Malik galo gwa Yahuud a? 40Aluruni gwula manaŋ peth, alarnu, Kwiji ibigwa gwutu no, abi Baaraabaas. A Baaraabaas gwiro gweta gwina gwiro gwijigwor.
First published by the British and Foreign Bible Society in 1966.