लुका 19
19
तीरो दुत्पे जखायस्
1येसु यरीहो सहर्से तज्यीम् स्येःटीब मुबल। 2हुजुरी जखायस् पङ्बे बरु म्ही गी मुबल। थे तीरो दुत्पलमाकी हाकीम् मुबल। 3थेचे येसु खल टीम् बी च्याब म्हइज्यी। तर य्हक्को म्हीमा मुबल तज्यीम् थेचे येसुत म्रङ्अखम्। तलेपङ्सम् थे मच्च म्ही मुबल। 4होत्तज्यीम् थे ङोन्-ङोन् छ्योङ् य्हर्ज्यीम् येसुत च्याबरी ग्यम् रेइकी नेभारइ दोङ्बो जोरी क्रेत्ज्यी। तलेपङ्सम् येसु हुजु ग्यम् तज्यीम् स्येःब छ्येटीब मुबल। 5येसु हुजुरी दोखब बीसेम् दोङ्बो जोरी स्हीःज्यीम् जखायस्त सुङ्ज्यी, “जखायस्, ग्योन्-ग्योन् दुङ्री फप्यु, तलेपङ्सम् ङ तीङ्यी एइ दीम्री टीथोब मुब।” 6जखायस् ग्योन्-ग्योन् दुङ्री फप्युज्यी। ओसेम् तङ्-तङ्ज्यीम् येसुत थेइ दीम्री स्वागत् स्य्हेङ्ज्यी। 7चु म्रङ्बे जम्म म्हीमाचे, “चु म्ही पापीइ दीम्री डोम्बो तज्यीम् ङ्यीज्यी” बी पङ्ज्यीम् गन्गन् लब तीप्ज्यी। 8तर जखायस् प्रभुइ ङोन्री रप्ज्यीम् पङ्ज्यी, “सेन्जेतो प्रभु, देरेम् ङतेङ् मुबे सम्पत्तीमाकी डेत् प्रङ्नमात पीन्स्ये मुब। ओसेम् ङचे खल्त पङ्लेनो भ्यु पङ्ज्यीम् तेए कीन्बल मुसम् थेत बो ब्ली य्हक्को दोःपीन्स्ये मुब।” 9येसुचे थेत, “तीङ्यी चु दीम्री मुक्ती खबल मुब। तलेपङ्सम् चु म्हीएनो अब्रहाम्की ज य्हीन्ब बी सुङ्ज्यी। 10म्हीइ ज म्हबलमात म्हइबतेङ् थर्नलबरी युबल य्हीन्ब।”
म्हर्की टङइ अर्त
(मत्ती २५:१४-३०)
11य्हक्को म्हीमाचे चु तम्मा ङ्येन्टीब मुबल। हुजु बेलोरी येसु यरुस्लेम्की रेइरी दोःबल मुबल। येसुचे थेङ्यीमात अर्त गी सुङ्ज्यी। तलेपङ्सम् म्हीमाचे पर्मेस्वर्की य्हुल् म्रङ्नो म्रङ्य्हम्बल मुब बी म्हेन्ब मुबल। 12येसुचे सुङ्ज्यी, “ङ्हच्छ्यङ् म्ही गी राज्य स्य्हेङ्बे अधीकार् यङ्ज्यीम् दोःखल बी थारीङ्की य्हुल्री य्हर्ज्यी। 13य्हर्ब बीमम् ङोन्ग्यम् थेचे थेइ योक्पोमा च्यीत ङ्होत्ज्यी। ओसेम् म्हर्की टङ#१९:१३ म्हर्की टङ- चु म्हर्की टङ गी पङ्बलमी म्ही गीत ल सोम् स्यी दीन् च्यी म्हेल पीन्ब योःब। काकर् पीन्ज्यीम् पङ्ज्यी, ‘चु टङचे ङ दोःज्यीम् अख गदेसम्म छोङ् स्य्हेङो।’ 14तर थेइ य्हुल्की म्हीमाचेम् थेत सेम्री अङ्यीब मुबल। होत्तज्यीम् थेङ्यीमाचे चवमात थेइ लीक्क्यम् चोले पङ्ज्यीम् पीत्ज्यी, ‘चु म्ही ङ्यीमाइ ग्यल्बो तखइ बी अम्हेन्।’
15 “हुजु म्हीचे राज्य स्य्हेङ्बे अधीकार् यङ्ज्यीम् दोःखज्यी। थेचे थेइ टङमा पीन्थेन्बे योक्पोमात छोङ् स्य्हेङ्ज्यीम् टङ गदे छाज्यी बी ङ्योत्परी ङ्होत्ज्यी। 16ङोन्ग्यम् खबे योक्पोचे पङ्ज्यी, ‘मालीक्, एचे न्हङ्बे म्हर्की टङ गीचे छोङ् स्य्हेङ्ज्यीम् ङचे ल्हो-ल्हो म्हर्की टङ च्यी छाबल मुब।’ 17थेचे योक्पोत पङ्ज्यी, ‘स्याबास्! ए तबे योक्पो टीम्। ए ज्यीत तम्रीएनो बीस्वासीलो तज्यी। एचे सहर् च्यीरी सासन् स्य्हेङ्स्ये मुब।’ 18ओसेम् ल्हो-ल्हो योक्पोचे खज्यीम् पङ्ज्यी, ‘मालीक्, एचे न्हङ्बे म्हर्की टङ गीचे छोङ् स्य्हेङ्ज्यीम् ङचे ल्हो-ल्हो म्हर्की टङ ङ्ह छाबल मुब।’ 19थेचे योक्पोत पङ्ज्यी, ‘एचे सहर् ङ्हरी सासन् स्य्हेङ्स्ये मुब।’ 20ल्हो-ल्हो योक्पोचे खज्यीम् पङ्ज्यी, ‘मालीक्, एइ टङ चुरी मुब। ङचे येन्री जोर्ज्यीम् छुम्ज्यीम् थेन्बल मुबल। 21ङ एतेङ् लोङ्ज्यी, तलेपङ्सम् ए सेम् कोङ्बे म्ही य्हीन्ब। एचे र्हङ्चे ता अथेन्ज्यी हुजु कीन्ब। ओसेम् र्हङ्चे असुःबे ग्लारी बाली दुत्जेत्प।’ 22थेचे योक्पोत पङ्ज्यी, ‘ए अतबे योक्पो, ङ एत एइ तम् ग्यम्सेनो न्याय स्य्हेङ्स्ये मुब। ङ सेम् कोङ्बे म्ही य्हीन्ब, ङचे ता अथेन्ज्यी हुजु कीन्ब, ओसेम् ङचे असुःबे ग्लारी बाली दुत्प बी एचे म्हेन्ब। 23होलेपङ्सम् तले एचे ङइ टङ बेङ्री अथेन्बल? थेन्बल पङ्सम् दोःज्यीम् खबे बेलोरी ङइ टङ चोक्तेङ् छ्यम् यङ्स्ये मुबल।’ 24थेचे हुजुरी रप्टीबलमात पङ्ज्यी, ‘थेतेङ् मुबे टङएनो ब्येन्ज्यीम् टङ च्यी मुबलत पीनो।’ 25तर थेङ्यीमाचे पङ्ज्यी, ‘मालीक्, थेतेङ्मी ङोन्ग्यम्लनो टङ च्यी मुब।’ 26थेचे पङ्ज्यी, ‘ङ एङ्यीमात पङ्ब, खल्तेङ् मुज्यी, थेत ल्हो-ल्होएनो य्हक्को पीन्स्ये मुब। तर खल्तेङ् अरेज्यी थेतेङ् चेक् मुबलेएनो ब्येन्स्ये मुब। 27देरेम्, ङचे राज्य अस्य्हेङ्खइ म्हेन्बे ङइ सत्तुर्मात चुरी बज्यीम् ङइ ङ्होन्सङ्नो सेतो।’”
येसु यरुस्लेम्री स्येःजेत्पल
(मत्ती २१:१-११; मर्कुस् ११:१-११; युहन्न १२:१२-१९)
28येसुचे चु अर्त सुङ्ब बीसेम् थेङ्यीमाकी ङोन्-ङोन् यरुस्लेम्क्योर् स्येःजेत्ज्यी। 29ओसेम् थेङ् बेथफागेतेङ् बेथानीया नम्सइ रेइकी जैतुन् पङ्बे गङ्री दोखब बीसेम् थेङ्चे डब ङ्य्हीत चोले सुङ्ज्यीम् पीत्जेत्ज्यी, 30“एङ्य्हीकी खदुइ नम्सरी ङ्यीउ। एङ्य्हीचे हुजुरी देरेसम्म खलेएनो अक्रेत्पे य्हरु बुङ्गु गी चुङ्ज्यीम् थेन्बल खतु तस्ये मुब। हुजुत पीत्ज्यीम् चुरी बोउ। 31खल्चे पङ्लेनो एङ्य्हीत, ‘एङ्य्हीचे चु तले पीत्पल?’ बी ङ्योत्ज्यी पङ्सम्, ‘प्रभुत चु तोःबल मुब’ बी पङो।”
32होत्तज्यीम् थेङ्य्ही य्हर्मम् येसुचे सुङ्ब र्हङ्लेनो य्हरु बुङ्गु गी हुजुरी यङ्ज्यी। 33थेङ्य्हीचे य्हरु बुङ्गुत पीत्टीमम् बुङ्गुकी न्याबोचे थेङ्य्हीत पङ्ज्यी, “एङ्य्हीचे चुत तले पीत्टीबल?” 34थेङ्य्हीचे, “प्रभुत चु तोःबल मुब” बी पङ्ज्यी। 35ओसेम् थेङ्य्हीचे य्हरु बुङ्गुत येसुज बज्यी। य्हरु बुङ्गुइ गोरी थेङ्य्हीइ ग्या तीत्ज्यीम् हुजु जोरी येसुत स्य्हुपुङ्बरी र्हो लज्यी। 36येसु हुजुरी क्रेत्ज्यीम् स्येःटीमम् म्हीमाचे स्य्हेस स्य्हेङ्ज्यीम् र्हङ्की ग्यामा ग्यम्री तीत्पीन्ज्यी।#१९:३६ ग्यामा ग्यम्री तीत्पीन्ज्यी- यहुदीमाकी लागीरी ङ्हच्छ्यङ् म्ही थेङ्यीमाकी सहर्री खबतेङ् चोले स्य्हेङ्ब मुबल
37येसु यरुस्लेम्की रेइकी जैतुन् पङ्बे गङ्की क्रसु ग्यम्री दोखजेत्ज्यी। हुजु बेलोरी थेङ्की य्हक्को डबमाचे थेङ्चे स्य्हेङ्बे तेःङेन्की लक्मा व्हल् लज्यीम् तङ्-तङ्ज्यीम् केत् ङ्हच्छ्यङ् तेत्ज्यीम् पर्मेस्वर्त तोप्प तीप्ज्यी।
38“परम्प्रभुइ छेन्री ब्योन्खबे ग्यल्बोचे
मोलम् यङ्खइ,
स्वर्गरी सान्ती तखइ,
ओसेम् गोदोब्न्हङ्की जोइ पर्मेस्वर्की महीमा तखइ!#भजन्सङ्ग्रह ११८:२५-२६”
39तर य्हक्को म्हीमा न्हङ्चे डेत्-डेत् फरीसीमाचे येसुत, “लोप्पोन्, थेङ्की डबमात कुटीले टीउ बी सुङो” बी पङ्ज्यी। 40येसुचे, “ङ एङ्यीमात पङ्ब, थेङ्यीमा कुटी टीज्यी पङ्सम् युङ्बमा क्रीङ्स्ये मुब” बी सुङ्ज्यी।
यरुस्लेम्की लागीरी येसु क्रा:जेत्पल
41येसु यरुस्लेम् सहर्की रेइरी दोखजेत्मम् थेङ्चे सहर्त स्हीःज्यीम् क्राजेत्ज्यी। 42ओसेम् सुङ्ज्यी, “यरुस्लेम्की म्हीमा, सान्ती ताचे बब बी एङ्यीमाचे तीङ्यीकीनो स्येःबल य्हीन्लेनो तस्येल। तर देरेम् हुजु एङ्यीमा ग्यम्से छुम्बल मुब। 43चोतेबे बेलोएनो खस्ये मुब, एङ्यीमाइ सत्तुर्माचे एङ्यीमात खन बीबीचेनो र्होत्ज्यीम् दुङ्स्ये मुब। 44ओसेम् थेङ्यीमाचे एइ सहर्तेङ् एइ कउरुन्हङ् मुबे म्हीमात नास् लस्ये मुब। ओसेम् थेङ्यीमाचे युङ्ब गीएनो अस्हीनले थेन्स्ये अरे। तलेपङ्सम् पर्मेस्वर्चे एत थर्नलबरी ब्योन्युबे बेलो एचे अस्ये।”
येसु पर्मेस्वर्त तेन्बे दीम्री
(मत्ती २१:१२-१७; मर्कुस् ११:१५-१९; युहन्न २:१३-२२)
45हुजु लीप्चे येसु पर्मेस्वर्की दीम्री स्येःजेत्ज्यी। ओसेम् थेङ्चे पर्मेस्वर्त तेन्बे दीम्री छोङ् स्य्हेङ्टीबलमात ल्हब्जेत्ज्यी। 46ओसेम् थेङ्यीमात चोले सुङ्ज्यी, “धर्म छ्येःरी चोले ब्रीबल मुब, ‘ङइ दीम् प्रार्थना स्य्हेङ्बे दीम् तथोब।#यसैया ५६:७; यर्मीया ७:११’ तर एङ्यीमाचे य्होमा टीबे ग्ला स्य्हेङ्बल मुब।”
47ओसेम् येसुचे दीन्लनो पर्मेस्वर्त तेन्बे दीम्री लोप्जेत्ज्यी। तर ङ्हच्छ्यङ् लम्बुमा, धर्म लोप्पोन्मातेङ् म्हीमाकी अगुवामाचे थेङ्त सेत्प म्हइब मुबल। 48तर थेङ्यीमाचे थेङ्त सेत्परी मौक अयङ्। तलेपङ्सम् जम्म म्हीमाचे थेङ्की फ्रोइत सेम् य्हङ्सेनो ङ्येन्टीब मुबल।
© 2025 by Mother Tongue Translators Society, Nepal Bible Society
and Wycliffe Bible Translators, Inc.