পত্থম 11
11
বাবিলর অজল্ ঘর
1সেক্কে দিনোত্ গোদা সংসার মানুচ্চুনে বানা এক্কান ভাষালোই কধা কদাক্ আর তারার রঅগুনো এক্কুই এলঅ। 2পরেদি তারা পুগেদি উজেই যাদে যাদে শিনিয়র দেজত্ এক্কান্ সংজাগা পেইনে সিয়েনত্ বজত্তি গরা ধুরিলাক্। 3তারা একজন আরেকজনরে কলাক্, “যেই, আমি ইট বানেইনে আগুনোত্ পুড়িই।” ইয়েন কোইনে তারা পাত্তর বদলে ইট আর চিবিদি বদলে মাত্যেতেল্ বেবহার গরা ধুরিলাক্। 4তারা কলাক্, “এজঅ, আমি আমাত্তে এক্কান্ শঅর্ বানেই আর এন্ এক্কান অজল ঘর বানেবং যিয়েনর মাদাবো যেইনে আগাজত্ লুমিবো। সিয়েনত্ আমার সুনাঙ্অ অবঅ আর আমি গোদা পিত্থিমীগানত্অ ছিদি ন-পড়িবোং।”
5মানুচ্চুনে যে শঅরান আর অজল ঘরান বানেয়োন সিয়েন্ চেবাত্তে লগেপ্রভু লামি এলঅ। 6তে কোইয়্যেদে,“ইগুনে একই জাদর মানুচ্ আর ইগুনোর কধায়ো এক; সেনত্তে এ কামত্ তারা আত্ দুয়োন। নিজোর ফন্দিগান্ আজিল্ গুরিবাত্তে ইয়েন পরেদি তারা আর কনঅ মানা ন-মানিবাক্। 7সেনত্তে এজঅ, আমি তলে লামিনে তারা কধানিত্ যাগুলুক্ বাজেই দিই যেনে তারা একজন কধা আরেকজনে বুঝি ন-পারন।”
8সে পরেদি লগেপ্রভু সে জাগানত্তুন্ তারারে গোদা পিত্থিমীয়ানত্ ছিদি দিলো। সেক্কে তারার সে শঅর্ বানানার্ কামান থামেলাক্। 9ইয়েনত্তে সে জাগায়ানর নাঙান অলঅ বাবিল, মাত্তর্ সিয়োদোই লগেপ্রভু গোদা পিত্থিমীয়ানত্ কধা ভিদিরে যাগুলুক্ বাজেই দিলো। সিয়োত্তুন্ তে তারারে পিত্থিমীর বেক্ জাগায়ানিত্ ছিদি দিলো।
শেমর বংশর কধা
10ইয়েন অলঅ শেম বংশর কধা। পানি বান দ্বিবজর পরেদি যেক্কে শেমর বয়জ্ একশ বজর সেক্কে তার পুয়ো অর্ফক্ষদরে জর্ম অলঅ। 11অর্ফকষদর জর্মর পরেদি শেমে আরঅ পাচশ বজর বাঁজি এলঅ। এ ভিদিরে তার আর ঝি-পুয়ো ওইয়োন্।
12অর্ফক্ষদর পাত্রিশ বজর বয়জত্ তার পুয়ো শেলহর জর্ম অলঅ। 13শেলহর জর্মর পরেদি অর্ফক্ষদ আরঅ চের্শঅ তিন বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্।
14শেলহর ত্রিশ বজর বয়জত্ তার পুয়ো এবর জর্ম অলঅ। 15এবর জর্মর পরেদি শেলহ আরঅ চের্শ তিন বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্।
16এবর চৌত্রিশ বজর বয়জত্ তার পুয়ো পেলগ জর্ম অলঅ। 17পেলগ জর্মর পরেদি এবরে আর চের্শঅ ত্রিশ বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্।
18পেলগ ত্রিশ বজর বয়জত্ তার পুয়ো রিয়ূর জর্ম অলঅ। 19রিয়ূর জর্মর পরেদি পেলগে আর দ্বিশঅ নয় বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্। 20রিয়ূর বোত্রিশ বজর বয়জত্ তার পুয়ো সরূগোর জর্ম অলঅ। 21সরূগোর জর্মর পরেদি রিয়ূ আরঅ দ্বিশঅ সাত বজর বাঁজি এলঅ। এ ভিদিরে তার আর ঝি-পুয়ো ওইয়োন্।
22সরূগোর ত্রিশ বজর বয়জত্ তার পুয়ো নাহোর জর্ম অলঅ। 23নাহোর জর্মর পরেদি সরূগে আরঅ দ্বিশঅ বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্।
24নাহোর উনত্রিশ বজর বয়জত্ তার পুয়ো তেরহ জর্ম অলঅ। 25তেরহ জর্মর পরেদি নাহোরে আরঅ একশ উনেশ বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্।
26তেরহ সত্তুর বজর বয়জ পরেদি তার পুয়ো অব্রাম, নাহোর আর হারণর জর্ম ওইয়্যে।
তেরহ বংশর কধা
27ইবে অলঅ তেরহ বংশর কধা। তেরহ পুয়োগুনোর্ নাঙানি অলঅ অব্রাম, নাহোর আর হারণ, আর হারণ পুয়োবোর নাঙান্ লোট। 28হারণে তার বাপ্পো বাঁজি থাগদে তার জর্ম ওইয়্যে জাগানত্ কল্দীয় দেজর ঊর শঅরত্ মুরি গেলঅ। 29অব্রাম আর নাহোর দ্বিজনে মোক্ লোইয়োন্। অব্রাম মোক্কো নাঙান্ এলঅ সারী আর নাহোর মোক্কো নাঙান্ এলদে মিল্কা। মিল্কা আর যিষ্কা অলঅ হারণ ঝি। 30সারী ভাজ্ এলঅ; তার কনঅ ঝি-পুয়ো ন-অন্।
31অব্রাম, লোট আর সারীরে নেযেইনে তেরহ কনান দেজত্ যেবাত্তে কল্দীয় দেজ ঊর শঅরত্তুন্ যাহ্ ধুরিলাক্। অব্রাম অলদে তেরহ পুয়ো, লোটে এলদে তেরহ নাদিন্, অত্তাৎ হারণর পুয়ো, আর সারী অলদে তেরহ পূদবো অব্রামর মোক্। পোইল্যাদি তারা হারণ নাঙে এক্কান শঅর্ সং গেলাক্ আর সিধু বজত্তি গরা ধুরিলাক্ । 32তেরহ দ্বিশঅ পাচ্ বজর বয়জত্ হারণ শঅরত্ মুরি গেলঅ।
Copyright © 2021 Bangladesh Bible Society