MATTHAI 9
9
Jesuh Nih Mizengpa A Damter
(Mar 2.1-12; Luk 5.17-26)
1Jesuh cu lawng chungah khan a lut i rili cung cun an kir ṭhan i amah a khua kha a phan. 2A sinah khan mizengpa pakhat kha, a ihkhun in an rak zawnh. Jesuh nih an zumhnak kha a hmuh tikah mizeng pa cu, “Ka fapa, na lung dong hlah! Na sualnak cu ngaihthiam na si cang,” tiah a ti.
3Cu tikah Phungbia cawnpiaktu saya a cheukhat nih khan, “Hi pa hi Pathian serhsat in bia a chim,” an ti. 4Jesuh nih an ruahmi kha a hngalh i, “Zeicahdah cu bantuk thil ṭhalo cu nan ruah? 5‘Na sualnak cu ngaihthiam na si cang,’ ti cu maw a fawi deuh, ‘Tho law kal tuah,’ ti dah a fawi deuh? 6Mi Fapa nih vawlei cungah hin sual ngaihthiam khawhnak a ngei ti kha kan hngalhter hna lai,” a ti i cucaah mizengpa cu, “Tho law, na ihkhun kha i put law inn ah va ṭin,” tiah a ti.
7Mipa cu a tho i inn ah cun a ṭin. 8Cucu mi nih khan an hmuh tikah an thin a phang i cu bantuk nawlngeihnak cu Pathian nih minung kha a pek hna caah Pathian cu an thangṭhat.
Jesuh Nih Matthai A Kawh
(Mar 2.13-17; Luk 5.27-32)
9Cuka hmun cun Jesuh cu a chuak i a kalpah ah khan ngunkhuai khawltu Matthai a zung i a rak ṭhut ko kha a hmuh. Amah cu, “Ka zul,” tiah a ti. Matthai cu a tho i a zulh.
10Jesuh cu Matthai inn i zanriah an ei lioah khan ngunkhuai khawltu tampi hna le misual mi hna nih khan amah le a zultu hna cu zanriah an dumpi hna. 11Mah cucu Farasi mi nih khan an hmuh hna i cucaah a zultu cu an thawh hna i, “Zeicahdah nan sayapa hi ngunkhuai khawltu hna le misual hna he rawl an ei ṭi?” tiah an ti. #Luk 15.1-2
12Jesuh nih cun a theih hna i, “A dammi nih cun sibawi an herh lo, a zawmi lawng nih khan an herh. 13Va kal u law, ‘Saram thawinak si loin ka duhmi cu zaangfahnak lungthin kha a si,’ tiah Cathiang chungah aa ṭialmi hi a sullam va ruat tuah u. Miding mi pawl kawh awkah ka rat ṭung lo, misual mi hna kawh awkah pei ka rat ko cu,” tiah a ti. #Mat 12.7; Hos 6.6
Rawl Ulhnak Kong
(Mar 2.18-22; Luk 5.33-39)
14Khi hnuah Tipil petu Johan zultu pawl kha Jesuh sinah cun an ra i, “Zeicahdah kannih le Farasi mi hna cu atu le atu rawl kan ul i nang na zultu hna cu an ulh kun lo,” tiah an hal.
15Jesuh nih cun, “Nupi ṭhit rawl danghnak puai ah, nupi ṭhitu a um chungah cun zeitindah an sawmmi hna cu ngaihchia in an um lai? Sihmanhsehlaw nupi ṭhitu an sinin aa ṭhen caan kha a phan ve te lai i cu tikah cun rawl cu an ul te ko lai.
16“Ahohmanh nih angki hnawh cia kha ti khat hmanh a tla rih lomi thil thar in an belh bal lo, zeicahtiah cu ti i an belh ahcun an belhnak puan nih khan a thleh chin lai i a awng kha a kau chin lai. 17Cun a hlunmi saphawcua chungah mitsur hang thar an rawn bal lo, cu ti an tuah ahcun a saphaw kha a kek lai i a mitsur hang kha a chuak dih lai i a saphaw kha a rawk lai. Cucaah mitsur hang thar cu saphawcua a tharmi chung tu ah an rawn tawn i cuticun an pahnih in ṭha tein an um,” tiah a ti.
Bawi Pakhat Fanu le Jesuh Kong
(Mar 5.21-43; Luk 8.40-56)
18Cu bia cu Jesuh nih a chimh lio hna ah khan, Judah mi lak i bawi pakhat a simi kha a sinah a ra i a hmaiah a khuk aa bil i, “Tunaite ah khan ka fanu a thi, sihmanhsehlaw ra law a cungah na kut ra chia law a nung ko lai,” tiah a ti. 19Cucaah Jesuh cu a tho i amah cu a zulh i a zultu hna zong kha a sinah cun an kal ve.
20Cu lioah cun, nu pakhat, thi chuah zawtnak in kum hleihnih tiang a zaw cangmi kha a hnulei in a ra i a puan parte kha a tongh. 21“A puan hmanh kha ka tongh khawh ahcun ka dam ko lai,” tiah a lungchung in a ti.
22Jesuh cu a hun i mer i minu cu a hmuh i, “Ka fanu, na thinphang hlah! Na ka zumhnak nih an damter cang,” tiah a ti. Cu caan te ah cun minu cu a dam colh.
23Cun Jesuh cu Judah mi bawi inn ah cun a lut. Mithi caah tingtang a tummi hna le a awn au mi kha a hmuh hna tikah, 24“Nan dihlak in chuak tuah u! Ngakchia nute hi a thih ṭung lo, aa hngilh i pei a si ko cu,” tiah a ti hna.
Annih nih an nihsawh, 25Mi kha an chuah dih cangka in Jesuh cu ngakchianu khaan chungah khan a vung lut i a kut in a vun tlaih i a tho. 26Cu thawng cu cuka hrawng ram vialte ah cun a thang dih.
Jesuh Nih Mitcaw Pahnih A Damter Hna
27Cuka hmun cun Jesuh cu a chuak i a kalpah ah khan mitcaw pahnih nih an zulh. “David Fapa kan zaangfah tuah,” tiah an au.
28Jesuh cu inn chung i a luh tikah khan mitcaw pahnih hna cu a sinah cun an ra i annih cu, “Hihi ka tuah khawh tiah nan zum maw?” tiah a rak hal hna. Annih nih, “Asi, na tuah khawh tiah kan zumh bawipa,” tiah an leh.
29Cun Jesuh nih an mit kha a tongh hna i, “Nan zumhning te cun si ko seh,” tiah a ti i 30annih cu khua an hmu kho ṭhan. Annih cu Jesuh nih fak piin, “Hihi ahohmanh va chim hna hlah u,” tiah a ti hna. 31Sihmanhsehlaw an kal i Jesuh kong cu cuka hrawngah cun an thanh dih.
Jesuh Nih A Holh Kho Lomipa A Damter
32Mi kha an ṭian cuahmah lioah cun, khuachia nih a tuah ca i a holh kho lomipa pakhat kha Jesuh sinah cun an ratpi. 33A khuachia cu a chuah cangka in mipa cu a holh kho i mi vialte cu an khuaruah a har dih. “Hi bantuk thil hi Israel mi lakah kan hmu bal lo,” an ti. 34Sihmanhsehlaw Farasi mi hna nih cun, “Khuachia ṭhawl khawhnak nawl a petu hi khuachia bawi a si,” an ti. #Mat 10.25; 12.24; Mar 3.22; Luk 11.15
Mi Kha A Zaang An Fak
35Cuticun Jesuh cu khuapi he khuate he a tlawng duahmah hna. An pumhnak inn ah khan a cawnpiak hna i Vancung Pennak kong Thawngṭha kha a chimh hna i a zaw a fakmi kip kha a damter hna. 36Mi zapi kha a hmuh hna tikah, khaltu a ngei lomi tuu bantukin lungrethei le awlokchong in an um kha a hmuh hna caah a zaang an fak ngaingai. #Nam 27.17; 1Sia 22.17; 2Cha 18.16; Eze 34.5; Mar 6.34 37Cucaah a zultu kha a thawh hna i, “Rawl ṭuan awk cu tampi a um ko, sihmanhsehlaw a ṭuantu ding cu tlawmte lawnglawng an si. 38Cucaah rawlṭuan uktu bawi sinah cun, rawl ṭuantu tam deuh a thlah hna nakhnga, thla va cam tuah u,” a ti. #Luk 10.2
Lai (Hakha) Common Language Bible © Bible Society of Myanmar 2006