ግብረ ሐዋርያት 22
22
ምዕራፍ 22
ዘከመ ተናገረ ጳውሎስ ለሕዝብ
1 #
7፥2፤ 13፥27። ስምዑ አኀዊነ ወአበዊነ ዘእወቅሥ ለክሙ ይእዜ። 2#21፥40። ወሶበ ሰምዑ ከመ በዕብራይስጥ ይነግሮሙ ፈድፋደ አጽምዕዎ። 3#9፥1-22፤ 26፥9-18። ወይቤሎሙ ጳውሎስ አንሰ ብእሲ አይሁዳዊ አነ ወተወለድኩ በሀገረ ጠርሴስ ዘቂልቅያ ወልህቁ በዛቲ ሀገር በታሕተ እገሪሁ ለገማልያል ወተምህርኩ በሕገ አበውየ ወኮንኩ ቀናኤ ለእግዚአብሔር ከመ ኵልክሙ አንትሙ ዮም።
በእንተ ቀዳማይ ግብሩ ለጳውሎስ
4 #
8፥3። ወሰደድክዎሙ ወቀተልክዎሙ እንዘ እሞቅሖሙ ለዕደዊሆሙ ወለአንስቲያሆሙ። 5ወየአምሩ ሊቃነ ካህናት ወረበናት ኵሎሙ እለ ነሣእኩ እምኀቤሆሙ መጽሐፈ መባሕት ከመ እሑር ኀበ አኀው እለ በደማስቆ ከመ አምጽኦሙ ለእለ ሀለዉ ህየ ወአእትዎሙ ሙቁሓኒሆሙ ኢየሩሳሌም ይትኰነኑ።
በእንተ ጽዋዔሁ
6 #
9፥3-17፤ 1ቆሮ. 15፥8። ወእምዝ እንዘ አሐውር ደማስቆ አልጺቅየ ኀበ ሀገር ሶበ ይከውን ቀትረ ግብተ በረቀ መብረቅ ዐቢይ እምሰማይ ላዕሌየ። 7#26፥14-15። ወነጽሐኒ ውስተ ምድር ወሰማዕኩ ቃለ ዘይብለኒ ሳውል ሳውል ለምንት ትሰድደኒ። 8ወተሰጠውክዎ ወእቤሎ መኑ አንተ እግዚኦ ወይቤለኒ አነ ውእቱ ኢየሱስ ናዝራዊ ዘአንተ ትሰድደኒ። 9#9፥7። ወእለ ሀለዉ ምስሌየ ርእዩ መብረቆ ወደንገፁ ወቃለሰ ዘይትናገረኒ ኢሰምዑ። 10#9፥6። ወእቤ ምንተ እግብር እግዚእየ ወይቤለኒ ተንሥእ ወሑር ደማስቆ ወበህየ ይነግሩከ ዘሀለወከ ትግበር። 11ወእምዝ ተጸለልኩ አዕይንትየ እምግርማ መብረቅ ወአልቦ ዘእሬኢ ወእንዘ ይመርሑኒ እለ ምስሌየ በጻሕኩ ደማስቆ።
በእንተ ሐናንያ
12ወሀሎ አሐዱ ብእሲ ዘስሙ ሐናንያ ኄር ወፈራሄ እግዚአብሔር በሕግ ወይንእድዎ ኵሎሙ አይሁድ እለ ይነብሩ ደማስቆ። 13ወመጽአ ኀቤየ ወቆመ ቅድሜየ ወይቤለኒ ሳውል እኁየ ርኢ ወርኢኩ ሶቤሃ። 14#9፥15። ወይቤለኒ አምላከ አበዊነ ሤመከ ከመ ታእምር ፈቃዶ ወትርአዮ ለጻድቅ ወትስማዕ ቃሎ እምአፉሁ። 15ወትኵኖ ሰማዕቶ በኀበ ኵሉ ሕዝብ በዘርኢከ ወበዘሰማዕከ። 16ወይእዜኒ ዘከመ ትገብር እነግረከ ተንሥእ ወተጠመቅ ወተኀፀብ እምኀጣውኢከ ወጸውዕ ስሞ።
በእንተ ግብአቱ ኢየሩሳሌም
17 #
9፥26። ወእምዝ ገቢእየ ኢየሩሳሌም እንዘ እጼሊ ሌሊተ በቤተ መቅደስ ደንገጽኩ። 18ወርኢክዎ እንዘ ይብለኒ ፃእ ፍጡነ እምኢየሩሳሌም እስመ ኢይትዌከፉ ስምዐ ዚኣከ በእንቲኣየ። 19ወእቤ አነ እወ እግዚኦ ለሊሆሙ የአምሩ ከመ አነ ዘእሞቅሖሙ ወእቀሥፎሙ ለእለ የአምኑ ብከ በምኵራባቲሆሙ። 20#7፥57-60። ወአመሂ ቀተልዎ ለእስጢፋኖስ ሰማዕትከ ሀሎኩ ምስሌሆሙ ህየ ኅቡረ ወአዐቅብ አልባሲሆሙ ለእለ ቀተልዎ። 21#9፥15፤ 13፥2። ወይቤለኒ ሑር እስመ እፌንወከ ኀበ አሕዛብ እለ ርኁቃን ትስብክ ወሰማዕክዎ ከመዝ ይቤለኒ።#ቦ ዘኢይጽሕፍ «ትስብክ፤ ወሰማዕክዎ ከመዝ ይቤለኒ» 22#21፥36። ወሶበ ሰምዑ ዘንተ ነገረ እምጳውሎስ ከልሑ በዐቢይ ቃል ወይቤሉ አእትቶ ለዘከመዝ እምብሔርነ እስመ ኢይደልዎ ይሕየው። 23ወእንዘ ይጠርዑ ወይዌርዉ አልባሲሆሙ ወይዘርዉ ጸበለ ውስተ ነፋስ።
በእንተ ተኰንኖቱ
24ወአዘዘ መልአክ ያብእዎ ውስተ ምኵናን ወይቅሥፍዎ ወይሕትትዎ ጌጋዮ ከመ ያእምር በእንተ ምንት የዐወይዉ ላዕሌሁ። 25#16፥37፤ 22፥27። ወሶበ ሰሐብዎ በእገሪሁ ማእከለ እለ ይቀሥፍዎ ይቤሎ ጳውሎስ ለሐቢ ዘይቀውም ኀቤሁ ይከውነክሙሁ ትቅሥፉ ሰብአ ሮሜ ዘእንበለ አበሳ። 26ወሰሚዖ ሐቢ ሖረ ኀበ መልአክ ወነገሮ ወይቤሎ አእምር ዘትገብር ዝኩ ብእሲ ሰብአ ሮሜ ውእቱ።
በእንተ ተስእሎተ መልአክ
27ወቀርበ ኀቤሁ መልአክ ወይቤሎ ንግረኒ እስኩ ሰብአ ሮሜኑ አንተ ወይቤ እወ። 28ወተሰጥዎ መልአክ ወይቤሎ አንሰኬ ብዙኀ ንዋየ ውሂብየ ረከብክዋ ለዛቲ ሢመት ወይቤሎ ጳውሎስ አንሰኬ በህየ ተወለድኩ። 29ወእምዝ ኀደግዎ እለ ይፈቅዱ ይቅሥፍዎ ወመልአክኒ ፈርሀ አእሚሮ ከመ ሰብአ ሮሜ ውእቱ። 30ወበሳኒታ ፈቀደ መልአክ ያእምር ጥዩቀ በእንተ ምንት ያስተዋድይዎ አይሁድ ወፈትሐ ማእሰሮ ወአዘዘ ይምጽኡ ሊቃነ ካህናት ወኵሉ ዐውድ ወአምጽኦ ለጳውሎስ ወአቀሞ ማእከሎሙ።