ኀበ ሰብአ ቆሮንቶስ 1 10
10
ምዕራፍ 10
በእንተ ዜና አበው
1 #
ዘፀ. 13፥21፤ 14፥22። ወእፈቅድ ለክሙ ታእምሩ አኀዊነ እስመ ለኵሎሙ አበዊነ ጸለሎሙ ደመና ወኵሎሙ ኀለፉ ማእከለ ባሕር። 2ወለኵሎሙ አጥመቆሙ ሙሴ በደመና ወበባሕር። 3#ዘፀ. 16፥15-35። ወኵሎሙ ተሴሰዩ እክለ ዘመንፈስ ቅዱስ። 4#ዘፀ. 17፥6። ወኵሎሙ ሰትዩ ስቴ መንፈሳዌ ዘውእቱ ዘሰትዩ እምኰኵሕ መንፈሳዊት እንተ ተሐውር ድኅሬሆሙ ወኰኵሕሰ ክርስቶስ ውእቱ። 5#ዮሐ. 6፥49። ወአኮ ለኵሎሙ ዘኀረዮሙ እግዚአብሔር ወመብዝኅቶሙ ተነጽሑ በገዳም። 6#ዘኍ. 11፥4፤ 33፥34። ወዝኒ ዘረከቦሙ ከመ ይኩኑክሙ እሙንቱ አርኣያ ከመ አንትሙኒ ኢትፍትዉ እኩየ ከመ ፈተዉ እሙንቱ። 7#ዘፀ. 32፥6። ወኢታምልኩ ጣዖተ በከመ አምለኩ እሙንቱ በከመ ይቤ መጽሐፍ «ነበሩ ሕዝብ ይበልዑ ወይሰትዩ ወተንሥኡ ይዝፍኑ።» 8#ዘኍ. 25፥1-10። ወኢትዘምዉ ይቤልዎሙ ወቦ እለ ዘመዉ እምውስቴቶሙ ወሞቱ በአሐቲ ዕለት ክልኤ እልፍ ወዕሥራ ምእት። 9#ዘኍ. 21፥5-6። ወኢታመክርዎ ለእግዚአብሔር ይቤልዎሙ ወአመከርዎ ወአጥፍኦሙ አርዌ ምድር። 10#ዘኍ. 14፥2፤36-37፤ 16፥41-50። ወኢታንጐርጕሩ ይቤልዎሙ «ወአንጐርጐሩ ወአኅለቆሙ ብድብድ።» 11#ሮሜ 15፥4። ዝንቱ ኵሉ ዘረከቦሙ ለእልክቱ ምሳሌ ተጽሕፈ ለአእምሮ ወለተግሣጸ ዚኣነ እለ በደኃሪ መዋዕል። 12#ሮሜ 11፥20። ወይእዜኒ ዝኩ ዘይትአመን ርእሶ ከመ ይቀውም ውእቱ ለይትዐቀብ ከመ ኢይደቅ። 13ወመንሱትሰ ኢይረክበክሙ ዘእንበለ እምሰብእ ዳእሙ እኩት እግዚአብሔር ዘኢኀደገክሙ ትትመንሰዉ ዘእንበለ ዳእሙ በዘትክሉ ጸዊረ ወተዐግሦ ወይረድአክሙ በመከራ ከመ ትፃኡ እመንሱት።
በእንተ ርኂቅ እምአማልክት
14 #
1ዮሐ. 5፥21። ወይእዜኒ አኀዊነ ጕዩ እምአማልክት። 15ወፍትሑ ከመ ጠቢባን በዘይረትዕ እብለክሙ። 16#ግብረ ሐዋ. 2፥46። ዝንቱ ጽዋዐ በረከት ዘንባርክ አኮኑ ሱታፌ ደሙ ለክርስቶስ ውእቱ ወዝኒ ኅብስት ዘንፌትት አኮኑ ሱታፌ ሥጋሁ ለክርስቶስ ውእቱ። 17#ሮሜ 12፥5። ወበከመ አሐዱ ኅብስት ከማሁ አሐዱ ሥጋ ንሕነ እንዘ ብዙኃን እስመ ኵልነ እምአሐዱ ኅብስት ንነሥእ። 18#ዘሌ. 7፥6-16። ርእይዎሙ ለእስራኤል ዘሥጋ ይበልዑ መሥዋዕተ ወይከውኑ ሱቱፋኒሁ ለምሥዋዕ። 19ወምንተ እንከ ንብል ዘሂ ይዘብሑ ለአማልክት ከንቱ ወአማልክቲሆሙኒ ከንቱ። 20#ዘሌ. 17፥7፤ ዘዳ. 32፥17፤ መዝ. 105፥37፤ ራእ. 9፥20። ወአሕዛብኒ ዘይዘብሑ ለአጋንንት ወአኮ ለእግዚአብሔር ወባሕቱ ኢይፈቅድ ለክሙ ትኩኑ ሱቱፋነ አጋንንት። 21#2ቆሮ. 6፥15። ወኢትክሉ ሰቲየ ጽዋዐ እግዚአብሔር ወጽዋዐ አጋንንት ወኢትክሉ በሊዐ ማእደ እግዚአብሔር ወማእደ አጋንንት። 22ናቅንኦኑ እንከ ለእግዚአብሔር ቦኑ ንጸንዕ እምኔሁ። 23#6፥12። ወኵሉ ይከውነኒ ወኵሉሰ አኮ ርቱዕ ወኵሉ ብውሕ ሊተ ወባሕቱ አኮ ኵሉ ዘየሐንጽ። 24#ሮሜ 15፥12። ኢታድልዉ ለርእስክሙ ዘእንበለ ለቢጽክሙ። 25#1ጢሞ. 4፥4። ወዓዲ ኵሎ ዘይሠይጡ በምሥያጥ ብልዑ ወኢትሕትቱ። 26#መዝ. 23፥1። እስመ ለእግዚአብሔር ምድር በምልኣ። 27ወለእመ ቦ ዘጸውዐክሙ ዘኢየአምን ወፈቀድክሙ ትሑሩ ኵሎ ዘአቅረቡ ለክሙ ብልዑ ወኢትሕትቱ። 28#8፥7። ወእመሰ ቦ ዘይቤለክሙ እስመ ዝንቱ ዝቡሕ ለአማልክት ኢትብልዑ እንከ በእንተ ዘይቤለክሙ ወበእንተ ትሕዝብተ ቢጽክሙ። 29እስመ ቀጸቡክሙ ከመ ኢይግአዝዋ ለግዕዛንክሙ። 30#1ጢሞ. 4፥4። ወእመሰ በአእኵቶ እበልዕ ለምንት ይፀርፉ ላዕሌየ። 31#ቈላ. 3፥7። ወእመኒ በላዕክሙ ወእመኒ ሰተይክሙ ወኵሎ ዘገበርክሙ በአኰቴተ እግዚአብሔር ግበሩ። 32ወኩንዎሙ አርኣያ ዘእንበለ ዕቅፍት ለአይሁድ ወለአረሚ ወለሕዝበ እግዚአብሔር።#ቦ ዘይቤ «ወለቤተ ክርስቲያኑ ለእግዚአብሔር» 33በከመ በኵሉ አደሉ አነ እስመ ተድላ ብዙኃን አኀሥሥ በዘየሐይዉ ወአኮ ተድላ ርእስየ ዘአኀሥሥ።
