Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወእፈቅድ ለክሙ ታእምሩ አኀዊነ እስመ ለኵሎሙ አበዊነ ጸለሎሙ ደመና ወኵሎሙ ኀለፉ ማእከለ ባሕር። ወለኵሎሙ አጥመቆሙ ሙሴ በደመና ወበባሕር። ወኵሎሙ ተሴሰዩ እክለ ዘመንፈስ ቅዱስ። ወኵሎሙ ሰትዩ ስቴ መንፈሳዌ ዘውእቱ ዘሰትዩ እምኰኵሕ መንፈሳዊት እንተ ተሐውር ድኅሬሆሙ ወኰኵሕሰ ክርስቶስ ውእቱ። ወአኮ ለኵሎሙ ዘኀረዮሙ እግዚአብሔር ወመብዝኅቶሙ ተነጽሑ በገዳም። ወዝኒ ዘረከቦሙ ከመ ይኩኑክሙ እሙንቱ አርኣያ ከመ አንትሙኒ ኢትፍትዉ እኩየ ከመ ፈተዉ እሙንቱ። ወኢታምልኩ ጣዖተ በከመ አምለኩ እሙንቱ በከመ ይቤ መጽሐፍ «ነበሩ ሕዝብ ይበልዑ ወይሰትዩ ወተንሥኡ ይዝፍኑ።» ወኢትዘምዉ ይቤልዎሙ ወቦ እለ ዘመዉ እምውስቴቶሙ ወሞቱ በአሐቲ ዕለት ክልኤ እልፍ ወዕሥራ ምእት። ወኢታመክርዎ ለእግዚአብሔር ይቤልዎሙ ወአመከርዎ ወአጥፍኦሙ አርዌ ምድር። ወኢታንጐርጕሩ ይቤልዎሙ «ወአንጐርጐሩ ወአኅለቆሙ ብድብድ።» ዝንቱ ኵሉ ዘረከቦሙ ለእልክቱ ምሳሌ ተጽሕፈ ለአእምሮ ወለተግሣጸ ዚኣነ እለ በደኃሪ መዋዕል። ወይእዜኒ ዝኩ ዘይትአመን ርእሶ ከመ ይቀውም ውእቱ ለይትዐቀብ ከመ ኢይደቅ። ወመንሱትሰ ኢይረክበክሙ ዘእንበለ እምሰብእ ዳእሙ እኩት እግዚአብሔር ዘኢኀደገክሙ ትትመንሰዉ ዘእንበለ ዳእሙ በዘትክሉ ጸዊረ ወተዐግሦ ወይረድአክሙ በመከራ ከመ ትፃኡ እመንሱት።

ወይእዜኒ አኀዊነ ጕዩ እምአማልክት። ወፍትሑ ከመ ጠቢባን በዘይረትዕ እብለክሙ። ዝንቱ ጽዋዐ በረከት ዘንባርክ አኮኑ ሱታፌ ደሙ ለክርስቶስ ውእቱ ወዝኒ ኅብስት ዘንፌትት አኮኑ ሱታፌ ሥጋሁ ለክርስቶስ ውእቱ። ወበከመ አሐዱ ኅብስት ከማሁ አሐዱ ሥጋ ንሕነ እንዘ ብዙኃን እስመ ኵልነ እምአሐዱ ኅብስት ንነሥእ። ርእይዎሙ ለእስራኤል ዘሥጋ ይበልዑ መሥዋዕተ ወይከውኑ ሱቱፋኒሁ ለምሥዋዕ። ወምንተ እንከ ንብል ዘሂ ይዘብሑ ለአማልክት ከንቱ ወአማልክቲሆሙኒ ከንቱ። ወአሕዛብኒ ዘይዘብሑ ለአጋንንት ወአኮ ለእግዚአብሔር ወባሕቱ ኢይፈቅድ ለክሙ ትኩኑ ሱቱፋነ አጋንንት። ወኢትክሉ ሰቲየ ጽዋዐ እግዚአብሔር ወጽዋዐ አጋንንት ወኢትክሉ በሊዐ ማእደ እግዚአብሔር ወማእደ አጋንንት። ናቅንኦኑ እንከ ለእግዚአብሔር ቦኑ ንጸንዕ እምኔሁ። ወኵሉ ይከውነኒ ወኵሉሰ አኮ ርቱዕ ወኵሉ ብውሕ ሊተ ወባሕቱ አኮ ኵሉ ዘየሐንጽ። ኢታድልዉ ለርእስክሙ ዘእንበለ ለቢጽክሙ። ወዓዲ ኵሎ ዘይሠይጡ በምሥያጥ ብልዑ ወኢትሕትቱ። እስመ ለእግዚአብሔር ምድር በምልኣ። ወለእመ ቦ ዘጸውዐክሙ ዘኢየአምን ወፈቀድክሙ ትሑሩ ኵሎ ዘአቅረቡ ለክሙ ብልዑ ወኢትሕትቱ። ወእመሰ ቦ ዘይቤለክሙ እስመ ዝንቱ ዝቡሕ ለአማልክት ኢትብልዑ እንከ በእንተ ዘይቤለክሙ ወበእንተ ትሕዝብተ ቢጽክሙ። እስመ ቀጸቡክሙ ከመ ኢይግአዝዋ ለግዕዛንክሙ። ወእመሰ በአእኵቶ እበልዕ ለምንት ይፀርፉ ላዕሌየ። ወእመኒ በላዕክሙ ወእመኒ ሰተይክሙ ወኵሎ ዘገበርክሙ በአኰቴተ እግዚአብሔር ግበሩ። ወኩንዎሙ አርኣያ ዘእንበለ ዕቅፍት ለአይሁድ ወለአረሚ ወለሕዝበ እግዚአብሔር። በከመ በኵሉ አደሉ አነ እስመ ተድላ ብዙኃን አኀሥሥ በዘየሐይዉ ወአኮ ተድላ ርእስየ ዘአኀሥሥ።

聆听 ኀበ ሰብአ ቆሮንቶስ 1 10