ZEKHARIAH 6
6
Siphuhlengte Pali Hmuhnak
1Larhnak a dang pakhat hmu ai dar mualtlangta pahnih karlak in siphuhleng pali suak khiah hmu ing. Ciami mualtlangta pahnih tu dar tlang i. 2Pakhathnak siphuhleng tu siphuh san in duk i, pahnihhnak tu siphuh hang in duk i, #Thup 6:4-5 3pathumhnak tu siphuh ngo in duk ai a palihnak tu siphuh ngan in duk i.#Thup 6:2 4Cen vancungmi khiah, “Bawipa he siphuhlengte tu ziang ti nuamhnak i?” tiin zawt ing.
5Ani in, “Hemite tu hlivuate pali i. Laivum pumpuhluk ai Bawipa hnenin mitua niu ah a hlenghnak i,” tiin ti i.#Thup 7:1
6Siphuh hang pawl ai dukhnak siphuhleng tu sak lamah feh i, siphuh ngo pawl ai dukhnak tu nitlak lamah feh i, siphuh ngan pawl ai dukhnak tu hlang lam ramah feh i. 7Siphuhte a suak fangin laivum pumpuhluk sik tuh khiah um ngai i. Vancungmi in, “Feh tu ilai, laivum khiah sik ta tu ih!” ti i; a tihnak bangin sik tlang i. 8Ciafangin vancungmi in, “Sak lam ram lamai a fehtu siphuhte in Bawipa ai thinrawhnak khiah dapruai zo i,” tiin auh i.
Joshua Sui Lukhuk Khuruai Tuh
9 Bawipa ai ponkam tu i hnenah hetihin hleng ai, 10Bawipa in, “Saltanghnak in a lettute Heldai, Tobijah le Jedaiah ai lehsawng khiah lang tulai Zephaniah ai fapa Josiah inn ah rang ngai in feh tu. 11Amahte ai lehsawng pehnak sui le ngun in sui lukhuk bawn tulai Jehozadak ai fapa Suangbawi Sang Joshua khuruai tu. 12A hnenah, Cungnungber Bawipa in, ‘Thingkak tiin kohnak tu tunin a umhnak ah khangso tuhai Bawipa ai Biakinn amah in saleh tuh i.#Jer 23:5; 33:15; Zec 3:8 13Biakinn a salehtu heh amah i tuhai kumpibawi tlukin hmingthanghnak ngah tuhai a minungte amah in uk tuh i. Suangbawi pakhat a bawi tohkham hiangah ding tuhai, daphnak le remhnak thawn hmunkhat ah naper tlang tuh i, ti i,’ tiin ti tu. 14Ciami sui lukhuk tu Bawipa ai Biakinn songah um tuhai Heldai, Tobijah, Jedaiah le Josiah tepawl hihhlenhnak i tuh i,” tiin ti i.
15Lamhlapui ai a umtute khai kawi tlang tuhai Bawipa ai Biakinn khiah sa bawm tuh i. Ciatihin a sa fangin Cungnungber Bawipa in, ning hnenah kaimah i hlat i ti ling tuh i si. Bawipa, ning Pathian ai thupehnak a veksen in hlun le i sikhaw a vum lamai thil hmuahhmuah heh khim tuh sio i.
Zanniat Bible © Bible Society of Myanmar, 2018.