ZEKHARIAH 13
13
1Cungnungber Bawipa in, “Ciami can a hleng fangin David ai tesinfate le Jerusalem mite sualhnak le amahte milim biahnak in cianghlimhnak tuhin cirhti pakhat suak tuh i. 2Ciafangin he ram milimte hming tu kaimah in phiat tuh sio ai aisu inkhai hih tuh nawn lo i. Prophet ing a titu hmuahhmuah kaimah in lon tuh sek ai milim bia nuamhnak thinlung khai lang sah tuh sek ing. 3Cen mi pakhatkhat in prophet ponkam in pong tum thotho lekhaw, a nu le a pa in, ‘Bawipa’ hming in thudon na rel manin na thi tuh i,’ tiin ti tuh i. Ciatihin prophet ponkam in a pong fangin amah ai nu le pa in rek tuh i. 4Ciabang can a hleng fangin aisu bang prophet khai larhnak pakhatkhat a hmu manin uar dun tuh lo i, prophet nun khai cung tuh lo ai misenpui zawlhnak tuhin prophette ai sil dehnak, a hlun ngai korfualpui khai sil tuh lo i. 5Cia tahin anite in, “Kai tu prophet ilo ing. Lovaimi ing; i nunsong hmuahhmuah lovai mi ing,’ ti tuh sawn i. 6Cen mi pakhatkhat in ‘Na sohnar ai tuahmawhhnak hmaihmate khai zaimanin i?’ tiin a zawt fangin ‘I rualpui inn ai kin tawk panghnak i,’ tiin ti tuh i,” ti i.
Pathian Ai Tuukhalte Rek Tumhnak
7Cungnungber Bawipa in, “Aw, ralvang, tho tulai kaimah caah napertu tuukhal khiah sat tu! Rek tulai tuute tu khuahacang ah piak tuseh. Mi nauta pawl tu kaimah in siatsuah tuh menma ing;#Mat 26:31; Mar 14:27 8cen he ram song minungte seu thum seu hnih thi tuh i. Seu thum in seu khat ian luat tuh i. 9Cen a tanghnak seu thum ai seu khat tu kaimah in cu tuhai ngun heh mai in a ciangruai bangin ciangruai tuh ing. Sui a cu bangin cu tuh ing. Cen i hnenah sawngen tlang tuhai ngai sah tuh ing. Kaimah minung i si ti khiah rel tuhai kaimah khai amahte Pathian ing ti khaih phuang tuh ing,” tiin ti i.
Zanniat Bible © Bible Society of Myanmar, 2018.