ZEKHARIAH 10
10
Bawipa In Luathnak Thukham I
1 Bawipa hnenah hla thar ah khuapui ruah ngen tu ih. Khuanim bawntu le ruah siruaitu heh amah i. Mi zongzong ai loram a hingruaitu khai Bawipa i. 2Minung in milim le mipolte hnenah thuron i, ikhalselai amahte relhnak tu thulovang le thudon lek i. Mihrekkhat in mang let i, ikhalselai a pingpeng ah ning hoi i, thinhnemhnak ponkam a ponghnak tu hnempuihnak zaikhai nai lo i. Ciamanin misenpui tu tuu pai bangin vakvai i. Hotu a nai lo manin harsahnak tawk i.#Mat 9:36; Mar 6:34
3 Bawipa in hetihin ti i. “I minungte uktu vumah thin i raw i. Ciamanin kaimah in cawh tuh ing. Judah mite tu I naihnak i ai Cungnungber Bawipa kaimah in kilkhawl tuh ing. Anite tu i uarmi le a hatmi i raltawnghnak siphuh i tuh i. 4Anite songin mi uktute, mi hoitute le ralbawite suak tuhai i minungte uk tuh i. 5Lampui nawngbek lakai a ralte a fontu ṭaiṭo ralkapte bangin Judah mite tu nehtu i tuh i. Bawipa a hnenah um manin raltawng tuhai a ral lakai siphuh to ralkapte rin neh tuh i.
6“Judah mite tu mihat ngai in
bawn tuh ing;
Israel mite o tuh ing.
Amahte vumah ngaihharhnak nai tuh ing,
Amahte veksen in amahte khua le ramah
letpui tuh ing.
I hnawl awng lohnak bangin ruat i tuh i.
Kai tu Bawipa amahte
Pathian ing,
Amahte sawngenhnak ngai sah tuh ing.
7Israel mite tu raltawng thiam bangin
hat tuhai,
Cabitti ding bangin amahte thinnuam tuh i.
Amahte tesinfate in he nehhnak tu
hih tuhai,
Bawipa ai thil bawnhnak manin
ang tlang tuh i.
8“I minungte ko tuhai hmunkhat ah
khawm tuh ing.
Kaimah in o tuhai a hlan bangin
mi tampui in cang leh tuh i.
9Miphun dang lakah piakruai zo napui,
Ram hlapui inkhai kaimah i ling
tuh i.
Amahte le a fate nung tuhai,
Amahte khua le ramah let tuh i.
10Egypt ram le Assyria ram an letpui tuhai,
Amahte ram songah hmun
khuar sah tuh ing.
Gilead le Lebanon ram ahkhai umruai
tuh ing;
Ram pumpuhluk in minung dim tuh i.
11Harsahnak tifingriat a tan tlang fangin,
Bawipa kaimah in tilep heh
vit tuhai,
Nile Runpui a thuk ngai heh kang tuh sek i,
A puarthau mi Assyria zakthi in um tuhai,
A thawmlian mi Egypt huham
nai tuh nawn lo i.
12I minungte Bawipa ah
hatruai tuh ing;
Kaimah hming in lam vak tlang tuh i,”
ti i.
Bawipa in rel zo i.
Zanniat Bible © Bible Society of Myanmar, 2018.