1 KORIN 12
12
Rauhla Lehsawng
1U le naute, Rauhla Thianghlim ai pehnak lehsawng thu thawn peh dun in ning ngan awnghnak thula ah thudik ning ling tuh i daihsahhnak um i. 2Sakhua mi ning i laiah cenin lam peng hlun ai nunhnak nai lo milimte bia awng i si. 3Ikhalselai Pathian Rauhla ai hoi mite in, “Jesuh tu cukcam in um tuseh,” ti thil tuh lo ai Rauhla Thianghlim ai hoi mite ian in, “Jesuh tu Bawi i,” ti thil tuh i.
4Rauhla lehsawng a phunphun um i, ikhalselai ciami lehsawngte hmuahhmuah a petu heh Rauhla Amah lek i.#Rom 12:6-8 5Bawipa ai naper heh a phunphun um i, ikhalselai Bawipa tu pakhat lek um i. 6Naperthilhnak heh a phunphun um i, ikhalselai ciami naperthilhnak tu aisu hnen ahkhai amahte tawk ṭen in a petu heh Pathian Amah thotho i. 7Kin hnenah Rauhla a um heh phun khatkhat in lar ai ciami tu misenpui phathnemhnak hrangah i. 8Rauhla in mi pakhat tu fimhnak thawn rel thiamhnak pe ai a dang pakhat heh cia Rauhla in linghnak thu relfiang thiamhnak pe i. 9Ciami Rauhla thotho in mi pakhat tu sanghnak pe ai a dang pakhat heh miur cakruaihnak pe i. 10Rauhla in mi pakhat hnenah ngaihsunurkul bawnthilhnak pe ai a dang hnenah prophet bangin thurel thiamhnak pe i; a dang pakhat hnenah Rauhla lehsawng thiathiamhnak pe i. Ciabang thotho in mi pakhat hnenah lin lo pon in pongthilhnak pe ai midang hnenah ciatih ai ponghnak relfiangthilhnak pe i. 11Hemi hmuahhmuah a petu heh Rauhla pakhat lek i; Amah ai daih bangin lehsawng dangdang khai pumpak hnenah pe ṭen i.
Ruangpum Pakhat, Taksakhan Tampui
12Khrih tu taksa ruangpum bang i. Taksa ruangpum tu pakhat napui khaw taksakhan tu tampui i.#Rom 12:4-5 13Ciabang pah in kinte khai Judah mi le Gentile mi, miluat le sal tiin um khal singkhaw kin veksen in ciami ruangpum pakhat songah Rauhla pakhat ai baptisma langhnak ising ai kin veksen in ciami Rauhla pakhat khiah ding tlang tuhin bawnhnak ising.
14Ruangpum heh taksakhan pakhat lek i lo i, taksakhan tampui i. 15Ke in, “Kai tu kut i lo manin ruangpum ai i lo ing,” tibang selai, ciatih ai a ti manin taksakhan i tuh lo ngaingai i maw? 16Cen bil in, “Kai tu mit i lo manin ruangpum ai i lo ing,” ti selai, ciatih ai a ti manin taksakhan i lo in um ngaingai tuh i awm? 17Ruangpum heh mit ciang iselai akontih in thu za thil tuh i ni? Cen bil lek iselai akontih in rim hnim thil tuh i ni? 18Ikhalselai tunai thil umdan bangin, Pathian in taksakhan dangdang heh a um tuh hmun ṭen ah amah ai daihhnak bangin dah i. 19Ruangpum heh taksakhan pakhat lek iselai ruangpui i tuh lo i! 20Ikhalselai a tunai thil umdan ah cen taksakhan tampui um napui ruangpum tu pakhat lek i.
21Ciamanin mit in, “Nang tu na kul lo ing,” tiin kut heh ti thil tuh lo i. Cen lu in ke khai, “Na kul lo ing,” tiin ti thil tuh ve lo i. 22Thungai in ti fangin tu kin ruangpum ai taksakhan ṭawnṭai ber rin um loin cang thil hrimhrim lo ising. 23A thupui hang lo kin tihnak taksakhan heh ralring deuh in tuamhlawm ai kin ruangpui vumai a mawi hang lo taksakhan khiah pha deuh in thuam de ising. 24Kin taksa vumai mitsih a mawi hmun deuh tu thuam hnelhno kul lo i. Cawimawihnak a sam ber taksakhan in cawimawihnak ngah cuang tuhin Pathian in kin ruangpum heh thuam i. 25Ciatihin ruangpum vumah khekdunhnak zaikhai um lo i; taksakhan pakhat le pakhat vumah zawmruathnak nai sawn i. 26Taksakhan pakhat tuar lekhaw a dang taksakhante inkhai tuarpui ve i. Taksakhan pakhat songlawihnak ngah lekhaw a dangte inkhai angpui ve i.
27Ning veksen in Khrih ai ruangpum i si ai pumpak ṭen in a taksakhan ṭen i si. 28Ciamanin Pathian in pawlpui songah minung khiah amahte ihnak tuh hmun ṭen ah dah i: a hmasaber ah nalangte dah i, a pahnihhnak ah prophette, a pathumhnak ah zirhtute, cen ngaihsunurkul bawntute, a sangtu ah cakruai thilhnak pehnak mite, ihlahle midang bawmthilhnak pehnak mite, ihlahle mi hoha thiamhnak pehnak mite, ihlahle lin lo pon ai pongthilhnak pehnak mite i.#Eph 4:11 29Amahte veksen in nalangte i sio lo i, prophet khai i sio lo i, zirhtu khai i sio lo i, ngaihsunurkul bawntute khai i sio lo i, 30urhnak cakruaitute khai i sio lo i; lin lo pon ai pongtute khai i sio lo i. 31Ciatih imanin a thupui deuhmi lehsawngte heh ngah tum tu sawn ih.
Cen hemite tahin a pha ber miangmo ning hmuh tuh ing.
Zanniat Bible © Bible Society of Myanmar, 2018.