VAROME 1
1
1Ni yeny Paulo shikee ishinga lya Kristo Yesu, shilevaangwa shive nrumi, neesauwau shaambe mbony shisha ta Iruva; 2tilya Iruva alemmaa ivikya kyaasa na kana kya vakisuku vakwe efo Mareiyony Meele. 3Nto mbony ta mwana wakwe, ekee wa ngata ya mwiili alewonika efo ufyariny lwa Davidi. 4Nawe kasheorwa paa na wiidimi sheelyi we ni Mwana wa Iruva, ngata ya Mumuyo Mweele, na iruka lya vafu, mmbwe Yesu Kristo Nndumi weeru. 5Na efo kwakwe lukawarya isarya na usu naambo vandu va masanga vakooye ikunyiisya efo kikusiryony kyeendwa ni irina lyakwe, 6elyo kyimaruma kya vayo yeni mulevikwa vasauwe va Yesu Kristo. 7Kwany yeni moose mukee Rome, mukunndyo ni Iruva, mukee vavaange naambo muve veele. Isarya lyimukae na ufoo luukye kwa Iruva Nde weeru, na kwa Nndumi weeru Yesu Kristo.
Kiterevo kya yaana Iruva
8Kya mbee mmbo shaana Iruva wakwa kwi Yesu Kristo kyimaruma kyany, yeni moose mashika elyi kikusiryo kyany kyikee ivambiswa ulaniny koose. 9Mashika Iruva yeu shikemwinndya na nrima wakwa kwi Nrumi shisha ya Mwana wakwe, we ni nkureeki wakwa eeshi shaasa shilakeemanda imusenda, 10mikonu myoose efo fiterewony fyakwa. Shiiterevaa naambo shishe kwany uviny, kwakoya Iruva akunda ishiidimisya kyaarony ekyi kyakwa. 11Mashika mmbo shilanngye nnu imulollya, naambo nkooye imwaavya simbo ta nrima, naambo mukooye itumariswa. 12Llyo iviiryana muu yeny na yeni, wo nndu na kikusiryo kya yeto ungyi, kyany na kyakwa. 13Vanavama vakwa nshikunndye mure mulamanya sheelyi nkeengyi sheelangye isha kwany lyo shalemmyo-da fika ulaalu, naambo shimuwonisye ndunda na yeni shaasa shilevewonisya neewo va masanga engyi. 14Mmbo shitiri sye kwa Vagriki na kwa yewo valakee Vagriki. Shitiri sye kwa yewo va urango na kwa yewo valatiri urango. 15Kimmba niindo, yeny mmbo kishikooye shaambe Nrumi ya Nsia naakwa nkwany yeni mukee Roma.
Finya ya Irero lya Iruva
16Mashika nshishiiryaa Nrumi ya Iruva ya Nsia sony-fo, mashika nnyo wiidimi lwa Iruva lushendee ukiro, kwa wo umwi akusirye-u, kwa Muyuda mbele na kwa Mgriki-da. 17Mashika usumanu lwa Iruva lwallollywa paa nnang'ani ya vayo, kyikusiryo na kyikusiryo. Shaasa kyikee kyireiye, “Yeto wa usumanu nkikusiryo kyintiryaa-u na muu.”
Weesi lwa Ulyamari
18Mashika unyafi lwa Iruva lwammaa ilollywa paa luuka iruveeu lushe uwe ya uravi loose lwa nndu wa vandu yeto aora uravi kweemina dede yeyo. 19Mbony ta Iruva mmbo tikoorye paa neemanyika kwa woose, mashika Iruva mmbo alevasukuya. 20Mashika mbony takwe tilya tilandelollywa uka yuumbwa lya ulana ulaalu tallollywa, neemanyika efo mashoreny akwe, nkyo wiidimi lwakwe na ngata yakwe ya iva Iruva, naambo numa valashelollya-u kindo kyeekuuta. 21Mashika-le, kyeeri kilya valemanya Iruva mmbaleng'anisa sheelyi mmbwe Iruva nta imwaana-fo. Lyo mmbo valerekya efo uretiny, na mirima yeyo yaawo ya utondo ikawoywa niirema. 22Vekusaraa mmbo vakee varango, ate llyo varung'ana mmwasi. 23Vakaalasha itumbe lya Iruva nalatiri ilyamarika na fwana ya nndu wa vandu akee wa ifwa, na ya ndeye na ya mafisi na ya efyo fikuruffwaa si. 24Kimaruma kya efyo Iruva kavara efo langony ta mirima yaawo, valatye findo fya ukirinda, kutani veengye miili yawo usutu wo veni na veni. 25Ni llya valealasha dede ya Iruva na wongo, vakafiirya fyuumbe ndi neefiinndya ando a Muumbi yeto akeerumishwa llung'anu. Amen. 26Naasa Iruva kavara vasore lango tawo ta usutu, kutani na vaka vaalasha ngata ilya ya mbee nevika-u ngata ilakee ilya ya mbee. 27Na womi nawo naakiwo, vakara ikaa na vaka shaasa kyekai, vakatusana wo veni na veni, womi vakatana findo filakwaani nawo, vakakuwonisya itaiyo wo veni kisumani na uravi lwawo. 28Na kimmba valelema ikaa na Iruva efo umanyony lwawo, Iruva mmbo alevareeya valatye urango lwawo yelo lulavaa, vatani findo filavasumannyi. 29Mmbo veesshwe uravi lwa wo ngata, uravi na lango na weesi, mmbo veeshwe ukasha, uwai, uriingyi, ulembi; vandu va mirima mikasha, veamba fyeesuta vengyi, 30vevikya uree-ree, mmbo vasuuye Iruva, vatiri ulyang'a vekushopa, vekung'anisa, vesongosia fya wongo, valashiindyaa vamiku vawo, 31valatiri umanyo, veefisha fyaasa, valakundye vandu vawo, valalyillyaa vengyi. 32Nawo vammaa imanya ngapo ya usumanu ya Iruva, kyeyaamba veetana efyo mmbo vasumannyo ni ufu, mmbo vakeetana indo, nta nshi indo-da fo, mmbo vakeeyirikyana na yewo veetana indo.
The Holy Bible in Kimashami © Bible Society of Tanzania, 2016.