MASHORA 13
13
Barnaba na Saulo varumwa
1Na efo siriny yeyo yekee Antiokia kweefo vakisuku na vaalimu, nawo ni Barnaba, na Simion evaangwaa Nigeri, na Lukio nndu wa Krene, na Manaeni, veeng'annyi ando amwi na Herode, na Saulo. 2Naasa kyeeri yeva vekeevikya Nndumi miindye neetereva, Mumuyo Mweele kaamba, “Kyeshyuutyeny nng'u Barnaba na Saulo kya ishora lyillya shilevavaangya. 3Llyo vekimaa ikootoya na itereva, vakavaekerya maako, naambo veedimi ikweengya.”
Varumi valosha kulya Kipro
4Naasa vandu yewo veeriwa ni Mmumuyo Mweele vakandesokya na Seleukia, na kuuka-fo vakaira yeeveny vakandefika Kipro. 5Na kyeeri veeke Salami vakaamba irero lya Iruva efo mmba teeterevya ta Vayuda, na Yohane kakaa nawo eevafurukannya.
6Naasa llya valemaa irummbwa Kipro shoose fika Pafo, vakalollya nndu umwi nsavi, nkisuku wa wongo, ni Myuda avaangwa Bar-Yesu. 7Nndu yeu mmbo ekee na nshilyi wa Sergio Paulo, nndu atiri urango. We nshilyi yeto kavaanga Barnaba na Saulo kwakwe, nawe mmbo alekunda yaarannya Irero lya Iruva. 8Llyo Elima, nsavi ulya (mashika llyo irina lyakwe kwa Kigriki) kawakyana nawe, kakunda iinduta nrima wa nshilyi ulya nare kikusiryo ekyi. 9Kyaindi Saulo, mmbwe Paulo ulaalu, eesshwe Mumuyo Mweele kamulla na unyaasi, 10kaamba, “Ewe kwiisshwe ntambo na uravi loose, mwana wa yeto Nkumbi, nkiduva wa usumanu, a ndesa nkuraa yeeveta shia ta Iruva tikee shoorotu?” 11Kyasiany, woko lwa Nndumi lukukapaa, kufwe miso kulalollyaa mwi ando a mikonu. Llya yeni nruve ukansheya na ireema misony, karunguka-runguka eeruyaa nndu mwintira woko nantetere. 12Naasa nshilyi ulya ekilollya efyo fyautika, kakusirya-u, efulukywaa nkya kiloshyo kya Nndumi.
Barnaba na Paulo kulya Antiokia na Pisidia
13Naasany Paulo na wooroye vakakwiipoo na ngalava vakafika Pafo vakeenda Perge kulya Pamfilia. Yohane kavara-fo kawuya Yerusalemu. 14Wo vakauka Perge veshiiraa yoo nnang'ani ya uruka vakandefika Antiokia, nto muri wa Pisidia, vakaanga mmba vakakaa rembo. 15Naasa uvavaso na mbony ta veawuya fisuku tikimaa isomwa, vaniini va mmba ya iterevya vakaruma nndu kwawo navie, nyira kwakooya mutiri kindo kisha kyevia vandu yeva, naasa muvavie. 16Naasa Paulo kasalala kavatukya woko, kavavia, “Yeni vomi va Israeli mukeeindya Iruva shaarannyiny-te. 17Iruva wa vandu yeva va Israeli mmbo alesauwa vande veru, kavang'anisa, kyeeri kilya vekee sha veny kulya urukeny lwa Misri, nawe kavauta-fo na woko lwakwe kavatetera. 18Na ando a myaaka makumi aana kavasisirya nnu kulya kasa. 19Nawe ekimaa imamita ngyufyari ta vandu mfungare kulya urukeny lwa Kanaani kavaniinga uruka elo luve ding'u yaawo ando a myaaka mayana aana na makumi araanu; 20numa ya vayo kavaniinga Valeti va myaandu fika kyeeri kya nkisuku Samweli. 21Kwanuma vakatereva vavikywa mangyi; Iruva kavaniinga Saulo mwana wa Kishi, nndu wa ufyari lwa Benyamini, ando a myaaka makumi aana. 22Na kyeeri alemaa yuuta-fo eto, kaipoo Davidi naambo nave mangyi waawo, mmbwe alenkureekya, eshambaa, ‘Shallollya Davidi mwana wa Yese nndu asennyi nrima wakwa, nawe mmbo ashetana efyo shikundye fyoose.’ 23Kuuka efo ufyariny lwa nndu yeto Iruva mmbo aleengye Israeli Mwiikira, mmbwe Yesu, 24shaasa aledeerya kyaasa; kyeeri Yohane emmaa yoongoya vandu woose va Israeli mbony ta ubatiso lwa yaalashika, kulaore we ensha. 25Yohane nawe nalandemarisya kyaaro kyakwe, kaamba, ‘Mmbo mushikusarye yeny ni vi ndesa? Yeny nshi we-fo. Kyaindi loleny, asheshaa umwi numa yakwa shilasumani nta imwelelisya fyaaru fyakwe.’”
26“Vanavama vakwa, vana va ufyari lwa Abrahamu, na yewo vengyi nnang'ani yaany veinndya Iruva, Irero elyi lya ukiro mmbo lyilerikwa kweru. 27Mashika valya vakee Yerusalemu na vaniini vawo, elyi kulaore valemmanya we, nta marero a vakisuku yoo asomwaa wo nkonu wa sabato, mmbo valeenutya vemuutyaa uvingo. 28Na kyikava mmbalelollya kiteve kyemmamita, vakatereva Pilato nawaawa. 29Nawe ekimaa iinutya fyoose filya ekeendeerye, vakamoolota kulya nriny ulya vakammbika mbangeny. 30Lyo Iruva kanduta nooke ufuny; 31kalollyo ando a mikonu miingyi mmbalya alesaama nawo auka Galilaya fika Yerusalemu, vakava ulaalu mmbo vakureekyi vakwe kunu vanduny. 32Neese ulaalu mmbo lukee imoongoya nrumi shisha ya kyaasa kilya vakuu valya valeniinngywa, 33kyeyaamba, Iruva mmbo aleinutya kwa vana veru kyaasa kilya, llya aleruta Yesu; shaasa kikee kireiye kulya Saburiny ya kavii indi:
‘Yewe mmbwe Mwana wakwa inu shakwiira.’”
34“Na lyingyi sheelyi alennduta auka kwa vafu, nare nalawuiyase urumato, kaamba indi:
‘Nshemoraa yeni mbony sheele ta Davidi tikee dede.’”
35na ando engyi-da kaamba,
“Nkusheraa mweele wafo nawoni irumaka-fo.”
36“Mashika Davidi ekimaa irunndya mbony ta Iruva kya kyeeri kyakwe, mmbo alefwa, kaarwa ando amwi na vandeye, kapwaa. 37Kyaindi yeu alerutwa ni Iruva nnyalepwaa-fo. 38Naasany, vanavama, mumanyi sheelyi kyeendwa ni Yesu mmbo uruka loongoywa mbony teesaryo ulyamari; 39na kyeendwa mmbwe wo nndu yeto ashemwirikkyaa mmbo ashekennywaa usumanu kya findo fyoose nalashidimaa iwona usumanu efo uvavasony lwa Mose. 40Ulaalu loleny kilasheeva kwany kilya kilererwa ni veawuya fisuku, kyeyaamba,
41‘Loleny-te yeni veemina,
mufulukyo neereka kulu.
Mashika yeny sharunda mashora fyeeriny fyany,
ishora muleshiidimaa ilyiirikya nta,
naako mwoongoywa inda.’”
42Naasa kyeeri veeke isomuka, vakavatereva vashevavia-se marero yoo-da elyi sabato ya kavii. 43Kyeeri mwiindye vekee isomuka, Vayuda na valya vaalukye veengyi vakakutira na Paulo na Barnaba; vekyirera nawo, vakavavika nrima naambo vawarani neekaa na isarya lya Iruva. 44Naasa elyi lya sabato ya kavii, vandu veengyi nnu, kufii muri moose vakakusanyirya naambo vashearannya Irero lya Iruva. 45Kyaindi Vayuda wo kyeeri valelollya nsemu wa vandu vakaishwa kififi, vakakana deny marero alya alererwa ni Paulo, vellyaa ulai na yaarara. 46Paulo na Barnaba vakarera nookaari nnu, vakaamba, Mmbo kileva, nkuti Irero lya Iruva lyaambawa kwany yeni mbele, lyo kimmba mwalyiisityo kwaasha, neekulollya sheelyi yeni mmutinnyo mmuu wa llung'anu, naasa lolely, lweendany kwa vandu va masanga. 47Mashika Nndumi aleluvia,
mmbo shilekuvika kuve sa yeevaiya vandu,
kuve ukiri fika fishingony fya ulana.
48Llya vandu va masanga valeita indo vakafura, vakarumisha Irero lya Nndumi, na valya veeke vadeesye umangyi lwa iruveeu vakakusirya-u.
49Irero lya Nndumi lyikakwaana urukeny lulya koose. 50Indi Vayuda vakaaya vaka valya vatiri nnduma vakaveva vasaari amwi na vaniini va muri, na vandu naambo vaarare Paulo na Barnaba; vakavaumbuta vauke efo minyanuny yaawo. 51Wo vakavakukutya kiluulyi kya marende awo, vakaenda Ikonio. 52Vakiloshyony vakaishwa ifura na Mumuyo Mweele.
The Holy Bible in Kimashami © Bible Society of Tanzania, 2016.