Marcos 16
16
Ku yëknikkäjpxy jäts tëj Jesús jyükypyeky
(Mt 28.1-10; Lc 24.1-12; Jn 20.1-10)
1Kuts poo'kxë'nxëëw it nyajjxy, nits María Magdalena mëët Santiago jäts Salomé tyaaktë pën txëëw María, tjuytyë pa'akxuu'kpë nëëj jäts tpëëjmëtë't Jesús nyikkëjjx. 2Nits kyujawom ku jä'yë y'ijjty xëëw pyitsemnyë'm, nyëjkxtë maj jäjp Jesús yyëkpëëmy, 3jäts to'oxytyëjjktë y'ijjty nyayä'änyëtë:
—¿Pën yi'it tjë'kë'ëp tsaaj mati' ta'akkëëjyë'p?
4Kuts jäjp jya'atë jäts t'ijxtë nits tëj tsaaj yyëkjë'këynyë. Jä'ku mëjjnäxy jä' y'ijjty jä' tsaaj. 5Nits tyëjjk'eetyë tsajjutjötypy jäjpts tpat'të tu'uk wajjtyëjjk, mati' y'ijjty tu'uk poop yönywyit twit'eepy, jäjp tsyëënë akaa'nytsyow maj Jesús yyëkkejjxy. Jä'äts to'oxytyëjjktë mëjk atsë'ëjk'ajjtëtë, 6Nits jä' wajjtyëjjk nyëë'mxëtë:
—Katij mtsë'ëkëtë. Jesús Nazaret'të'tjaa'y miits m'ijxtääpy, pën yyëkkruspäjt'të. Tëts jä' jyükypyeky; aa'xtuktë maj yyëkkejjxy, kä' jä' yaj y'okpën'ijtnë. 7Nëjkx xwaajnjaajyëtë y'ixpëjkpëttëjjk, mëët Pedro: “Jäts Galilea Jesús nyijkxy, nits jatu'kyaajjë wyaamukkëtë't; jämts tmëëtnawyaatëtë't naa'xkë'n nyëë'mxëtë.”
8Nits jä' to'oxytyëjjk kyäktakkoytyë jäjp tsajjutjötypy, tsë'ëjkë'y'oo'këjxtë'p jäts jëppijp'oo'këjxtë'p jä' y'ijjtytë. Jäts nippën ntsoj tkanëëjmjäätyë, jä'ku tsë'ëjk'eetyë'p jä' y'ijjty.
Jesús nyaknyikä'äjxjë'ëjkyë María Magdalena wyinkujjky
(Jn 20.11-18)
[ 9Wäänë xëëw nyajjxy ku Jesús jyükypyëjjky dominkëjajjp, nits nyaknyikkä'äjxjë'ëjkë jawyiin María Magdalena wyinkujjky, pën y'ijjty tëj ttokniwa'atsy niwixtujjk mëjjku'ujy tyumpë. 10Nits María Magdalena nyijkxy jäts tmatyaajkjaay pënjäty y'ijjty tëj Jesús tmëëtwittit'të, jä'ku jäjp jä' y'ijjty yëk'ayoopë jyë'ëytyë ya'axtë. 11Kuts jä' tmatootë nits tëj Jesús jyükypyeky jäts tëj María Magdalena t'ijxy, kä'äts jä' ttëyjyaa'w'eetyë.
Jesús nyaknyikä'äjxjë'ëjkyë nimäjtsk y'ixpëjkpë wyinküjkypy
(Lc 24.13-35)
12Ku najj nyajjxy, nits Jesús nyaknyikkä'äjxjë'ëjkë nimäjtsk y'ixpëjkpë wyinküjkypy pën y'ijjty kamjötypy nëjkxtë'p. 13Nits jä' jaa'y wyimpijt'të jäts myuku'uktëjjk twaajnjäätyë; kä'äts jä' mëët yyëktëyjyaa'w'eetyë.
Jesús ttunkmo'oy y'ixpëjkpëttëjjk
(Mt 28.16-20; Lc 24.36-49; Jn 20.19-23)
14Jawäänë xëëw nyajjxy nits Jesús jya'ajty maj jäjp y'ijjty janimajtu'uk y'ixpëjkpëttëjjk tsyëënëtë kaytyaajk'äjpy. Jäts mëjk y'ixpëjkpëttëjjk twintso'ojy ku jätyë tkattëyjyaa'w'eetyë pënjäty matyaktë nits tëj y'ijxyë jyükypyeky. 15Nits tnëëjmjaay y'ixpëjkpëttëjjk: «Nnëjkxtë tu'k'it naxwiin, waajnëtë jaa'y oy'ayuujk oymatya'aky. 16Pënpën ttëyjyaa'w'eetyë'p jäts nyëppät'të, pyaat'të'ps jä' nitsoojkë'n; pënpënts kattëyjyaaw'eetyë'p, jä'äts ayoo'npaat'të'p. 17Ya'at ijxpäjjt yyëknikkä'äjxjë'ëktë'p pënjäty ëjts xtëyjyaa'w'eetyë'p: Ëjts nxëëw këjxm mëjjku'ujy jaa'y ttokniwa'atstë't; kyajpxtë'p wiijnk ayuujk; 18ku atsu'ujky tsaa'ny tmatstë't, ok ku jaa'y jya'atsooyëwya'anëtë't, kä'äts jä' ntsoj jyat'të't; jäts ku tkë'nixajjtë't pa'amjaa'y, tso'oktë'p jä'.»
Jesús nyëjkxnë tsajpjotm
(Lc 24.50-53)
19Kuts najj nyëë'mxëtë, nits Jesús Wintsën yyëkmunëjkxnë tsajpjotm, jäts tsyëënë'y'ixtaajky Yës Teety y'akaa'ny pya'am. 20Nits jä' ixpëjkpëttëjjk tpatsoo'ntaktë tkajpxwa'kxtë aaw ayuujk oymyaa'jë'it; kë'mts jä' Wintsën y'ijjty pyuttëk'ätyëtë, jäts tyëknikkä'äjxjë'ëky mëjj'ijxpäjjt mëjjputtëjjk'ëë'ny, najjts tyëwtë y'aaw y'ayuujk.]
Porciones en Mixe de Yalalag, Oaxaca, México © Sociedad Bíblica de México, A.C.