Arumi 1
1
1Faulo, mutumwa wa Yesu Kiristo, waëtaniwe atendeke mutumami, nëwahwaniywe gusoko a Sayu Njija a Muungu. 2Muungu mweeso waraghanie ufuma khae ukëërëa anyagëdaghu vakwe mu maandëko në meru. 3Sayu Njija nëëmughokee Mwanakwe, unë arë ufafo ufuma kunë Daudi gwa uhanga na mwëërë. 4Mweeso agahwaniwa Mwana wa Muungu mung'ë a udaho gwa uhonga na Mwahu wa weru gwa ufetyo wakwe ufuma gwa kuyi, Yesu Kiristo Müküü witu. 5Gwa ukëërëa kunë mweeso sese gwaghenyifie mboto nanë utumumami gwa gweeta ikuryo ra uhuvëi ra uhuvëi gusoko a rina rakwe mukhatë a ndughu yoong'e. 6Gwa ukhuvëywa aghonjo unë mwaëtaniwa mutendeke antu vamwa Yesu Kiristo.
7Uvii, ngumwandëkëa nyenye nyoong'e në mwëkuuko uRumi, ayanjwi va Muungu, nëmwataaniwe mutende antu vakwe: Mboto nanë majëghana ufuma kunë Muungu Tata witu nanë Müküü Yesu Kiristo ëtendeke kunë nyenye.
Irumbi kunë Muungu
8Mwandyo wa oong'e, ngumurumba Muungu wanë gwa njëa amwa Yesu Kiristo gusoko anyu nyoong'e, gusoko uhuvëi wanyu utegheeyeekie urëmi woong'e. 9Gusoko Muungu në masudanga wane, unë nene ngumwitumëkëa itambëëmwe munkhoo ane mung'ë a Sayu Njija a Mwanakwe, uvii nene faka ntinarekaa umutaana nyenye mung'ë a marombi ane. 10Nene nguromba mwino gwa mafenji a Muungu nene itungwee mwitungo ra umpeo nëdahe uja kunë nyenye. 11Gusoko nëhuunukiwe ino umwona gwa mafenji a Muungu nëdahe umufa gëfewa ga munkhoo ga umukhomia, 12gwa uvii, guje gëkhomia, gwa uhuvëi wa muu muntu, uhuvëi wanyu unkhomie nene, nanë wanë umukhomie nyee.
13Aunaanë, ngufenja mumanye mwino mëhënjo mingë nafenjie uja umusoya (ëgweeso faka itungwee nagëëywe), gusoko a uhanga ntënange mukhatë anyu na mukhatë a antu va Ndughu ingëja. 14Nene nëonyenywe kunë Ayunani nanë kunë asenji, na kunë anya mahaa nanë kunë afutu. 15Uvii nëna nkumbu utanantya Sayu Njija kunë nyeenoo në mwë uRumi.
Nguu ya Sayu Njija
16Gusoko ësëë nene ntina mënyaa gwa Sayu Njija: unë nguu ya Muungu gwa utyoi gwa muu muntu nëwina uhuvëi, gwa Muyahudi tanju kangënoo gwa Muyunani. 17Gusoko mukhatë ayo weru nanë tutë a Muungu wakunukuwe gwa njëa a uhuvëi gwa uhuvëi, mwino yiandëkiwe, “Wasuu në gwa njëa a uhuvëi unë mweru na wë mututë wasuu uguduva.”
Ihutye ra Mwaamuntu
18Gusoko ikuwo ra Muungu rakunukuwe ufuma girunde hiya na voong'e nëvëtiumukuryaa Muungu nanë uvaya wa antu unë gwa uvoya wawe vëumëkunëkëa tutë. 19Gusoko oong'e nëëgudaha umanyëka nëëmughookee Muungu ëë daaji kunë veeso, gusoko Muungu wayakunukue. 20Udua fana Muungu watundie urëmi udaho wakwe wa khae na khae nëutigoonekaa, uu nguu na urungu wakwe wa khae oong'e, wamanyëkie daaji gwa mantu në atundiwe. Gwa uvii, vëtina njëa mbanduvë a ginegha. 21Gusoko, nënaavamumanya Muungu vëgadëa umukurya mwino mweeso unë Muungu mbesa umurumba, ëgweeso vëgayaghaa mu mëbëëduko awe në ti atutë, na nkhoo yawe niina ufutu ëgatendeka kiti. 22Vëgitendaa mwino vina ihaa ngwë afuu. 23Na veeso vëukhanëkëya üküü wa Muungu nëatiukuyaa gusoko a sanamu#1:23 Sanamu: Intu nërikhweti na intu rëngeja ëgweeso ti intu ra tutë. nëyikhwete na muntu nëugukuyaa mba nyonyi mba maimwana mba maimwana ayo në ina saghami ndyoku.
24Gwa uvii Muungu agavareka munkumbu ya nkhoo yawe, vëuwuhonga uvë, nanë gëtendea mantu a mënyaa tutë mëërë awe. 25Gusoko vëgakhanëkëya tutë nëëmughookëe Muungu gwa weegheeghe na vëgakurya na utumamëa ntundo hiya na Matunda, wasuu nëunoneye ukutwa khae na khae! Amina.#1:25: Amina: Uhanya tavëra gwa intu nëratutë.
26Gusoko ëyëë Muungu agavareka vëhonge nkumbu nëtiyaikuryo. Akhema awe vëgakhanëkëëya ntendo nëinoneye na ntundo a mëërë awe gwa ësëë nëyitinoneye mu ntundo. 27Aghosya noo vii uvii, vëgareka uhonga ntendo ya ntundo a mughosya na mukhema vëgihuunukwa veeso gwa veeso. Aghosya vëgitendea mantu a mënyaa veeso gwa veeso vëgahanga munkhoo yawe asaa nënaaëvagwëëre mu uyaghoo wawe.
28Na gusoko antu vëgahita umumanya Muungu mu mahaa awe, Muungu agavareka vëhonge mahaa awe a futu, vëyatende nëëtivanoneye. 29Veeso arë vijuwe itambëëmwe na mantu oong'e a uvë, uvayo, uhunukwi, uvaya. Vijue wiru wuraghi, wikhuvi, wegheeghe, nkhoo nëmbë, veeso në ateti antu, 30atendereyi nanë vëmuhwëte Muungu. Antu në vëtina untu, anya gëdida, anya gitenda, anya utunda në mavë nanë vëtiakuriye afafi vawe. 31Veeso afutu, vëtina uhuvëi, vëtina nkhoo në njija nanë antu nëvëtikeere antu. 32Mbesa vëmanyie ino maragheeyo a tutë wa Muungu, mwino anya uyatenda asaa ivanoneye ikuya, veeso vëtëuyatenda asaa gutufu, ëgweeso vëgiyanjëyaa na vasaa nëvëuyatendaa.
Kirimi New Testament © Bible Society of Tanzania, 2008.