1 Fetero 3
3
Akhema nanë Aghosya
1Viuyi viuyi nyenye akhema nëmuroghowe, inyumpii gwa aghosya vanyu. Gwa utenda vii aghosya vëgëtunga, mbesa vëtihuvëe sayu nëëmughokee Kiristo, vëdahe utywewa ti gwa urighëëtya ukhani ëgweeso gwa uduvi në wa akhema vawe, 2itungo në veeso voona uduvi wanyu në wa ikuryo nanë uja. 3Uja wanyu utatende wa gënjinji wa gëjëfëya gwa ukundëka ntuka, gëtambëëya gwa sahabu, nanë urya masaa në a ughuri në üküü. 4Ëgweeso uja wanyu utendeke wa munkhoo nëwifihie itambëëmwe na sahabu nëëtiuruvëkaa. Uja wanyu utende wë moomo na nkhoo në ëtina faghafagha. Uja uruu wina sao nküü usonge a Muungu. 5Uvii khae akhema në veru naarë vëmughonjie Muungu naa vëgitendaa aghonjo aja naarë vinyumpiye gwa aghosya vawe. 6Sara në winkhori wa akhema vasaa. Mweeso agamukurya Iburahimu, agumwëtaana mweeso müküü. Na nyenye itungwee mwë vana va Sara nësa mutenda në maja na mutarekee gëntu goong'e gëmwoghofye nyee.
7Viuyi viuyi nyenye aghosya, duvi gwa ihaa itambëëmwe na akhema vanyu. Vafi akhema ikuryo mwino gëfe negëtina nanguu na mwino asai itambëëmwe na mboto a ufanga. Gusoko marombi anyu eke ughiiywa.
Uvaara Gusoko a Utenda në Maja
8Gwa umarëëya, nyenye nyoong'e tendi mwina ukhuvëi wa nkhoo. Mugionee uvavi nyenye gwa nyenye na giyanja nyenye mwino anyandughu vëutendaa. Mutende mwina nkhoo njija nyenye gwa nyenye na mwinyumpie mu muntu na muyakwe. 9Nyenye mutasukëye uvë gwa uvë matuki gwa matuki. Ëgweeso hiya na ësëë nyenye forii, gusoko a ërëë Muungu wamutanie nyenye, uvii nyenye mudahe uhanga mboto. 10Gusoko,
“Mweeso nëugufenja uyanja ufanga
na goona matiku në maja,
mweeso nëaughëëye urëmë wakwe utarighëëtye nkhani në mbë (uvë)
na amëghëëye mëomo akwe ufuma urighëëtya wegheghe.
11Mweeso nëafentuke ufuma utenda në
mavë na utenda në maja.
Mweeso në ikunkunyaye ufenja majëghana
gwa nkhoo akwe oong'e.
12Gusoko miho a Müküü ëguvihengaa antu
në vëutenda tutë,
na makutwë akwe ëgutegheeya marombi awe.
Ëgweeso Müküü uguvafëngaa avoo
në vëutendaa në mavë.”
13Tutë gutie muntu në ugumutumua nyenye nesa nyenye mwina nkümbü a utenda në maja. 14Ëgweeso në mbesa nyenye mukhasiwaa gusoko a utenda në maja, nyenye mwinjë uforiwa. Mutavaoghofe veeso, mba mutalwee, 15ëgweeso munkhoo yanyu mukuri gwa ikuryo në iküü Kiristo mwino Müküü. Matungo oong'e ighondanëyi umusucha muntu woong'e në ugumuwëëya nyenye mumusuche gusoko a ighonje në rë mukhatë anyu, kë mutende vii itambëëmwe na ufoo nanë ikuryo. 16Nkhoo yanyu itendeke njeruchwë, gusoko nësa antu vëumurighëëtya nyenye vivë gusoko a uduvi wanyu në uja gusoko amwa Kiristo veeso vëdahe goona mënyaa. 17Gusoko në vija nanguu utenda në maja, nësa uvii ëgutendeka mafenji a Muungu ukëra utenda në mavë. 18Gusoko Kiristo noo wakure gusoko a mahutye itambëëmwe gutufu, muntu në muja mwiyoma ra antu nëtivatutë, uvii adahe ugutoa kunë Muungu. Nënaa wauraghwa gëmwëërë agatendwa mufanga munkhoo. 19Mweeso agenda na agatanantya gwa nkhoo naarë yi ugëtungo. 20Antu va khae arë vëtina iküryo, itungo nënaa Muungu againdëa gwa ughiimu matiku amwa Noa, itungo nënaa mweeso ugujenga safina. Gwina antu akeevu nëvëgingëa mukhatë a safina. Në antu munana, në vëgatyowa gwa njëa a majë. 21Ubadiso unë wikhori urui. Itungwee ugumutyoa nyenye ti mwino gwa uheya ikhwe ufuma u mwëërë ëgweeso mwino iraghano ra Muungu gusoko a nkhoo në njija ukëërëa ufëtyo wamwa Yesu Kiristo. 22Mweeso wendie girunde, wikhee u mukhono wa gëlëlo wa Muungu, mweeso (Yesu Kiristo) wibalëte gunto a vamalaëka, anya udaho nanë anya nguu.
Kirimi New Testament © Bible Society of Tanzania, 2008.